រសៀលថ្ងៃទី៨ មេសា សន្និសីទតុមូលអ្នកដឹកនាំប្រព័ន្ធសារព័ត៌មានអាស៊ីបានសម្ភាធបើកនៅ Bo Ao ខេត្ត ហៃណាន ប្រទេសចិន ។
នេះគឺជាលើកទីមួយដែលវិទ្យុអន្តរជាតិចិនរៀបចំសន្និសីទអ្នកដឹកនាំប្រព័ន្ធសារព័ត៌មានអាស៊ី វិទ្យអន្តជាតិចិនបានអញ្ជើញអ្នកដឹកនាំប្រព័ន្ធសារព័ត៌មានចិន កម្ពុជា សិង្ហបូរី កូរ៉េខាងត្បូង អូស្ត្រាលី ឡាវ វៀតណាម ឥណ្ឌាជាដើមមកចូលរួមសនិ្នសីទលើកនេះ ។
ឯកឧត្តម តន់ យ៉ាន អគ្គនាយកនៃវិទ្យុជាតិកម្ពុជាបានចូលរួមសន្និសីទតុមូលអ្នកដឹកនាំប្រព័ន្ធសារព័ត៌មានអាស៊ីតាមសេចកី្តអញ្ជើញ ។ ក្នុងសនិ្នសីទ ឯកឧត្តម តន់ យ៉ាន បានថ្លែងសុន្ទរកថា ឧទេ្ទសនាមអំពីការអភិវឌ្ឍន៍សារព័ត៌មានប្រទេសកម្ពុជា ជាពិសេសគឺវិទ្យុជាតិកម្ពុជា ព្រមទាំងបានឧទេ្ទសនាមអំពីលទ្ធផលនៃវិទ្យុមិត្តភាពកម្ពុជាចិន ដែលដំណើរការក្រោមកិច្ចសហប្រតិបតិ្តការនៃវិទ្យអន្តរជាតិចិននិងវិទ្យុជាតិកម្ពុជា ។ ឯកឧត្តមបានថ្លែងថាៈ
ខ្ញុំសូមសម្តែងនូវមនោសញ្ចេតនាសោមនស្សរីករាយដោយមានកិត្តិយសបានចូលរួមក្នុងសន្និសីទBoao Forum for Asia Annual 2014 និងសូមស្វាគមន៍យ៉ាងកក់ក្តៅចំពោះវត្តមានដ៏ឧត្តុងឧត្តមរបស់លោកស្រី អស់លោកដែលបានអញ្ជើញចូលរួមសន្និសីទ។
ក្នុងឱកាសដ៏មហោឡារិកនេះ ខ្ញុំសូមអនុញ្ញាតជម្រាបជូនអង្គសន្និសីទឲ្យបានជ្រាបថា វិទ្យុជាតិកម្ពុជាជាស្ថាប័នផ្សព្វផ្សាយរដ្ឋមួយនៅក្នុងក្របខ័ណ្ឌក្រសួងព័ត៌មាននៃព្រះរាជាណាចក្រកម្ពុជា។ ចាប់ពីថ្ងៃបដិសន្ធិមក វិទ្យុជាតិកម្ពុជាមានការវិវត្តន៍រីកចំរើនជាបន្តបន្ទាប់ដោយបានបំពេញភារកិច្ចផ្សព្វផ្សាយប្រចាំថ្ងៃយ៉ាងសកម្ម ដើម្បីសម្រេចគោលដៅជាចម្បងរបស់ខ្លួន គឺ បំរើផលប្រយោជន៍ប្រជាជនកម្ពុជា ។ បេសកកម្មជាប្រវត្តិសាស្រ្តនេះបានតម្រូវឲ្យវិទ្យុជាតិកម្ពុជាបំពេញនូវតួនាទី សំខាន់ ៗ បីគឺ ផ្តល់ព័ត៌មាន ផ្តល់ការអប់រំ និងការកំសាន្តជូនដល់មជ្ឈដ្ឋានអ្នកស្តាប់ភាគច្រើននៅទូទាំងប្រទេស ក្នុងពេលដែលវិទ្យុឯកជនផ្សាយតែនៅទីប្រជុំជន ប៉ុណ្ណោះ ។
