មហាសន្និបាតលើកទី ៣ នៃសភាតំណាងប្រជាជនទូទាំងប្រទេសចិននីតិកាលទី ១២ បានសម្ពោធបើកនៅថ្ងៃទី ៥ ខែមីនា លោក លី ខឺឈាំង នាយករដ្ឋមន្ត្រីចិនបានធ្វើរបាយការណ៍ការងាររដ្ឋាភិបាលចិន ដែលបានបណ្តាលអោយសហគមន៍អន្តរជាតិយកចិត្តទុកដាក់យ៉ាងខ្លាំង។ អ្នកជំនាញការនិងវិជ្ជាករប្រទេសអាស៊ានបានថ្លែងថា របាយការណ៍ការងាររដ្ឋាភិបាលចិនបានបង្ហាញទឹកចិត្តប្តេជ្ញាដ៏ម៉ឹងម៉ាត់ចំពោះការជំរុញអោយកំណែទម្រង់និងការបើកចំហកាន់តែស៊ីជម្រៅ របាយការណ៍បានកំណត់ពីយុទ្ធសាស្ត្រអភិវឌ្ឍន៍ស្វែងរកកំណើនយ៉ាងនឹងនរសម្រាប់សេដ្ឋកិច្ចចិន បានធ្វើអោយពិភពលោកទាំងមូលមើលឃើញនូវអនាគតយ៉ាងទូលំទូលាយដែលសេដ្ឋកិច្ចចិនវិវឌ្ឍន៍រីកចម្រើនដោយនឹងនរនិងបរិសុទ្ធ សង្គមមានស្ថិរភាពនិងចុះសម្រុងគ្នា។
លោក Ei Sun Oh វិជ្ជាករមហាវិទ្យាល័យពហុបច្ចេកទេស Nan Yang ប្រទេសសិង្ហបុរី និងជាអតីតលេខាធិការនយោបាយរបស់នាយករដ្ឋមន្ត្រីម៉ាឡេស៊ីបានថ្លែងថា គ្រប់មជ្ឈដ្ឋានក្រៅប្រទេសមានក្តីសង្ឃឹមយ៉ាងខ្លាំងចំពោះសេដ្ឋកិច្ចចិនដែលវិវឌ្ឍន៍ដោយនឹងនរនិងបរិសុទ្ធជានិរន្តរភាព ពិសេសសង្ឃឹមថាអាចចូលរួមក្នុងការបើកចំហកម្រិតខ្ពស់ចំពោះបរទេសវគ្គថ្មី។ លោកបានមានប្រសាសន៍ថា លោកនាយករដ្ឋមន្ត្រី លី ខឺឈាំង បានបូកសរុបថា ការអភិវឌ្ឍន៍ខាងសេដ្ឋកិច្ចនិងសង្គមកិច្ចរបស់ប្រទេសចិនក្នុងឆ្នាំនេះគឺ " មានភាពនឹងនជាទូទៅ ហើយក៏មានការរីកចំរើនផងដែរ " ដែលធ្វើអោយអ្នកទាំងឡាយកាន់តែរីករាយរួមគ្នាប្រទេសចិនក្នុងការពុះពាការលំបាកនិងការសាកល្បងក្នុងពេលឈានទៅមុខ។
លោក Tang Zhimin ប្រធានមជ្ឈមណ្ឌលស្រាវជ្រាវបញ្ហាចិន-អាស៊ាននៃវិទ្យាស្ថានគ្រប់គ្រង Panyapiwat ប្រទេសថៃបានយល់ឃើញថា របាយការណ៍ការងាររដ្ឋាភិបាលចិនបានសង្កត់ធ្ងន់ទៅលើ "ការបើកចំហចំពោះបរទេសកម្រិតខ្ពស់វគ្គថ្មី" គឺមានអត្ថន័យថ្មីដូចតទៅ ៖ ការផ្តោតសំខាន់ទៅលើការនាំចូលមូលធនប្រទេសជឿនលឿនបានក្លាយទៅជាការធ្វើកិច្ចសហប្រតិបត្តិការនិងការបើកចំហតាមតំបន់ "ខ្សែក្រវ៉ាត់មួយនិងផ្លូវមួយ", ពីការនាំចេញទំនិញដល់ការនាំចេញបច្ចេកទេសនិងមូលធន , ពីការរៀនសូត្រនិងទទួលយកទំលាប់អន្តរជាតិដល់ការចូលរួមនិងណែនាំការកំណត់ច្បាប់អន្តរជាតិ៕
