ប្រព័ន្ធសារព័ត៌មានសំខាន់ៗជាច្រើនរបស់ប្រទេសអាមេរិកសុទ្ធតែយកចិត្តទុកដាក់ចំពោះរបាយការណ៍ការងារនៃរដ្ឋាភិបាលចិនដែលលោក Li Ke qiang នាយករដ្ឋមន្ត្រីចិនបានប្រកាសកាលពីថ្ងៃទី៥ខែមីនា ។
ទីភ្នាក់ងារព័ត៌មាន The Associated Press របស់អាមេរិកបានផ្សាយថា នាយករដ្ឋមន្ត្រី Li Ke qiang បានប្រកាសពីគោលដៅនៃកំណើនសេដ្ឋកិច្ចដល់៧ក្បៀស៥ភាគរយនាឆ្នាំនេះរបស់រដ្ឋាភិបាលចិនក្នុងរបាយការណ៍ការងារនៃរដ្ឋាភិបាល នេះបង្ហាញឲ្យឃើញថា ស្របពេលដែលធ្វើការកំណែទម្រង់សេដ្ឋកិច្ចដោយស៊ីជម្រៅ រដ្ឋាភិបាលចិននឹងមិនឲ្យសេដ្ឋកិច្ចចិនកើនឡើងយឺតពេកទេ ហើយក៏មិនឲ្យអត្រាបាត់បង់ការងារធ្វើកើនឡើងដែរ ។ ផ្តោតចំពោះការដែលរដ្ឋាភិបាលចិននឹងចាត់វិធានការជាច្រើនដូចជាការបិទរោងចក្រអគ្គិសនីធ្យូងថ្មកាន់តែច្រើនដើម្បីកាត់បន្ថយការបំពុលដែលលើកឡើងក្នុងរបាយការណ៍ការងារនៃរដ្ឋាភិបាល ព្រមទាំងការបន្ថែមប្រាក់ទុនទៅលើសាលារៀនក្នុងតំបន់ក្រីក្រនិងការធានារ៉ាប់រងខាងការព្យាបាលជម្ងឺ ទីភ្នាក់ងារព័ត៌មាន The Associated Press របស់អាមេរិកដោយយោងតាមសំដីរបស់អ្នកជំនាញការអាមេរិកថា នេះជាការប្រកាសប្រឆាំងចំពោះភាពក្រីក្រនិងការបំពុលរបស់នាយករដ្ឋមន្ត្រី Li Ke qiangដែលបានបង្ហាញឲ្យឃើញថា រដ្ឋាភិបាលអាណត្តិថ្មីមានការយកចិត្តទុកដាក់ខ្ពស់ចំពោះជីវភាពប្រជាពលរដ្ឋនិងសង្គម ។
