តបតាមសេចក្តីអញ្ជើញរបស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា លោកស៊ី ជីនភីងប្រធានរដ្ឋចិននឹងមកបំពេញទស្សនកិច្ចផ្លូវរដ្ឋនៅកម្ពុជាពីថ្ងៃទី១៣ដល់១៤ខែតុលានេះ។ មុនពេលចេញដំណើរ លោកស៊ី ជីនភីងបានចុះផ្សាយអត្ថបទមានចុះឈ្មោះក្រោមចំណងជើងថា " ធ្វើជាអ្នកជិតខាងនិងមិត្តភក្តិដ៏ស្មោះត្រង់នៅលើសារព័ត៌មានរស្មីកម្ពុជា។
អត្ថបទចុះឈ្មោះរបស់លោកស៊ី ជីនភីងបានញ៉ាំងឲ្យគ្រប់មជ្ឈដ្ឋាននៅប្រទេសកម្ពុជាមានការចាប់អារម្មណ៍យ៉ាងទូលំទូលាយនិងនាំគ្នាបញ្ចេញប្រតិកម្មមតិយ៉ាងសកម្ម។ ឥស្សរជនកម្ពុជាបានថ្ែលងថា អត្ថបទបានបង្ហាញថាលោកស៊ី ជីនភីងប្រធានរដ្ឋចិនបានចាត់ទុកប្រទេកម្ពុជាជាមិត្តភក្តិពិតប្រាកដ ធ្វើឲ្យប្រជាជនកម្ពុជាពោរពេញទៅដោយជំនឿចិត្តចំពោះការអភិវឌ្ឍទំនាក់ទំនងរវាងកម្ពុជានិងចិនដែលកាន់តែមានភាពជិតស្និទ្ធនាពេលអនាគត។
លោកផែ ស៊ីផានអ្នកនាំពាក្យនៃរាជរដ្ឋាភិបាលកម្ពុជាបានថ្លែងនៅពេលផ្តល់បទសម្ភាសន៍ជាមួយអ្នកសារព័ត៌មានថា ភាគីកម្ពុជាសូមកោតសរសើរចំពោះលោកស៊ី ជីនភីងប្រធានរដ្ឋចិនដែលបានផ្តោតការយកចិត្តទុកដាក់ខ្ពស់ទៅលើការធ្វើឲ្យស៊ីជម្រៅនូវទំនាក់ទំនងនិងកិច្ចសហប្រតិបត្តិការទ្វេភាគី។ ដំណើរទស្សនកិច្ចរបស់លោកស៊ី ជីនភីងនៅប្រទេសកម្ពុជាគឺជាកិត្តិយសរបស់កម្ពុជា ដំណើរទស្សនកិច្ចលើកនេះមុខជានឹងបង្កើនកិច្ចសហប្រតិបត្តិការគ្រប់ជ្រុងជ្រោយរវាងកម្ពុជានិងចិនថែមទៀតជាមិនខាន ពិសេសគឺកិច្ចសហប្រតិបត្តិការពាក់ព័ន្ធមួយចំនួនក្រោមក្របខ័ណ្ឌនៃយុទ្ធសាស្រ្តខ្សែក្រវាត់មួយនិងផ្លូវមួយ។
លោកសុខ ឦសានអ្នកនាំពាក្យនៃគណបក្សប្រជាជនកម្ពុជាសម្គាល់ឃើញថា អត្ថបទចុះឈ្មោះបានបង្ហាញថាលោកស៊ី ជីនភីងប្រធានរដ្ឋចិនបានផ្តល់កិត្តិយសយ៉ាងធំដល់ប្រទេសជាតិនិងប្រជាជនកម្ពុជា។ ប្រទេសកម្ពុជាមានមោទនភាពណាស់ដោយសារបានក្លាយទៅជាដៃគូដែលប្រទេសចិនមានទំនុកចិត្ត ហើយជឿជាក់ថាដំណើរទស្សនកិច្ចរបស់លោកស៊ី ជីនភីងប្រធានរដ្ឋចិនលើកនេះនឹងពង្រឹងនិងពង្រីកថែមទៀតនូវចំណងមិត្តភាព សាមគ្គីភាពនិងកិច្ចសហប្រតិបត្តិការគ្រប់ជ្រុងជ្រោយរវាងប្រទេសទាំង២ជាំមិនខាន។
លោកឈៀងវណ្ណារិទ្ធ ប្រធានក្រុមប្រឹក្សាភិបាលនៃវិទ្យាស្ថានស្រាវជ្រាវយុទ្ធសាស្រ្តកម្ពុជាបានថ្លែងថា អត្ថបទចុះឈ្មោះបានបង្ហាញឲ្យឃើញនូវមនោសញ្ចេត្តនាផ្ទាល់ខ្លួនរបស់លោកស៊ី ជីនភីងប្រធានរដ្ឋចិនចំពោះកម្ពុជា ព្រមនិងទឹកចិត្តស្មោះដែលចាត់ទុកកម្ពុជាជាមិត្តភក្តិពិតប្រាកដ។
បញ្ញវន្តរូបនេះបានសម្គាល់ឃើញថា អត្ថបទចុះឈ្មោះបានបង្ហាញយ៉ាងច្បាស់នូវភាពស៊ីជម្រៅនិងវិសាលភាពនៃទំនាក់ទំនងទ្វេភាគី ហើយព័ត៌មានស្នូលគឺការជំរុញទំនាក់ទំនងភាពជាដៃគូសហប្រតិបត្តិការយុទ្ធសាស្រ្តគ្រប់ជ្រុងជ្រោយរវាងកម្ពុជានិងចិន។ លោកស៊ី ជីនភីងបានលើកពីការពន្លឿនការតភ្ជាប់គ្នារវាងសេចក្តីផ្តួចផ្តើមអំពីយុទ្ធសាស្រ្តខ្សែក្រវាត់មួយនិងផ្លូវមួយរបស់ភាគីចិនជាមួយនិងយុទ្ធសាស្រ្តចតុកោណរបស់ភាគីកម្ពុជា នេះគឺសំខាន់ណាស់សម្រាប់ការជំរុញភាពស័ក្តិសិទ្ធិនិងប្រសិទ្ធភាពនៃយុទ្ធសាស្រ្តទាំងពីរនេះ៕
