លោកស៊ីជីនភីង ប្រធានរដ្ឋចិនបានថ្លែងក្នុងរបាយការណ៍នៃសមាជបក្សកុម្មុនិស្តចិនលើកទី១៩ថា សង្គមនិយមដែលមានលក្ខណៈពិសេសចិនបានឈានចូលយុគសម័យថ្មី នេះជាចំណុចប្រវត្តិសាស្ត្រថ្មីនៃការអភិវឌ្ឍរបស់ប្រទេសចិន ។
កាលពីខែសីហាឆ្នាំ២០១៧នេះ ក្រុមហ៊ុនស្រាវជ្រាវទីផ្សារឯករាជ្យនៃប្រទេសបារាំង Ipsos បានធ្វើការស្ទង់មតិលើប្រជាជននៃប្រទេសចំនួន២៦ដូចជាប្រទេសចិន សហរដ្ឋអាមេរិក អង់គ្លេសនិងជប៉ុនជាដើម ហើយលទ្ធផលបង្ហាញថា ជនជាតិចិន៨៧ភាគរយមានឥរិយាបទវិជ្ជមានចំពោះការអភិវឌ្ឍរបស់ប្រទេសចិននៅពេលអនាគត គឺឈរនៅលំដាប់ថ្នាក់ទីមួយក្នុងចំណោមប្រទេសទទួលការស្រាវជ្រាវទាំងនោះ ។
បើតាមទស្សនៈរបស់លោកចានីង ប្រធានមន្ទីរស្រាវជ្រាវចុងបូព៌ានៃវិទ្យាស្ថានរុស្ស៊ីបានបញ្ជាក់ថា ប្រទេសចិនទទួលបានជោគជ័យក្នុងវិស័យការច្នៃប្រឌិតថ្មីការអភិវឌ្ឍសេដ្ឋកិច្ចនិងកិច្ចសហប្រតិបត្តិការអន្តរជាតិជាដើម ដោយសារបានប្រើប្រាស់រូបមន្តសង្គមនិយមដែលមានលក្ខណៈពិសេសចិន ហើយការរៀបចំចាត់ចែងនិងផែនការជាយុទ្ធសាស្ត្រនៃបក្សកុម្មុនិស្តចិនក្នុងសមាជលើកទី ១៩ បានរួមវិភាគទានជាគំរូដ៏សំខាន់សម្រាប់ប្រទេសផ្សេងទៀត ។
ព្រមជាមួយនេះ ប្រទេសចិនក៏បានផ្តល់គំរូនិងបទពិសោធក្នុងវិស័យប្រឆាំងអំពើពុករលួយផងដែរ។ លោក Simon Khaya Moyo រដ្ឋមន្ត្រីក្រសួងព័ត៌មាន និងផ្សព្វផ្សាយប្រទេសស៊ីមបាវ៉េ ទទួលបន្ទុកជាសមាជិកការិយាល័យនយោបាយមជ្ឈិមសហសម្ព័ន្ធជនជាតិ-រណសិរ្សស្នេហាជាតិអាហ្វ្រិក ដែលជាបក្សកាន់អំណាចស៊ីមបាវ៉េបានថ្លែងថា យើងខ្ញុំសូមកោតសរសើរដល់សកម្មភាពប្រឆាំងអំពើពុករលួយនៃបក្សកុម្មុយនិស្តចិន។ យើងខ្ញុំក៏កំពុងធ្វើការប្រឆាំងអំពើពុករលួយក្នុងប្រទេសស៊ីមបាវ៉េដែរ ហើយនេះមិនមែនជាភារកិច្ចងាយស្រួលទេ។ ប្រទេសយើងត្រូវតែសិក្សារៀនសូត្រនូវបទពិសោធទាំងនេះពីប្រទេសចិន ជាពិសេសមន្ត្រីទទួលបន្ទុកកិច្ចការប្រឆាំងអំពើពុករលួយនៃប្រទេសយើង កាន់តែត្រូវរៀនសូត្របទពិសោធទាំងនេះពីប្រទេសចិន។
ក្នុងឋានៈជាគណៈបក្សធំទី១លើពិភពលោក បក្សកុម្មុយនិស្តចិនបានគូសបញ្ជាក់ក្នុងរបាយការណ៍នៃសមាជបក្សកុម្មុយនិស្តចិនលើកទី១៩ថា បក្សកុម្មុយនិស្តចិនជាបក្សដែលស្វែងរកសុភមង្គលសម្រាប់ប្រជាជនចិន ហើយក៏ជាបក្សដែលតស៊ូសម្រាប់បុព្វហេតុវិវឌ្ឍទៅមុខរបស់មនុស្សលោកផងដែរ។ ចំពោះអត្ថរសចំណែកនេះ លោកស្រីឯកអគ្គរដ្ឋទូតប្រទេសឡាវប្រចាំនៅប្រទេសចិនបានថ្លែងថា ចាប់តាំងពីចាប់កំណើតរហូតដល់ភាពខ្លាំងក្លានៃបក្សកុម្មុយនិស្តចិនដែលមានរយៈពេលជាង៩០ឆ្នាំកន្លងមកនេះ បក្សនេះបានដឹកនាំប្រទេសចិនតាំងពីភាពលំបាកកាលពីមុនរហូតដើរដល់ផ្លូវអភិវឌ្ឍន៍ប្រកបដោយភាពរុងរឿងនិងសុខសាននាពេលបច្ចុប្បន្នជាសន្សឹមៗ។បក្សកុម្មុយនិស្តចិនជាបក្សមួយដែលស្រឡាញ់សន្តិភាព យកចិត្តទុកដាក់ដល់ការអភិវឌ្ឍន៍ ផ្តួចផ្តើមគំនិតធ្វើកិច្ចសហប្រតិបត្តិការនិងឈ្នះឈ្នះជាមួយគ្នា។បក្សកុម្មុយនិស្តចិនអនុវត្តគោលនយោបាយការទូតឯករាជ្យ ម្ចាស់ការនិងសន្តិភាព ហើយបានរួមចំណែកដល់ការអភិវឌ្ឍន៍សន្តិភាពពិភពលោក។ផ្លូវអភិវឌ្ឍន៍ដែលបក្សកុម្មុយនិស្តចិនដឹកនាំប្រទេសចិនដើរនោះបានផ្តល់បទពិសោធដ៏មានប្រយោជន៍ដល់ការអភិវឌ្ឍន៍សម្រាប់គ្រប់ប្រទេសលើពិភពលោកក្នុងនោះរួមមានប្រទេសឡាវផងដែរ។
លោក Deepak អ្នកជំនាញការទទួលបន្ទុកស្រាវជ្រាវពីប្រទេសចិននៃសកលវិទ្យាល័យJawaharlal Nehru ប្រទេសឥណ្ឌាបានថ្លែងថា សមាជបក្សកុម្មុយនិស្តចិនលើកទី ១៩ មិនត្រឹមតែកំណត់ផែនការអភិវឌ្ឍន៍របស់ប្រទេសចិននាពេលអនាគតច្បាស់លាស់ប៉ុណ្ណោះទេ ថែមទាំងបានកំណត់វិធីសាស្ត្រយ៉ាងជាក់ស្តែងដើម្បីសម្រេចគោលដៅទាំងនេះ ។ ប្រទេសចិនសម្រេចបាននូវភាពរុងរឿងខ្លាំងក្លាថែមមួយកម្រិតទៀត ដែលនឹងអំណោយផលដល់ប្រទេសនានាលើពិភពលោក ។
