ថ្ងៃទី ៤ ខែតុលា លោក Xi Jinping ប្រធានរដ្ឋចិននិងលោក Najib នាយករដ្ឋមន្ត្រីម៉ាឡេស៊ីបានអញ្ជើញចូលរួមវេទិការកំពូលនៃកិច្ចសហប្រតិបត្តិការផ្នែកសេដ្ឋកិច្ចរវាងចិននិងម៉ាឡេស៊ីជាមួយគ្នានៅក្រុងគូឡាឡំពួរ ហើយបានថ្លែងសុន្ទរកថាសំខាន់ស្តីពីការបង្កើនកិច្ចសហប្រតិបត្តិការជាក់ស្តែងរវាងប្រទេសទាំងពីរ និងការអភិវឌ្ឍន៍សេដ្ឋកិច្ចប្រទេសចិន សង្ឃឹមឥស្សរជនក្នុងមជ្ឈដ្ឋានសេដ្ឋកិច្ចប្រទេសទាំងពីរនឹងក្តាប់យកឱកាស បន្តបើកទំព័រថ្មីដើម្បីកិច្ចសហប្រតិបត្តិការនិងផ្តល់ផលប្រយោជន៍ទៅវិញទៅមក ។
ក្នុងកថាជូនពរ លោក Xi Jinping បានមានប្រសាសន៍ថា តាំងពីប្រទេសចិននិងម៉ាឡេស៊ីបានចងសម្ព័ន្ធការទូត ៣៩ ឆ្នាំរៀងមក កិច្ចសហប្រតិបត្តិការផ្តល់ផលប្រយោជន៍ដល់គ្នាត្រូវពង្រីកដ៏ស៊ីជម្រៅដោយឥតឈប់ឈរ ។ ប្រទេសចិនជាដៃគូពាណិជ្ជកម្មធំបំផុតរបស់ម៉ាឡេស៊ីក្នុងរយៈពេល ៤ ឆ្នាំជាប់ រីឯម៉ាឡេស៊ីជាដៃគូពាណិជ្ជកម្មធំបំផុតក្នុងអាស៊ានរបស់ប្រទេសចិនក្នុងរយៈពេល ៥ ឆ្នាំជាប់ កិច្ចសហប្រតិបត្តិការរបស់ភាគីទាំងពីរលើគ្រប់វិស័យសុទ្ធតែបានដើរក្នុងជួរមុខក្នុងកិច្ចសហប្រតិបត្តិការរវាងចិននិងអាស៊ាន ។
លោក Xi Jinping បានលើកឡើងនូវសំណើរស្តីពីការបង្កើនកិច្ចសហប្រតិបត្តិការរវាងប្រទេសទាំងពីរ ។ ទីមួយគឺ ពង្រីកពាណិជ្ជកម្មទ្វេភាគី ខំប្រឹងធ្វើឲ្យបរិមាណទឹកប្រាក់ពាណិជ្ជកម្មដើរដល់ ១ សែន ៦ ម៉ឺនលានដុល្លារអាមេរិកនៅឆ្នាំ ២០១៧ ។ ទីពីរគឺ ជំរុញការវិនិយោគន៍ទៅវិញទៅមក បន្តគាំទ្រការកសាងសួនឧស្សាហកម្មក្រុងQinzhou និងក្រុងKuantan ។ ទីបីគឺ ពង្រីកកិច្ចសហប្រតិបត្តិការផ្នែកហិរញ្ញវត្ថុ ពង្រីកទ្រង់ទ្រាយប្តូររូបិយវត្ថុរបស់ខ្លួនរវាងទ្វេភាគី ចៀសវាងគ្រោះថ្នាក់នៃហិរញ្ញវត្ថុ ។ ទីបួនគឺ បង្កើនកិច្ចសហប្រតិបត្តិការផ្នែកកសិកម្មនិងនេសាទឲ្យស៊ីជម្រៅ ។ ទីប្រាំគឺ ពួតដៃគ្នាជំរុញកិច្ចសហប្រតិបត្តិការតំបន់ ជំរុញការអភិវឌ្ឍន៍ជាមួយគ្នា ។
លោក Najib បានថ្លែងថា បច្ចុប្បន្ននេះ និន្នាកាកំណើនសេដ្ឋកិច្ចក្នុងអាស៊ីគឺខ្លាំងក្លា តួនាទីនៃទ្វីបអាស៊ីក្នុងឆាកអន្តរជាតិបានលើកកម្ពស់ជារៀងរាល់ថ្ងៃ ។ ម៉ាឡេស៊ីនិងចិនជាដៃគូសហប្រតិបត្តិការដ៏សំខាន់ទៅវិញទៅមក ប្រទេសទាំងពីរត្រូវចាត់ទុកការបង្កើតទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយជាឱកាសសំខាន់ ពង្រឹងនិងពង្រីកកិច្ចសហប្រតិបត្តិការផ្តល់ផលប្រយោជន៍ទៅវិញទៅមក សម្រេចការអភិវឌ្ឍន៍រួម ហើយរួមវិភាគទានកាន់តែធំ ដើម្បីជំរុញសន្តិភាពនិងភាពរុងរឿងថ្កុំថ្កើងក្នុងតំបន់និងពិភពលោក ៕
