នៅថ្ងៃទីមួយនៃសប្តាហ៍ឈប់សម្រាកសម្រាប់បុណ្យជាតិចិន "ថ្ងៃទី ១ តុលា" អ្នកខេត្តក្វាំងតុងបាននាំគ្នាចេញទៅធ្វើទេសចរណ៍នៅក្រៅប្រទេសយ៉ាងច្រើនកុះករ ។ តាមព័ត៌មាននៃបណ្តាទីភ្នាក់ងារទេសចរណ៍ធំៗបានអោយដឹងថា គោលដៅទេសចរណ៍ដូចជាតំបន់តៃវ៉ាន់ និងប្រទេសថៃ ជប៉ុន កូរ៉េខាងត្បូងជាដើមទទួលបានការស្វាគមន៍ខ្លាំងបំផុតសម្រាប់ទេសចរចិន។ ក្នុងអំឡុងពេលសប្តាហ៍មាសនៃបុណ្យជាតិចិន ភ្ញៀវទេសចរណ៍ខេត្តយូនណានជាច្រើនបានជ្រើសរើសការចេញទៅធ្វើទេសចរណ៍នៅប្រទេសជិតខាងដូចជាបណ្តាប្រទេសអាស៊ីអាគ្នេយ៍ និងប្រទេសអាស៊ីខាងត្បូងជាដើម។
ប៉ុស្តិ៍ត្រួតពិនិត្យតាមព្រំដែននៅក្រុងគុនមីញបានប្រាប់អោយដឹងថា តាមទិន្នន័យមានពាក់ព័ន្ធបានបង្ហាញថា ក្នុងអំឡុងពេលបុណ្យជាតិចិនឆ្នាំនេះ កំណើនភ្ញៀវទេសចរណ៍ចេញពីច្រកព្រំដែនគុនមីញទៅធ្វើទេសចរណ៍នៅតំបន់អាស៊ីអាគ្នេយ៍និងអាស៊ីខាងត្បូងជាដើមបានកើនឡើងយ៉ាងច្រើនបើប្រៀបធៀបនឹងរយៈពេលដូចគ្នានៃឆ្នាំកន្លងទៅ។ តាមទម្លាប់ វិធីធ្វើទេសចរណ៍នាពេលកន្លងទៅគឺខាងក្រុមហ៊ុនឬអង្គភាពចុះឈ្មោះអោយបុគ្គលិកទៅធ្វើទេសចរណ៍ជាក្រុម ឬមួយក៏ខាងភ្នាក់ងារទេសចរណ៍នាំភ្ញៀវទៅជាក្រុមធំ តែឆ្នាំនេះ ការទៅធ្វើទេសចរណ៍តាមរូបភាពជាលក្ខណៈមិត្តភក្តិឬក្រុមគ្រួសារបានក្លាយទៅជាជម្រើសថ្មីសម្រាប់ការធ្វើទេសចរណ៍នៅបរទេស៕
