កាលពីថ្ងៃទី១៨ខែសីហា លោកកូហ្វី អាណាន់អតីតអគ្គលេខាធិការអង្គការសហប្រជាជាតិបានទទួលមរណភាពនៅប្រទេសស្វីសដោយសាររោគាពាធ អ្នកយោបាយសំខាន់ៗនៃប្រទេសជាច្រើននិងអ្នកទទួលខុសត្រូវនៃអង្គការអន្តរជាតិបានចូលរួមរំលឹកវិញ្ញាណក្ខន្ធរបស់លោកអានណាន ព្រមនិងបានវាយតម្លៃខ្ពស់ចំពោះសមិទ្ធផលនិងស្នាដៃរបស់លោកអាណាន់ក្នុងបុព្វហេតុជំរុញសន្តិភាពពិភពលោកជាដើម។
លោកគូធើរ៉េសអគ្គលេខាធិការអង្គការសហប្រជាជាតិបានចេញសេចក្តីថ្លែងការណ៍ថា លោកអាណាន់គឺជាកម្លាំងណែនាំសច្ចធម៌ លោកមានក្តីឈឺចាប់យ៉ាងខ្លាំងក្រោយពីបានទទួលដំណឹងថាមរណភាពរបស់លោក។ លោកអាណានបានដឹកនាំអង្គការសហប្រជាជាតិឈានចូលសហស្សរវត្សរ៍ថ្មីដោយសេចក្តីថ្លៃថ្នូរនិងសេចក្តីប្តេជ្ញាចិត្តដ៏ខ្ពង់ខ្ពស់ លោកបានខិតខំស្វែងរកលំហសម្រាប់កិច្ចសន្ទនា វេទិកាសម្រាប់ដោះស្រាយបញ្ហានិងផ្លូវឆ្ពោះទៅកាន់ពិភពលោកមួយដែលកាន់តែល្អបវរជូនចំពោះមនុស្សជាតិ។
លោកJunckerប្រធានគណៈកម្មាធិការសហភាពអឺរ៉ុបបានថ្លែងថា លោកមានក្តីឈឺចាប់ក្រៃលែងចំពោះមរណភាពរបស់មិត្តចាស់មួយរូបនេះ។ លោកថ្លែងថា លោកអាណាន់បានខិតខំប្រឹងប្រែងពេញមួយជីវិតដើម្បីបុព្វហេតុសន្តិភាពនិងសាមគ្គីភាពរបស់ពិភពលោក និងតស៊ូដើម្បីបញ្ចប់ទុក្ខលំបាកនិងភាពអយុត្តិធម៌លើពិភពលោកទាំងមូល៕