ខ្លឹមសារសំខាន់ ៗ នៃការផ្សាយប្រចាំថ្ងៃរបស់ វិទ្យុជាតិកម្ពុជា បានផ្តោតជាពិសេសទៅលើការពង្រឹងឯករាជ្យជាតិ សន្តិភាព ស្ថេរភាព សណ្តាប់ធ្នាប់សង្គម ការពង្រឹងនីតិរដ្ឋ ការអភិវឌ្ឍន៍លទ្ធិប្រជាធិបតេយ្យ សេរីពហុបក្ស ការគោរពសិទ្ធិសេរី ភាព និងសេចក្តីថ្លៃថ្នូររបស់មនុស្ស ការពារវប្បធម៌ ទំនៀមទម្លាប់ ប្រពៃណីល្អរបស់ជាតិ ព្រមទាំងការអភិវឌ្ឍន៍សេដ្ឋកិច្ច សង្គម និងការកាត់បន្ថយភាព ក្រីក្ររបស់ប្រជាជន ។ដើម្បីសម្រេចឲ្យបានជោគជ័យ តាមខ្លឹមសារនេះ វិទ្យុជាតិកម្ពុជាបានរៀបចំកម្មវិធីផ្សាយសំខាន់ៗ ជាច្រើនរូបភាព មានលក្ខណៈប្លែក និងទាក់ទាញប្រិយមិត្តអ្នកស្តាប់ ដែលរួមមាន៖
1. ការផ្សាយព័ត៌មានពិត ព័ត៌មានប្លែក លឿន អាចទុកចិត្តបាន បទយកការណ៍ សម្ភាសន៍ វិចារណកថា អត្ថាធិប្បាយដែលបង្កលក្ខណៈឲ្យអ្នកស្តាប់ ងាយយល់ ងាយចាំ ។វិទ្យុជាតិកម្ពុជាយកចិត្តទុកដាក់ផ្សព្វផ្សាយនូវព្រឹត្តិការណ៍សំខាន់ៗ ទាំង នៅក្នុងប្រទេស ក៏ដូចជានៅលើសកលលោកដែលជាអាទ៍ ការបោះឆ្នោតជ្រើសរើស តំណាងរាស្រ្តនីតិកាលទី 5 នៃរដ្ឋសភា កាលពីថ្ងៃទី 28 កក្កដា ឆ្នាំ 2013 កន្លងទៅដែលបានប្រព្រឹត្តទៅក្នុងបរិយាកាសប្រកបដោយសន្តិភាព មានលក្ខណៈសេរីត្រឹមត្រូវ និងយុត្តិធម៌។ ទន្ទឹមនេះ ក៏បានផ្សព្វផ្សាយសកម្មភាពរបស់រាជរដ្ឋាភិបាលដែលកំពុងតែអនុវត្តនូវគោលនយោបាយយុទ្ធសាស្រ្តចតុកោណតំណាក់កាលទី 3 នៅ ក្នុងនីតិកាលទី 5 នៃរដ្ឋសភា ដើម្បីបន្តអភិវឌ្ឍន៍ប្រទេសឲ្យកាន់តែរីកចំរើន និងធានា ដល់ការលើកកម្ពស់កំរិតជីវភាពរស់នៅរបស់ប្រជាជនទូទៅ លើកស្ទួយសេដ្ឋកិច្ច ពង្រឹងយុត្តិធម៌ សមធម៌ក្នុងសង្គម និងផ្តល់សេវាសាធារណៈ ឲ្យកាន់តែប្រសើរថែមទៀត ។ ជុំវិញការប្រែប្រួលធាតុអាកាស ក៏ត្រូវបាន វិទ្យុជាតិកម្ពុជាយកចិត្តទុកដាក់ ផ្សាយជាបន្តបន្ទាប់ផងដែរ ។
2. ផ្សព្វផ្សាយខ្លឹមសារអប់រំ ការកំសាន្ត កម្មវិធីសន្ទនាមតិ ជជែកកំសាន្ត ផ្ទាល់ជាមួយ ប្រិយមិត្តអ្នកស្តាប់ដោយបានអញ្ជើញវាគ្មិនកិត្តិយសដែលជាឥស្សរជនសំខាន់ៗ មកពីរាជរដ្ឋាភិបាល សង្គមស៊ីវិល វិស័យឯកជន ប្រជាជន ជនជាតិដើមភាគតិច និងអ្នក ឯកទេសជាដើម។ កម្មវិធីសន្ទានាមតិនេះ ជាវេទិការជជែកពិភាក្សាផ្ទាល់ដោយលើកឡើងនូវប្រធានបទសំខាន់ ៗ ជុំវិញជីវភាពរស់នៅប្រចាំថ្ងៃរបស់ប្រជាពលរដ្ឋដែលធ្វើឲ្យវិទ្យុជាតិកម្ពុជាក្លាយជាស្ពានចម្លងដ៏រឹងមាំនៃទំនាក់ទំនងរវាងរាជរដ្ឋាភិបាល និងប្រជាជនដែលជាម្ចាស់ឆ្នោត ។ រីឯវិស័យវប្បធម៌ ប្រពៃណី សិល្បៈបូរាណសម័យ គ្រប់ប្រភេទ ជាពិសេសសាសនា ក៏ត្រូវបានលើកតម្កើងជាប្រចាំ ដោយរដ្ឋធម្មនុញ្ញ បានកំណត់ថា ពុទ្ធសាសនា ជាសាសនារបស់រដ្ឋ ។
