ថ្ងៃទី ១៦ ខែកញ្ញា ពិព័រណ៌ចិន-អាស៊ានលើកទី ១១ និងកិច្ចប្រជុំកំពូលស្តីពីពាណិជ្ជកម្មនិងការបណ្តាក់ទុនចិន-អាស៊ានដែលចូលរួមរៀបចំរវាងប្រទេសចិននិងបណ្តាប្រទេសទាំងដប់របស់សម្ព័ន្ធអាស៊ានបានសម្ពោធបើកជាផ្លូវការនៅក្រុងណាននីងប្រទេសចិន។ អ្នកដឹកនាំចិននិងអ្នកដឹកនាំនៃបណ្តាប្រទេសអាស៊ានបានថ្លែងថា អាស៊ានគឺជាតំបន់ចាំបាច់ដែលផ្លូវសូត្រលើសមុទ្រត្រូវឆ្លងកាត់ ហើយក៏ជាតំបន់ដ៏សំខាន់សម្រាប់ការបង្កើតផ្លូវសូត្រលើសមុទ្រនាសតវត្សរិ៍ទី ២១ នេះផងដែរ ប្រទេសចិនរីករាយចិត្តបង្កើនកិច្ចសហប្រតិបត្តិការលើសមុទ្រជាមួយប្រទេសអាស៊ាន ដើម្បីធ្វើអោយកិច្ចសហប្រតិបត្តិការលើសមុទ្រក្លាយទៅជាកម្លាំងថ្មីនិងចំណុចលេចធ្លោថ្មីនៃការអភិវឌ្ឍន៍ទំនាក់ទំនងរវាងចិន-អាស៊ាន។
លោកប្រធានប្រតិបត្តិនៃសមាគមន៍ស្ទង់ពិនិត្យបរិស្ថានឥណ្ឌាបានថ្លែងថា ប្រទេសចិនមានបេតិកភ័ណ្ឌប្រវត្តិសាស្ត្រដ៏ពិសេសនិងមិនអាចប្រៀបធៀបបានក្នុងប្រវត្តិសាស្ត្រនាវាចរណ៍។ ការរួមគ្នាកសាងផ្លូវសូត្រលើសមុទ្រដែលលើកឡើងដោយប្រទេសចិននឹងជំរុញអោយតំបន់មហាសមុទ្រប៉ាស៊ីហ្វិកនៃទ្វីបអាស៊ីនិងតំបន់សមុទ្រឥណ្ឌាអោយក្លាយទៅជាវេទិកាសេដ្ឋកិច្ចសំខាន់បំផុតលើទូទាំងពិភពលោកសម្រាប់សតវត្សរិ៍នេះ ហើយក៏ជាការជំរុញដល់សន្តិភាពពិភពលោកផងដែរ។
លោក Lee Hsien Loong នាយករដ្ឋមន្ត្រីសឹង្ហបុរីបានថ្លែងថា " តំបន់អាស៊ីនៅតែរក្សានិន្នាការកើនឡើង ហើយកំណើនរបស់អាស៊ីភាគជាច្រើនគឺពឹងលើកំណើនសេដ្ឋកិច្ចរបស់ប្រទេសចិននិងសមាហរ័ណកម្មនៃតំបន់ចិន-អាស៊ាន។ "
លោក Tanasak Patimapragorn ឧបនាយករដ្ឋមន្រ្តីនិងជារដ្ឋមន្ត្រីក្រសួងការបរទេសថៃបានសំដែងអោយដឹងថា " យើងសូមថ្លែងការស្វាគមចំពោះការផ្តើមគំនិតស្តីពីការរួមគ្នាកសាងផ្លូវសូត្រលើសមុទ្រនៃសតវត្សរ៍ទី ២១ ។ " លោកបានបន្តទៀតថា យើងសង្ឃឹមអាចមើលឃើញអាស៊ាននិងចិនបង្កើនកិច្ចសហប្រតិបត្តិការក្នុងកិច្ចការសមុទ្រថែមមួយកម្រិតទៀត ដែលនេះគឺដោយសារកត្តាជាច្រើននៃការទៅមករកគ្នាខាងសេដ្ឋកិច្ចនិងពាណិជ្ជកម្មនិងការវិវឌ្ឍន៍រីកចម្រើនរវាងចិននិងអាស៊ីអាគ្នេយ៍គឺពឹងផ្អែកទៅលើការទាក់ទកគ្នានិងការតភ្ជាប់គ្នាលើសមុទ្រ។
