សម្តេច​ហ៊ុន​ សែន​ នាយក​រដ្ឋមន្រ្តី​នៃ​ព្រះ​រាជាណាចក្រ​កម្ពុជា​ថ្លែង​ថា​ ​ដំណើរ​ទស្សនកិច្ច​របស់​លោក ​ស៊ី ​ជីនភីង​​ ប្រធាន​រដ្ឋ​ចិន​នឹង​លើក​កម្ពស់​កម្រិត​កិច្ច​សហប្រតិបត្តិការ​ភាព​ជា​ដៃគូ​យុទ្ធសាស្រ្ត​គ្រប់​ជ្រុង​ជ្រោយ​នៃ​ប្រទេស​ទាំង​ពីរ​កម្ពុជា​និង​ចិន​ឲ្យ​កាន់​តែ​ខ្ពស់​ថែម​ទៀត
2016-10-13 16:24:43  cri  Web Editor:Ma Xiaoqing

មុន​ពេល​លោក ​ស៊ី ​ជីនភីង​​ ប្រធាន​រដ្ឋ​ចិន​អញ្ជើញ​ទៅ​បំពេញ​ទស្សនកិច្ច​ផ្លូវ​រដ្ឋ​នៅ​ប្រទេស​កម្ពុជា​ សម្តេច​ហ៊ុន​ សែន​ នាយក​រដ្ឋមន្រ្តី​នៃ​ព្រះ​រាជាណាចក្រ​កម្ពុជា​បាន​ផ្តល់​បទ​សម្ភាសន៍​ជា​លាយ​លក្ខណ៍​អក្សរ​ជា​មួយ​​ប្រព័ន្ធ​សារ​ព័ត៌មាន​ប្រទេស​ចិន។​សម្តេច​ហ៊ុន​ សែន​ បាន​ថ្លែង​ថា​ ​ដំណើរ​ទស្សនកិច្ច​របស់​លោក ​ស៊ី ​ជីនភីង​​ ប្រធាន​រដ្ឋ​ចិន​នឹង​ធ្វើ​ឲ្យ​ទំនាក់​ទំនង​មិត្តភាព​ជា​ប្រពៃណី​រវាង​កម្ពុជា​-ចិន​កាន់​តែ​មាន​ភាព​ជិត​ស្និទ្ធ​និង​រឹង​មាំ​ថែម​ទៀត​ ព្រម​ទាំង​នឹង​លើក​កម្ពស់​កម្រិត​កិច្ច​សហប្រតិបត្តិការ​ភាព​ជា​ដៃគូ​យុទ្ធសាស្រ្ត​គ្រប់​ជ្រុង​ជ្រោយ​នៃ​ប្រទេស​ទាំង​ពីរ​កម្ពុជា​និង​ចិន​ឲ្យ​កាន់​តែ​ខ្ពស់​ថែម​ទៀត។

