នៅដើមខែមីនាជារៀងរាល់ឆ្នាំ ប្រជាជនចិនទូទៅតែងមានការរំពឹងទុកចំពោះការបើកធ្វើមហាសន្និបាតនៃសភាទាំងពីរគឺមហាសន្និបាតសភាតំណាងប្រជាជនទូទាំងប្រទេសចិន ព្រមនិងមហាសន្និបាតសភាប្រឹក្សានយោបាយប្រជាជនទូទាំងប្រទេសចិន ។ ចុះហេតុអ្វីបានជាប្រជាពលរដ្ឋចិនមានការរំពឹងទុកនូវការបើកធ្វើមហាសន្និបាតទាំងពីរនេះ ? មូលហេតុចម្បងគឺដោយមកពីមហាសន្និបាតទាំងពីរនេះ ដែលនឹងបើកធ្វើតាមពេលកំណត់ជារៀងរាល់ឆ្នាំនេះ នឹងកំណត់នូវទិសដៅក៏ដូចជាគោលនយោបាយថ្មីៗសម្រាប់អភិវឌ្ឍជាតិ ហើយមិនថាទិសដៅអភិវឌ្ឍន៍ឬក៏គោលនយោបាយថ្មីៗដែលនឹងដាក់ចេញនោះទេ ភាគច្រើនគឺបានមកពីការបញ្ចេញមតិរបស់ប្រជាពលរដ្ឋទូទៅ ពោលគឺថា សំណូមពរក៏ដូចជាតម្រូវការរបស់ប្រជាពលរដ្ឋ នឹងត្រូវបានតំណាងនិងសមាជិកនៃសភាទាំងពីរលើកយកមកពិគ្រោះពិភាក្សាក្នុងអំឡុងពេលបើកធ្វើមហាសន្និបាតទាំងពីរនេះ ។ ប្រទេសចិនជាប្រទេសមានរបបសង្គមនិយមបែបប្រជាធិបតេយ្យ ថ្វីដិ្បតតែមានបក្សកាន់អំណាចតែមួយគឺបក្សកុម្មុយនិស្ត ក៏ប៉ុន្តែមិនមានន័យថា រដ្ឋាភិបាលកាន់អំណាចផ្តាច់ការនោះឡើយជាក់ស្តែងការចូលរួមនៃតំណាងប្រជាជនដែលមកពីទូទាំងប្រទេស និងតំណាងគណបក្សផ្សេងៗក្នុងការពិគ្រោះប្រឹក្សាពីផែនការអភិវឌ្ឍន៍ជាតិក្នុងមហាសន្និបាតនៃសភាទាំងពីរគឺបានសឲ្យឃើញពីការប្រឹក្សាបែបប្រជាធិបតេយ្យ ។ អាស្រ័យហេតុនេះ ការបើកធ្វើមហាសន្និបាតនៃសភាទាំងពីរនេះអាចនិយាយបានថាជាការកំណត់នូវជោគវាសនាចិនទៅថ្ងៃអនាគត ហេតុដូច្នេះហើយ ពិភពលោកទាំងមូលក៏បានផ្តោតក្រសែចក្ខុទៅលើមហាសន្និបាតទាំងពីរនេះ ដើម្បីតាមដាននូវដំណើរវិវឌ្ឍន៍នៃមហាប្រទេសមួយនេះ ដែលបាននិងកំពុងបោះជំហានទៅមុខយ៉ាងអង់អាចក្លៀវក្លាជាទីបំផុត ។ ដោយឡែក ក្នុងឆ្នាំ ២០១៤ នេះ តើមហាសន្និបាតនៃសភាទាំងពីរនេះនឹងលើកយកបញ្ហាអ្វីខ្លះមកពិគ្រោះពិភាក្សា ? ហើយនឹងដាក់ចេញនូវការកំណត់ ក៏ដូចជាគោលនយោបាយកំណែទម្រង់អ្វីខ្លះ ? ហើយមានគោលនយោបាយណាខ្លះដែលបន្តរឹតចំណងមិត្តភាពជាមួយប្រទេសនានានៅលើពិភពលោក ក៏ដូចជាការរួមវិភាគទានកាន់តែច្រើនសម្រាប់ការអភិវឌ្ឍន៍នៃសេដ្ឋកិច្ចពិភពលោក ? ចម្លើយទាំងនេះនឹងទទួលបានបន្ទាប់ពីការបិទបញ្ចប់នៃមហាសន្និបាតនៃសភាទាំងពីរក្នុងឆ្នាំ២០១៤ នេះ ៕ អ្នកនាងធីវ៉ាដែលទើបមកបម្រើការងារនៅវិទ្យុអន្តរជាតិចិននៅក្រុងប៉េកាំង នឹងបង្ហាញអំពីចំណាប់អារម្មណ៍របស់ខ្លួនចំពោះមហាសន្និបាតនៃសភាទាំងពីរនេះ តើក្នុងនាមជាជនបរទេសមួយរូប អ្នកនាងយកចិត្តទុកដាក់ទៅលើចំណុចណាខ្លះ ? ដូចគ្នានឹងការយកចិត្តទុកដាក់របស់ប្រិយមិត្តនៅកម្ពុជាដែលឬទេ ? សូមអាននូវចំណាប់អារម្មណ៍ប្រចាំថ្ងៃរបស់ធីវ៉ាដូចតទៅ ។
 |  |  |  |  |  |
