មហាសន្និបាតលើកទី បី នៃសភាតំណាងប្រជាជនទូទាំងប្រទេសចិននីតិកាលទី ១២ បានបិទសម័យប្រជុំដោយគាប់ប្រសើរកាលពីថ្ងៃទី ១៥ មីនា។ លោក ស៊ី ជីនភីង អ្នកដឹកនាំជាន់ខ្ពស់របស់ប្រទេសចិនបានលើកឡើងអំពីការរៀបចំយុទ្ធសាស្ត្រ "គ្រប់ជ្រុងជ្រោយចំនួន ៤ " ជាលើកដំបូងកាលពីចុងឆ្នាំ ២០១៤ ហើយបានក្លាយទៅជាគំនិតស្នូលនៃមហាសន្និបាតប្រចាំឆ្នាំនេះ។ អ្នកសង្កេតការណ៍បានសម្គាល់ថា មហាសន្និបាតទាំងពីរប្រចាំឆ្នាំនេះ បានបង្ហាញយ៉ាងច្បាស់និងស៊ីជម្រៅអពីការជំរុញអោយដំណើរការឈានទៅមុខដោយសម្របសម្រួលនូវការបង្កើតសង្គមដែលមានជីវភាពរស់នៅក្នុងកម្រិតធូរល្មមដោយគ្រប់ជ្រុងជ្រោយ ធ្វើកំណែទម្រង់អោយស៊ីជម្រៅដោយគ្រប់ជ្រុងជ្រោយ ជំរុញការគ្រប់គ្រងតាមនីតិរដ្ឋដោយគ្រប់ជ្រុងជ្រោយ និងការគ្រប់គ្រងបក្សយ៉ាងម៉ឹងម៉ាត់ដោយគ្រប់ជ្រុងជ្រោយ ដែលនឹងជួយបើកទំព័រថ្មីខាងទំនើបភាវូបនីយកម្មខាងការគ្រប់គ្រងជាតិរបស់ប្រទេសចិន។
អ្នកសង្កេតការណ៍បានយល់ឃើញថា បើពន្យល់អំពីយុទ្ធសាស្ត្រ "គ្រប់ជ្រុងជ្រោយចំនួន ៤ "តាមរយៈខ្លឹមសារនៃមហាសន្និបាតទាំងពីរនៃឆ្នាំនេះអាចមើលឃើញថា អត្ថន័យជ្រាលជ្រៅនៃយុទ្ធសាស្ត្រនេះគឺសំដៅទៅលើគំនិតអនុវត្តគោលនយោបាយដែលយកមនុស្សជាស្នូល ហើយឆ្លងតាមមតិឯកភាពដែលបង្កើតឡើងដោយតំណាងនិងសមាជិកមហាសន្និបាតទាំងអស់ ។ យុទ្ធសាស្ត្រ "គ្រប់ជ្រុងជ្រោយចំនួន ៤" នឹងអាចសម្របសម្រួលថែមមួយកម្រិតទៀតនូវការអភិវឌ្ឍន៍និងការកំណែទម្រង់ ការគ្រប់គ្រងបក្សនិងការគ្រប់គ្រងជាតិ កិច្ចការផ្ទៃក្នុងនិងគោលនយោបាយការទូត គោលដៅចុងបំផុតគឺដើម្បីផ្តល់ជាវិភាគទាននិងសុភមង្គលកាន់តែច្រើនដល់ប្រជាជនចិនដែលមានចំនួនជាង ១៣០០ លាននាក់។ យុទ្ធសាស្ត្រ"គ្រប់ជ្រុងជ្រោយចំនួន ៤ "គឺជាកូនសោមួយសម្រាប់ប្រទេសចិនឈានទៅកាន់ភាពរុងរឿងនិងថ្កុំថ្កើង ហើយនៅឆ្នាំ ២០១៥ ប្រទេសចិននឹងបើកទំព័រថ្មីក្នុងការធ្វើអោយមានទំនើបភាវូបនីយកម្មខាងការគ្រប់គ្រងជាតិ៕