សម្តេច​ហ៊ុន​ សែន​ ថ្លែង​ថា​ ​ទំនាក់​ទំនង​មិត្តភាព​ជា​ប្រពៃណី​ដែល​ត្រូវ​បាន​បង្កើត​រួម​គ្នា​និង​ថែ​រក្សា​ដោយ​ប្រុង​ប្រយ័ត្ន​ដោយ​ព្រះ​ករុណា​ ព្រះវររាជបិតា​ជាតិ​ ​ព្រះ​បរមរតនកោដ្ឋ ​នរោត្តម​ សីហនុ ​និង​ថ្នាក់​ដឹក​នាំ​ចិន​ជំនាន់​មុន​ រួម​មាន​លោក​ប្រធាន​ ម៉ៅ​សេទុង ​លោក​នាយករដ្ឋមន្រ្តី​ជូ​អេន​ឡាយ​ ព្រម​ទាំង​ថ្នាក់​ដឹក​នាំ​សំខាន់​ៗ​ផ្សេង​ទៀត​។ទំនាក់​ទំនង​និង​កិច្ច​សហប្រតិបត្តិការ​ដ៏​មេត្រី​ភាព​រវាង​ប្រទេស​ទាំង​ពីរ​គឺ​បង្កើត​ឡើង​ដោយ​ឈរ​លើ​មូលដ្ឋាន​គោលការណ៍​៥​ខ​នៃ​រួម​រស់​ដោយ​សន្តិសហវិជ្ជមាន​និង​ឈរ​លើ​មូលដ្ឋាន​ផ្តល់​ផល​ប្រយោជន៍​ដល់​គ្នា​ទៅ​វិញ​ទៅ​មក​និង​ឈ្នះ-ឈ្នះ ​ជា​មួយ​គ្នា។​ក្នុង​អំឡុង​ពេល​២៥​ឆ្នាំ​កន្លង​ទៅ​នេះ​ ​ទំនាក់​ទំនង​មេត្រី​ភាព​នៃ​ប្រទេស​ទាំង​ពីរ​ចិន​និង​កម្ពុជា​បាន​ទទួល​ការ​វិវឌ្ឍ​ដែល​គួរ​ឲ្យ​កត់​សម្គាល់​ កិច្ច​សហប្រតិបត្តិការ​លើ​​គ្រប់​វិស័យ​បាន​បន្ត​កាន់​តែ​ស៊ីជម្រៅ។​ប្រទេស​កម្ពុជា​និង​ប្រទេស​ចិន​បាន​ឈាន​ដល់​កិច្ច​សហប្រតិបត្តិការ​ភាព​ជា​ដៃគូ​យុទ្ធសាស្រ្ត​គ្រប់​ជ្រុង​ជ្រោយ​នៅ​ឆ្នាំ​២០១០។​គណៈ​កម្មាធិការ​សម្រប​សម្រួល​អន្តររដ្ឋាភិបាល​កម្ពុជា-ចិន​បាន​រៀប​ចំ​ឡើង​នៅ​ឆ្នាំ​២០១៤​ ហើយ​បាន​ធ្វើ​កិច្ច​ប្រជុំ​សម្របសម្រួល​៣​លើក​រួច​ហើយ ​និង​​ទទួល​បាន​សមិទ្ធផល​ដ៏​សំខាន់។

     សម្តេច​ហ៊ុន​ សែន​ បន្ត​ថា​ ​ប៉ុន្មាន​ឆ្នាំ​ចុង​ក្រោយ​នេះ​ ​ថ្នាក់​​ដឹក​នាំ​ជាន់​ខ្ពស់​នៃ​ប្រទេស​ទាំង​ពីរ​កម្ពុជា​និង​ចិន​បាន​ជួប​ប្រាស្រ័យ​ទាក់​ទង​គ្នា​ជា​ញឹក​ញាប់​និង​ផ្លាស់​ប្តូរ​ទស្សនកិច្ច​គ្នា​ទៅ​វិញ​ទៅ​មក​ដែល​បាន​បង្ហាញ​ពី​ទំនាក់​ទំនង​យ៉ាង​ជិត​ស្និទ្ធ​និង​កិច្ច​សហប្រតិបត្តិការ​ដ៏​ល្អ​ប្រសើរ​រវាង​កម្ពុជា​និង​ចិន​។ភាគី​ទាំង​ពីរ​នឹង​បន្ត​រក្សា​និន្នាការ​ប្រា​ស្រ័យ​ទាក់​ទង​គ្នា​​នៃ​ទំនាក់​ទំនង​មេត្រី​រវាង​ប្រទេស​ទាំង​ពីរ​ ព្រម​ពេល​ជា​មួយ​គ្នា​ ក៏​នឹង​ពង្រឹង​និង​ពង្រីក​កិច្ច​សហប្រតិបត្តិការ​ក្នុង​ក្របខ័ណ្ឌ​ពហុ​ភាគី​រួម​មាន​កិច្ច​សហប្រតិបត្តិការ​ក្នុង​ក្រប​ខ័ណ្ឌ​អង្គការ​សហប្រជាជាតិ​ អាស៊ី​បូព៌ា​​ អាស៊ាន​-ចិន​ កិច្ច​ប្រជុំ​អាស៊ី-អឺរ៉ុប ​និង​យន្តការ​េមគង្គ-ឡានឆាង​ជា​ដើម។

