ការសន្ទនាក្រៅផ្លូវការនៃអ្នកដឹកនាំក្រុមប្រទេស BRICS បានបើកធ្វើនៅក្រុង Brisbane ប្រទេសអូស្ត្រាលីកាលពីថ្ងៃទី ១៥ ខែវិច្ឆិកា ដោយមានការអញ្ជើញចូលរួមពី លោក ស៊ី ជីនភីង ប្រធានរដ្ឋចិន លោកស្រី Dilma Rousseff ប្រធានាធិបតីប្រ៊េស៊ីល លោក ភូទីន ប្រធានាធិបតីរុស្ស៊ី លោក Narendra Modi នាយករដ្ឋមន្ត្រីឥណ្ឌា និងលោក Jacob Zuma ប្រធានាធិបតីអាហ្វ្រិកខាងត្បូង។ អ្នកដឹកនាំប្រទេសទាំង ៥ បានផ្លាស់ប្តូរមតិយោបល់យ៉ាងស៊ីជម្រៅស្តីពីកិច្ចសហប្រតិបត្តិការរវាងសមាជិកក្រុមប្រទេស BRICS ព្រមនិងបញ្ហាសំខាន់ៗក្នុងតំបន់និងអន្តរជាតិ ហើយបានដើរដល់មតិឯកភាពគ្នាកម្រិតខ្ពស់។
នៅក្នុងសន្ទរកថា លោក ស៊ី ជីនភីង បានវែកញែកថា កិច្ចសហប្រតិបត្តិការសេដ្ឋកិច្ចគឺជាកម្លាំងដ៏យូរអង្វែងមួយដើម្បីជំរុញការអភិវឌ្ឍន៍ប្រទេស BRICS យើងត្រូវតែមានស្មារតីប្រទេស BRICS ដែលបើកចំហ អធ្យាស្រ័យ សហការគ្នា ឈ្នះ-ឈ្នះជាមួយគ្នា បន្តខិតខំធ្វើការក្នុងការកសាងទីផ្សារសមាហរ័ណកម្ម ការផ្លាស់ប្តូរទូលំទូលាយខាងហិរញ្ញវត្ថុ ការតភ្ជាប់ខាងហេដ្ឋារចនាសម្ព័ន្ធ និងការផ្លាស់ប្តូរទ្រង់ទ្រាយធំខាងមនុស្សសាស្ត្រ ត្រូវកំណត់ផែនការរយៈពេលយូរនៃកិច្ចសហការសេដ្ឋកិច្ច បង្កើតទំនាក់ទំនងដៃគូសេដ្ឋកិច្ចអោយកាន់តែស្និទ្ធស្នាល។ ដូចនេះ ការបង្កើតធនាគារអភិវឌ្ឍន៍ជាតិប្រទេស BRICS និងការរៀបចំខាងបម្រុងទុកប្រាក់សង្គ្រោះជាបន្ទាន់គឺជាកិច្ចកាដ៏សំខាន់ ដែលត្រូវអនុវត្តក្នុងពេលឆាប់ៗ។
អ្នកដឹកនាំប្រទេសនានាដែលបានចូលរួមក្នុងការសន្ទនាក្រៅផ្លូវការលើកនេះបានថ្លែងថា ឥឡូវនេះ សេដ្ឋកិច្ចពិភពលោកមានក្តីសង្ឃឹមអាចសម្រេចការងើបឡើងវិញយ៉ាងខ្លាំងនិងដោយនិរន្តរភាព។ តួអង្គសេដ្ឋកិច្ចថ្មីត្រូវខិតខំរក្សាកំណើនសេដ្ឋកិច្ច សកម្មជំរុញការគ្រប់គ្រងសេដ្ឋកិច្ចពិភពលោក។ រីឯប្រទេសជឿនលឿនមានពាក់ព័ន្ធ ត្រូវចាត់ប្រើគោលនយោបាយរូបិយវត្ថុដោយការទទួលខុសត្រូវ បង្កើនចំនួនវិនិយោគទុន ដើម្បីស្វែងរកបាននូវកម្លាំងជំរុញកំណើនដែលមានរយៈពេលយូរ។ ប្រទេស BRICS ត្រូវបង្កើនកិច្ចសហប្រតិបត្តិការគ្រប់ជ្រុងជ្រោយ អនុវត្តអោយបានល្អនូវលទ្ធផលនៃការជួបសន្ទនាក្រុង Fortaleza ប្រទេសប្រ៊េស៊ីល ដើម្បីបង្កើនល្បឿននៃដំណើរកសាងធនាគារអភិវឌ្ឍន៍ជាតិប្រទេស BRICS និងការរៀបចំមានពាក់ព័ន្ធខាងប្រាក់បម្រុងទុកជាបន្ទាន់ ហើយត្រូវធ្វើការទាក់ទងនិងការសម្របសម្រួលយ៉ាងសកម្មទៀតផង ដើម្បីធានាជាក់លាក់អោយសន្និសិទកំពូលក្រុង Brisbane នៃក្រុមប្រទេស G20 ទទួលបានជោគជ័យ និងគាំពារនូវផលប្រយោជន៍រួម៕