3. ការផ្សាយពីទំនាក់ទំនង មិត្តភាព និងសហប្រតិបត្តិការរវាងកម្ពុជា ជាមួយបណ្តា ប្រទេសជាមិត្តជិតឆ្ងាយនៅលើសាកលលោក កម្មវិធីផ្សាយអាស៊ាន ជាពិសេសការផ្លាស់ប្តូរកម្មវិធីផ្សាយរវាង វិទ្យុជាតិកម្ពុជា ជាមួយវិទ្យុប្រទេសជាមិត្ត ដែលបានចុះ ហត្ថលេខាលើកិច្ចព្រមព្រៀងកន្លងមក ជាអាទ៍ យើងបានសហការបានល្អជាមួយ វិទ្យុអន្តរជាតិចិន (CRI) ចាប់តាំងពីចុះហត្ថលេខាថ្ងៃទី 7 ខែ សីហា ឆ្នាំ 2008 រួចមក យើងបានបង្កើតឡើងនូវវិទ្យុមិត្តភាពកម្ពុជា ចិន នៅភ្នំពេញ និងខេត្តសៀមរាបដោយធ្វើការបង្កើនម៉ោងផ្សាយភាសាខ្មែរជាបន្តបន្ទាប់ បង្កលក្ខណៈឲ្យអ្នកស្តាប់នៅកម្ពុជា មានការយល់ដឹងមួយកម្រិតថែមទៀត ជាពិសេសអំពីទំនាក់ទំនងមិត្តភាព និងសហប្រតិបត្តិការរវាងប្រជាជននិងរដ្ឋាភិបាលនៃប្រទេសទាំងពីរ កម្ពុជា ចិន ។
ទោះបីជាសម្រេចបាននូវស្នាដៃជាបន្តបន្ទាប់ ក្នុងការផ្សព្វផ្សាយកន្លងមកក៏ដោយ ក៏វិសាលភាពនៃការផ្សាយរបស់ វិទ្យុជាតិកម្ពុជាពុំទាន់គ្របដណ្តប់ពាសពេញប្រទេសនៅឡើយ ជាពិសេសនៅតាមតំបន់ជនបទដាច់ស្រយាល ។ ប្រឈមនឹងការខ្វះខាតនេះ វិទ្យុជាតិកម្ពុជានឹងខិតខំកសាងធនធានមនុស្ស និងមូលដ្ឋានសម្ភារៈ បច្ចេកទេស ដើម្បីបង្កើនគុណភាព នៃកម្មវិធីផ្សាយ ពង្រឹងនូវវិជ្ជាជីវៈសារព័ត៌មាន ដើម្បីរួមចំណែកលើកកម្ពស់នីតិរដ្ឋ និងលទ្ធិប្រជាធិបតេយ្យសេរីពហុបក្ស ព្រមទាំង បង្កើនថាមពលនៃការផ្សាយ ដើម្បីពង្រីកវិសាលភាពនិងប្រសិទ្ធភាពនៃសេវាផ្សព្វផ្សាយ ផ្តល់ព័ត៌មាន ផ្តល់ការអប់រំនិងការកំសាន្តប្រកបដោយគុណភាព និងសមធម៌ ជូនប្រជាពលរដ្ឋ នៅទូទាំងព្រះរាជាណាចក្រកម្ពុជា ។
ជាទីបញ្ចប់ ខ្ញុំសូមសម្តែងអំណរគុណចំពោះ វិទ្យុអន្តរជាតិចិន ដែលបានរៀបចំ ឲ្យមានការចូលរួមក្នុងសន្និសីទដ៏សំខាន់នេះ សម្រាប់រូបខ្ញុំនិងសហសេវិកខ្ញុំមកពីវិទ្យុជាតិកម្ពុជា។ ខ្ញុំក៏សូមសម្តែងអំណរគុណដល់ស្ថាប័នរៀបចំកម្មវិធីនេះដែលបានផ្តល់នូវបដិសណ្ឋារកិច្ចដ៏កក់ក្តៅចំពោះការស្នាក់នៅរបស់យើងខ្ញុំ ។
ខ្ញុំសូមអរគុណចំពោះការយកចិត្តទុកដាក់ស្តាប់របស់លោកស្រី អស់លោក ។
