សម្តេចតេជោ ហ៊ុន សែន នាយករដ្ឋមន្ត្រីកម្ពុជា នឹងដឹកនាំគណៈប្រតិភូជាន់ខ្ពស់អញ្ជើញទៅចូលរួម កិច្ចប្រជុំកំពូលអាស៊ាន លើកទី២៥ និងកិច្ចប្រជុំពាក់ព័ន្ធ ដែលនឹងប្រព្រឹត្តទៅពីថ្ងៃទី១២ ដល់ថ្ងៃទី១៣ ខែវិច្ឆិកា ឆ្នាំ២០១៤ នៅរដ្ឋធានី ណៃពីដោសាធារណរដ្ឋសហភាព មីយ៉ាន់ម៉ា តាមការអញ្ជើញរបស់លោក ថេន សេន (THEN Sein)ប្រធានាធិបតី នៃសាធារណរដ្ឋ សហភាពមីយ៉ាន់ម៉ា។
សេចក្តីជូនព័ត៌មានរបស់ ក្រសួងការបរទេសកម្ពុជា ចុះថ្ងៃទី៨ ខែវិចិ្ឆកា ឆ្នាំ២០១៤នេះបានឲ្យដឹងថា កិច្ចប្រជុំពាក់ព័ន្ធ ដែលនឹងប្រព្រឹត្តទៅ ពីថ្ងៃទី១២ ដល់ថ្ងៃទី១៣ ខែវិច្ឆិកាឆ្នាំ២០១៤ រួមមានៈ កិច្ចប្រជុំកំពូលអាស៊ាន លើកទី២៥, កិច្ចប្រជុំកំពូល អាស៊ាន-ឥណ្ឌាលើកទី១២, កិច្ចប្រជុំកំពូល អាស៊ាន-ជប៉ុន លើកទី១៧, កិច្ចប្រជុំកំពូល អាស៊ាន-អង្គការសហប្រជាជាតិ លើកទី៦, កិច្ចប្រជុំកំពូលរំលឹកខួប អាស៊ាន-អូស្ត្រាលី លើកទី៤០,កិច្ចប្រជុំកំពូល មេគង្គ-ជប៉ុន លើកទី៦, កិច្ចប្រជុំកំពូល អាស៊ាន-សហរដ្ឋអាមេរិក លើកទី២, កិច្ចប្រជុំកំពូល អាស៊ាន-ចិន លើកទី១៧, កិច្ចប្រជុំកំពូល អាស៊ានបូក៣ លើកទី១៧,កិច្ចប្រជុំកំពូលធុរកិច្ច និងវិនិយោគអាស៊ាន, កិច្ចប្រជុំថ្នាក់ដឹកនាំអាស៊ាន ជាមួយក្រុមប្រឹក្សាធុរកិច្ចអាស៊ាន, កិច្ចប្រជុំកំពូលអាស៊ីបូព៌ា លើកទី៩។
ក្រសួងការបរទេស បានឲ្យដឹងទៀតថា គណៈប្រតិភូអមដំណើរ រួមមានៈ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ, លោកស៊ុន ចាន់ថុល រដ្ឋមន្ត្រីក្រសួងពាញិជ្ជកម្ម, លោក ហង្ស ជួន ណារ៉ុនរដ្ឋមន្ត្រីក្រសួងអប់រំ យុវជន និងកីឡា និងសមាជិកដទៃទៀត នៃរាជរដ្ឋាភិបាល។
ក្រៅពីកិច្ចប្រជុំខាងលើ សម្តេចអគ្គមហាសេនាបតីតេជោ ហ៊ុន សែន នឹងជួបពិភាក្សាទ្វេភាគី ដាច់ដោយឡែក ជាមួយលោក តូនី អាបុត នាយករដ្ឋមន្ត្រីអូស្ត្រាលី, លោក ណារ៉េនដ្រា ម៉ូឌី នាយករដ្ឋមន្ត្រីឥណ្ឌា និងលោក ឌីមីឌ្រី ម៉េដវ៉េដេវ នាយករដ្ឋមន្ត្រី នៃសហព័ន្ធរុស្ស៊ី៕
 |  |  |  |  |  |
