លោកស្រី ហ៊្វូ យីង អ្នកនាំពាក្យមហាសន្និបាតលើកទី ២ នៃសភាតំណាងប្រជាជនទូទាំងប្រទេសចិនបានថ្លែងនៅថ្ងៃទី ៤ ខែមីនាថា ប្រទេសចិនសង្ឃឹមថាអាចទទួលបានការយោគយល់និងការគាំទ្រកាន់តែច្រើនពីសហគមន៍អន្តរជាតិក្នុងការខិតខំប្រឹងប្រែងដើម្បីវាយបង្ក្រាបភេរវនិយមដោយកម្លាំងកាន់តែខ្លាំង។
ក្នុងសន្និសីទព័ត៌មាន លោកស្រី ហ៊្វូ យីងបាននិយាយដល់ការវាយប្រហារភេរវៈកម្មដោយអំពើហិង្សាយ៉ាងឃោឃៅដែលបានកើតនៅក្រុងឃុនមិញ កាលពីថ្ងៃទី ១ ខែមីនា។ លោកស្រីបានបង្ហាញថា ក្នុងការវាយប្រហារនេះ ពួកអន្តពាលបានសម្លាប់ជនស៊ីវិលគ្មានកំហុសតាមទំនើងចិត្ត យើងថ្កោលទោសយ៉ាងខ្លាំងចំពោះរឿងនេះ ហើយយើងសូមចូលរួមរំលែកទុក្ខយ៉ាងក្រៀមក្រំចំពោះប្រជាជនដែលបានស្លាប់បាត់បង់ជីវិត សូមសំដែងការសួរសុខទុក្ខយ៉ាជ្រាលជ្រៅចំពោះប្រជាជនដែលរងគ្រោះ។
