បន្ទាប់ពីបានបញ្ចប់ការពិភាក្សាជាមួយលោក អូបាម៉ា ប្រធានាធិបតីអាមេរិក នៅល្ងាចថ្ងៃទី ១២ ខែវិច្ឆិកា លោក លី ខឺឈាំងនាយករដ្ឋមន្ត្រីចិនបានចេញដំណើរទៅកាន់ព្រលានយន្តហោះភ្លាម ដើម្បីធ្វើដំណើរទៅកាន់ប្រទេសមីយ៉ាន់ម៉ា ដែលនឹងបើកដំណើរទស្សនកិច្ចការទូតថ្មីមួយទៀតនៃប្រទេសចិន។
ដំណើរទស្សនកិច្ចរបស់លោក លី ខឺឈាំង លើកនេះ គឺដើម្បីចូលរួមសន្និសិទមួយចំនួនរបស់អ្នកដឹកនាំកិច្ចសហប្រតិបត្តិការអាស៊ីបូព៌ា ព្រមនិងបំពេញទស្សនកិច្ចផ្លូវការនៅមីយ៉ាន់ម៉ា។ ដំណើរទស្សនកិច្ចនេះគឺជាផ្នែកមួយដ៏សំខាន់នៃសកម្មភាពការទូតរបស់ចិននាពេលថ្មីៗកន្លងទៅនេះ។ មានការវិភាគខ្លះបានយល់ឃើញថា ដំណើរទស្សនកិច្ចលើកនេះមានអត្ថន័យសំខាន់ចំពោះការធ្វើអោយកាន់តែស៊ីជ្រៅនូវទំនាក់ទំនាក់រវាងចិន-អាស៊ាន រវាងចិននិងមីយ៉ាន់ម៉ា និងការជំរុញកិច្ចសហប្រតិបត្តិការក្នុងតំបន់អាស៊ីបូព៌ា ក៏ដូចជាសន្តិភាពនិងស្ថេរភាពក្នុងតំបន់ផងដែរ។
សន្និសិទមួយចំនួននៅក្នុងកិច្ចប្រជុំលើកនេះរួមមាន៖ កិច្ចប្រជុំអ្នកដឹកនាំចិន-អាស៊ាន( ១០+១ ) កិច្ចប្រជុំអ្នកដឹកនាំអាស៊ាន-ចិន-ជប៉ុន-កូរ៉េខាងត្បូង (១០+៣ ) និងកិច្ចប្រជុំកំពូលអាស៊ីបូព៌ា (១០+៨ ) ជាដើម។ មានការវិភាគបានចង្អុលបង្ហាញថា យន្តការទាំងបីនេះមិនមែនជាវេទិកាសមញ្ញនោះទេ គឺសុទ្ធតែមាន "ខ្លឹមសារលក្ខណៈជាក់ស្តែង" ដូច្នេះ ប្រធានបទនឹងមិនគ្រាន់តែផ្តោតទៅលើបញ្ហាអភិវឌ្ឍន៍ដែលប្រទេសក្នុងតំបន់យកចិត្តទុកដាក់ជាមួយគ្នាប៉ុណ្ណោះទេ គឺថែមទាំងនឹងពិភាក្សាដល់ផែនការសហការក្នុងតំបន់អាស៊ីបូព៌ាដែលកាន់តែពឺស្តារ និងកាន់តែមានតម្លៃ។
