ខ្ញុំមានក្តីសោមនស្សរីករាយណាស់ដែលបានមកបំពេញទស្សនកិច្ចនៅប្រទេសកម្ពុជាដ៏ស្រស់ប្រិមប្រិយដោយតបតាមសេចក្តីអញ្ជើញរបស់ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រម្ពុជា។ខ្ញុំសូមតាងនាមរដ្ឋាភិបាលនិងប្រជាជនចិន សូមសំដែងការសួរសុខទុក្ខយ៉ាងស្មោះនិងការប្រសិទ្ធពរដ៏ល្អបវរជូនចំពោះប្រជាជនកម្ពុជាដែលជាភាតរៈរបស់ប្រជាជនចិន។
ប្រទេសកម្ពុជាជាសមាជិកដ៏សំខាន់នៃសមាគមអាស៊ាន។ប៉ុន្មានឆ្នាំចុងក្រោយនេះ នៅក្រោមម្លប់ថែរក្សាឃុំគ្រងប់របស់ព្រះករុណាព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រម្ពុជានិងក្រោមការដឹកនាំរបស់រាជរដ្ឋាភិបាលដែលមានសម្តេចហ៊ុនសែនជានាយករដ្ឋមន្រ្តី កិច្ចកសាងប្រទេសជាតិរបស់កម្ពុជាទទួលបានសមិទ្ធផលអភិវឌ្ឍន៍គួរឲ្យកត់សម្គាល់ កម្រិតជីវភាពរស់នៅរបស់ប្រជាជនត្រូវបានលើកកម្ពស់ឥតឈប់ឈរ បានដើរតួនាទីកាន់តែសំខាន់ឡើងៗក្នុងកិច្ចការតំបន់និងអន្តរជាតិ។
ប្រទេសចិននិងកម្ពុជាជាអ្នកជិតខាងល្អនិងមិត្តភ័កិ្តដ៏ពិតប្រាកដដែលមានភាពស្មោះត្រង់នឹងគ្នា។ដូចជាព្រះរាជបន្ទូលរបស់ព្រះករុណាព្រះបាទសម្តេចព្រះនរោត្តម សីហនុព្រះមហាវីរៈក្សត្រកម្ពុជាដូច្នោះថា " មិត្តភាពដ៏រឹងមាំនិងយូរអង្វែងរវាងកម្ពុជានិងចិន ហាក់បីដូចជាបុបា្ផដ៏ស្រស់មួយទងដែលមិនចេះរុះរោយ និងរីកស្គុះស្គាយជាអមតៈក្រោមផ្ទៃមេឃដ៏ភ្លឺស្រឡះ"។បន្ទាប់ពីបង្កើតទំនាក់ទំនងការទូតអស់រយៈពេល៥៨ឆ្នាំមក មិត្តភាពប្រពៃណីរវាងប្រទេសចិននិងប្រទេសកម្ពុជាបានឆ្លងកាត់ពេលវេលាដ៏យូរអង្វែងនិងការសាកល្បងនៃការប្រែប្រួលស្ថានការណ៍អន្តរជាតិដែលបានចាក់ឬសយ៉ាងជ្រៅនិងមានមែកធាងយ៉ាងត្រសុំត្រសាយដែលនេះគឺបានមកពីការខិតខំពូនជ្រំយ៉ាងយកចិត្តទុកដាក់របស់ថ្នាក់ដឹកនាំជំនាន់ចាស់នៃប្រទេសទាំងពីរ។ទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយបានរីកចម្រើនទៅមុខដោយស៊ីជម្រៅ មិនគ្រាន់តែបាននាំមកនូវផលប្រយោជន៍ជាក់ស្តែងដល់ប្រទេសទាំងពីរនិងប្រជាជននៃប្រទេសទាំងពីរប៉ុណ្ណោះទេប៉ុន្តែថែមទាំងបានរួមវិភាគទានជាវិជ្ជមានដល់សន្តិភាព ស្ថិរភាពនិងភាពចំរុងចម្រើនក្នុងតំបន់និងពិភពលោកទាំងមូលទៀតផង។
ក្នុងអំឡុងពេលបំពេញទស្សនកិច្ច ខ្ញុំនឹងចូលថ្វាយបង្គំគាល់ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជួបពិភាក្សាការងារជាមួយនឹងសម្តេចហ៊ុនសែននាយករដ្ឋមន្រ្តីនិងចូលសាកសួរព្រះរាជសុខទុក្ខសម្តេចព្រះមហាវីរៈក្សត្រីនរោត្តម មុនិនាថសីហនុ ព្រះវររាជមាតាជាតិខ្មែរ ព្រមទាំងធ្វើការប្រាស្រ័យទាក់ទងគ្នាយ៉ាងទូលំទូលាយជាមួយឥស្សរជនគ្រប់មជ្ឈដ្ឋាននៅកម្ពុជា ខ្ញុំរំពឹងថានឹងអាចផ្លាស់ប្តូរមតិគ្នាយ៉ាងស៊ីជម្រៅជាមួយថ្នាក់ដឹកនាំកម្ពុជាអំពីទំនាក់ទំនងទ្វេភាគីនិងបញ្ហាដែលយកចិត្តទុកដាក់ដូចគ្នា ជឿជាក់ថា នៅក្រោមការខិតខំប្រឹងប្រែងរួមរបស់ភាគីទាំងពីរ ដំណើរទស្សនកិច្ចលើកនេះនឹងទទួលបានសមិទ្ធផលដូចការគ្រោងទុកក្នុងន័យជំរុញទំនាក់ទំនងភាពជាដៃគូសហប្រតិបត្តិការជាយុទ្ធសាស្រ្តគ្រប់ជ្រុងជ្រោយរវាងចិននិងកម្ពុជាឲ្យឈានដល់កម្រិតថ្មីមួយទៀត ដើម្បីផ្តល់សុខសុភមង្គលកាន់តែច្រើនដល់ប្រជាជននៃប្រទេសទាំងពីរ។
