ព្រឹកថៃ្ងទី២៦ ខែតុលា អ្នកនាំពាក្យរបស់សមាជបក្សកុម្មុយនិស្តចិនលើកទី១៩បានបើកធ្វើសន្និសីទប្រកាសព័ត៌មាននៅមជ្ឈមណ្ឌលព័ត៌មាននៃសមាជលើកទី១៩នៅសណ្ឋាគារមេឌីយ៉ាដោយបានអញ្ជើញអ្នកទទួលខុសត្រូវមានពាក់ព័ន្ធដើម្បីបកស្រាយរបាយការណ៍នៃសមាជលើកទី១៩ព្រមទាំងឆ្លើយសំណួររបស់អ្នកយកព័ត៌មានទៀតផង។
លោក Leng Rong ប្រធានការិយាល័យស្រាវជ្រាវឯកសារមជ្ឈិមបក្សកុម្មុយនិស្តចិនបានថ្លែងក្នុងសន្និសីទប្រកាសព័ត៌មានថា របាយការណ៍នៃសមាជលើកទី ១៩ បញ្ជាក់ថា បន្ទាប់ពីកិច្ចខិតខំប្រឹងប្រែងអស់រយៈពេលជាយូរ សង្គមនិយមដែលមានលក្ខណៈពិសេសចិនបានឈានចូលក្នុងយុគសម័យថ្មី នេះជាចំណុចប្រវត្តិសាស្ត្រថ្មីនៃការអភិវឌ្ឍរបស់ប្រទេសចិន ។ សមាជបក្សកុម្មុយនិស្តចិនលើកទី ១៩ បានកំណត់គតិណែនាំក្នុងយុគសម័យថ្មី លើកឡើងអំពីបេសកកម្មជាប្រវត្តិសាស្ត្ររបស់បក្សក្នុងយុគសម័យថ្មី កំណត់ផែនការដ៏មហិមាក្នុងយុគសម័យថ្មី ធ្វើការរៀបចំចាត់ចែងជាយុទ្ធសាស្ត្រនៅក្នុងយុគសម័យថ្មី ព្រមនិងបញ្ជាក់ជាក់លាក់នូវសំណូមពរថ្មីនៃការកសាងបក្សក្នុងយុគសម័យថ្មីផងដែរ ។
លោក WangXiaohui អនុប្រធានអចិន្ត្រៃយ៍ការិយាល័យសិក្សាស្រាវជ្រាវគោលនយោបាយមជ្ឈិមបក្សកុម្មុយនិស្តចិន និងជាអនុរដ្ឋមន្ត្រីក្រសួងឃោសនាការមជ្ឈិមបក្សកុម្មុយនិស្តចិនបានគូសបញ្ជាក់ក្នុងសន្និសីទប្រកាសព័ត៌មានថា បន្ទាប់ពីសមាជបក្សកុម្មុយនិស្តចិនលើកទី ១៨ កន្លងទៅនេះ យើងទទួលបានសមិទ្ធផលលក្ខណៈប្រវត្តិសាស្ត្រជាច្រើន សមិទ្ធផលដ៏មហិមាបំផុតនោះគឺ បានមកពីការខិតខំស្វែងរកដ៏លំបាក បក្សកុម្មុយនិស្តចិនបានបង្កើតគតិសង្គមនិយមលក្ខណៈពិសេសចិនក្នុងយុគសម័យថ្មីរបស់លោក ស៊ី ជីនភីង ។ របាយការណ៍សមាជបក្សលើកទី ១៩ និងគម្រោងធ្វើវិសោធនកម្មលើលក្ខន្តិកៈបក្សកុម្មុយនិស្តចិនដែលត្រូវបានអនុម័តក្នុងសមាជបក្សលើកទី ១៩ បានកំណត់គតិនេះជាគោលការណ៍ណែនាំប្រតិបត្តិសម្រាប់បក្ស ដែលនេះគឺជាចំណុចលេចធ្លោមួយនិងជាវិភាគទានជាប្រវត្តិសាស្ត្រដ៏ធំនិងសំខាន់នៃសមាជបក្សកុម្មុយនិស្តចិនលើកទី ១៩ នេះ។
លោក Yang Weimin អនុប្រធានការិយាល័យក្រុមដឹកនាំហិរញ្ញវត្ថុមជ្ឈិមបក្សកុម្មុយនិស្តចិនបានថ្លែងក្នុងសន្និសីទប្រកាសព័ត៌មានថា របាយការណ៍នៃសមាជបក្សកុម្មុយនិស្តចិនលើកទី១៩បានលើកឡើងដោយជាក់ច្បាស់នូវការចាត់តាំងយុទ្ធសាស្ត្រស្តីពីការកសាងប្រទេសសង្គមនិយមទំនើបកម្មដោយគ្រប់ជ្រុងជ្រោយត្រូវ"ដើរជាពីរជំហាន" ។ អត្ថន័យនៃត្រូវ"ដើរជាពីរជំហាន"គឺ ទីមួយ គូរប្លង់តារាងពេលវេលានិងផែនទីបង្ហាញផ្លូវនៃការកសាងប្រទេសសង្គមនិយមទំនើបកម្មរបស់ប្រទេសយើងដោយពេញលេញ ។ ទីពីរ ដាក់គោលដៅនៃការសម្រេចសង្គមនិយមទំនើបកម្មជាមូលដ្ឋានបានមុនកាលកំណត់១៥ឆ្នាំ ។ ទីបី អធិប្បាយអំពីគោលដៅតស៊ូសតវត្សរ៍ទីពីរកាន់តែពេញលេញ ។ ទីបួន មិនលើកអំពីគោលដៅកំណើនទ្វេដងនៃ GDP នោះទេ ។