ឆ្នាំ​នេះ​ជា​ខួប​៣​ឆ្នាំ​នៃ​សេចក្តី​​ផ្តួច​ផ្តើម​អំពី​យុទ្ធ​សាស្រ្ត​ ខ្សែ​ក្រវាត់​មួយ​និង​ផ្លូវ​មួយ​។​ក្នុង​អំឡុង​ពេល​៣​ឆ្នាំ​កន្លង​ផុត​ទៅ​នេះ​ ​ប្រទេស​ទាំង​ពីរ​បាន​ទទួល​សមិទ្ធផល​ជា​ផ្លែផ្កា​ក្នុង​ការ​ជំរុញ​កិច្ច​កសាង​ខ្សែ​ក្រវាត់​មួយ​និង​ផ្លូវ​មួយ​ និង​ការ​ជំរុញ​ការ​តភ្ជាប់​នូវ​យុទ្ធសាស្រ្ត​ការ​អភិវឌ្ឍន៍​នៃ​ប្រទេស​ទាំង​ពីរ។​សម្តេច​ហ៊ុន​ សែន​ បន្ត​ទៀត​ថា​ កម្ពុជា​គាំទ្រ​យ៉ាង​ពេញ​ទំហឹង​ចំពោះ​គំនិត​ផ្ដួច​ផ្តើម​នេះ​ដែល​មាន​គោល​ដៅ​បង្កើន​ការ​ត​ភ្ជាប់​គ្នា​រវាង​បណ្តា​ប្រទេស​ និង​ជំរុញ​ការ​ត​ភ្ជាប់​ហេដ្ឋារចនា​សម្ព័ន្ធ​ ពាណិជ្ជកម្ម​ ហិរញ្ញាវត្ថុ​នៃ​ប្រទេស​នៅ​តំបន់​នេះ​ ក៏​ដូច​ជា​ការ​​ត​ភ្ជាប់​វប្បធម៌​​និង​អរិយធម៌​​មិន​ដូច​គ្នា​ ​ដើម្បី​ឲ្យ​មាន​ភាព​រុង​រឿង​និង​វិបុលភាព​ជា​មួយ​គ្នា។

     សម្តេច​ហ៊ុន​ សែន​បាន​ថ្លែង​ទៀត​ថា​ ​ដំណើរ​ទស្សនកិច្ច​របស់​លោក​ ស៊ី ​ជីនភីង​​លើក​នេះ​ នឹង​ធ្វើ​ឲ្យ​ទំនាក់​ទំនង​មិត្តភាព​ជា​ប្រពៃណី​រវាង​កម្ពុជា​និង​ចិន​កាន់​តែ​ជិត​ស្និទ្ធ​និង​រឹង​មាំ​បន្ថែម​ទៀត​ ប្រទេស​ទាំង​ពីរ​កម្ពុជា​និង​ចិន​នឹង​បន្ត​គាំទ្រ​គ្នា​ទៅ​វិញ​ទៅ​មក​លើ​បញ្ហា​ដែល​ពាក់ព័ន្ធ​នឹង​សិទ្ធ​និង​ផល​ប្រយោជន៍​ជា​ស្នូល​របស់​ភាគី​ម្ខាង​និង​បញ្ហា​ធំ​ៗ​ដែល​ចាប់​អារម្មណ៍​ជា​សំខាន់។​ព្រម​ពេល​ជា​មួយ​គ្នា​ សម្តេច​​សង្ឃឹម​ថា ​​ប្រទេស​ទាំង​ពីរ​កម្ពុជា​និង​ចិន​អាច​បន្ត​បង្កើន​ទំនាក់​ទំនង​មិត្តភាព​រវាង​យុវជន​ ដើម្បី​បណ្តុះ​បណ្តាល​អ្នក​បន្ត​វេន​សម្រាប់​មិត្តភាព​កម្ពុជា​និង​ចិន​ ​ព្រម​ទាំង​ពង្រឹង​មូលដ្ឋាន​គាំទ្រ​ជា​សាធារណៈ​ចំពោះ​ទំនាក់​ទំនង​មិត្តភាព​ទ្វេភាគី​ ដើម្បី​ឲ្យ​ប្រទេស​ទាំង​ពីរ​ក្លាយ​ជា​អ្នក​ជិត​ខាង​ល្អ​ មិត្ត​ល្អ​ បង​ប្អូន​ល្អ​ និង​ដៃគូ​ល្អ​ជា​រៀង​រហូត។
ទាក់ទង​ជាមួយ​យើង​ខ្ញុំ