សន្និសីទពាក់ព័ន្ធមួយចំនួននៃថ្នាក់ដឹកនាំអាស៊ីបូព៌ានឹងបើកសម័យប្រជុំនៅប្រទេសប្រ៊ុយណេនៅថ្ងៃទី៩ខែតុលា។ មុនពេលបើកធ្វើសន្និសីទ ពេលផ្តល់បទសម្ភាសន៍ជាមួយអ្នកសារព័ត៌មាន លោកស្រីYang Xiuping ឯកអគ្គរដ្ឋទូតចិនប្រចាំនៅសម្ព័ន្ធអាស៊ានបានថ្លែងថា តទៅថ្ងៃក្រោយនឹងឈរលើមូលដ្ឋាននៃការបង្កើនទំនុកចិត្តគ្នាឥតឈប់ឈរសម្រាប់ជំរុញថែមទៀតនូវកិច្ចសហប្រតិបត្តិការដោយស្វែងរកការពិតជាក់ស្តែងនិងគ្រប់ជ្រុងជ្រោយ ស្វែងរកការវាយទម្លុះថ្មីខាងយុទ្ធសាស្រ្ត។
លោកស្រីបានលើកសំណើ៦ចំណុចអំពីការអភិវឌ្ឍន៍កិច្ចសហប្រតិបត្តិការរវាងចិននិងអាស៊ាននាពេលអនាគត៖
ទី១គឺបន្តបង្កើនទំនុកចិត្តគ្នាខាងនយោបាយ ទី២គឺលើកកម្ពស់កម្រិតថ្នាក់នៃតំបន់ពាណិជ្ជកម្មសេរីចិន-អាស៊ាន លើកកម្ពស់ថែមទៀតនូវកម្រិតសេរីភាវូបនីយកម្មនិងភាពងាយស្រួលនៃការធ្វើពាណិជ្ជកម្មនិងការវិនិយោគទុន ទី៣គឺជំរុញការតភ្ជាប់និងការផ្លាស់ប្តូរគ្នា ទី៤គឺបង្កើនកិច្ចសហប្រតិបត្តិការខាងហិរញ្ញវត្ថុ ទី៥គឺអនុវត្តកិច្ចសហប្រតិបត្តិការលើសមុទ្រ ទី៦គឺបង្កើនការផ្លាស់ប្តូរខាងមនុស្សសាស្រ្ត។
ពាក់ព័ន្ធនឹងសន្និសីទកំពូលអាស៊ីបូព៌ាដែលជិតនឹងបើកធ្វើនោះ លោកស្រីYang បានថ្លែងថា ក្នុងនាមជាយន្តការមួយក្នុងចំណោមយន្តការសហប្រតិបត្តិការតំបន់ដែលដឹកនាំដោយអាស៊ាន សន្និសីទកំពូលអាស៊ីបូព៌ាជាវេទិកាដ៏សំខាន់មួយសម្រាប់ជំរុញកិច្ចសហប្រតិបត្តិការអាស៊ីបូព៌ា៕
