ដើម្បីជំរុញថែមទៀតនូវទំនាក់ទំនាក់រវាងប្រទេសចិននិងឥណ្ឌូណេស៊ីឲ្យមានការអភិវឌ្ឍកាន់តែស៊ីជម្រៅ សិក្ខាសាលាអន្តរជាតិស្តីពីការសិក្សាស្រាវជ្រាវអំពីឥណ្ឌូណេស៊ីក្នុងសម័យបច្ចុប្បន្នបានបើកធ្វើនៅក្រុងក្វាងចូវកាលពីថ្ងៃទី ២១ ខែកក្កដា ។ អ្នកជំនាញនិងបញ្ញវន្តមកពីប្រទេសនិងតំបន់មួយចំនួនរួមមានប្រទេសចិន ឥណ្ឌូណេស៊ី ម៉ាឡេស៊ី និងសិង្ហបុរីជាដើម សរុបជាង៤០រូបបានចូលរួមសិក្ខាសាលាលើកនេះ ។
ក្នុងពិធីបើកសិក្ខាសាលា លោក Oratmangun ឯកអគ្គរដ្ឋទូតឥណ្ឌូណេស៊ីប្រចាំនៅប្រទេសចិនបានលើកឡើងថា ប្រទេសចិនគឺជាដៃគូពាណិជ្ជកម្មសំខាន់និងជាប្រទេសជាប្រភពវិនិយោគធំទីពីររបស់ប្រទេសឥណ្ឌូណេស៊ី ហើយឥណ្ឌូណេស៊ីក៏ជាដៃគូសហប្រតិបតិ្តការសំខាន់ក្រៃលែងមួយរបស់ប្រទេសចិនផងដែរ ទំហំពាណិជ្ជកម្មរវាងភាគីទាំងពីរបានឡើងដល់ ៦ ម៉ឺន ៤ ពាន់លានដុល្លារអាមេរិក ។ ដូច្នេះ ទំនាក់ទំនងរវាងឥណ្ឌូណេស៊ីនិងចិនគួរតែមានភាពកាន់តែស្អិតល្មួតថែមទៀត ភាគីទាំងពីរមិនគ្រាន់តែធ្វើកិច្ចសហប្រតិបតិ្តការលើវិស័យសេដ្ឋកិច្ចតែប៉ុណ្ណោះទេ ហើយក៏ត្រូវធ្វើកិច្ចសហប្រតិបតិ្តការកាន់តែស៊ីជម្រៅលើវិស័យផ្លាស់ប្តូរវប្បធម៌មនុស្សជាតិនិងការប្រាស្រ័យទាក់ទង់គ្នាទៅវិញទៅមកផងដែរ ៕
