ពីថ្ងៃទី៣ដល់ទី៥ខែតុលា លោកXi Jinpingប្រធានរដ្ឋចិនបានអញើ្ជញទៅបំពេញទស្សនកិច្ចផ្លូវរដ្ឋនៅប្រទេសម៉ាឡេស៊ី។ ពាក់ព័ន្ធនឹងការនេះ ឥស្សរជននិងប្រព័ន្ធសារព័ត៌មានបរទេសបានវាយតម្លៃយ៉ាងខ្ពស់ដោយបង្ហាញថាដំណើរទស្សនកិច្ចរបស់លោកXi Jinpingលើកនេះគឺប្រកបដោយអត្ថន័យដ៏សំខាន់ចំពោះការលើកកម្ពស់ទំនាក់ទំនងសហប្រតិបត្តិការមេត្រីភាពរវាងចិននិងម៉ាឡេស៊ីនិងទំនាក់ទំនងរវាងចិននិងប្រទេសអាស៊ាន។
លោកEi Sun Ohអតីតលេខាធិការនយោបាយរបស់លោកNajibនាយករដ្ឋមន្រ្តីម៉ាឡេស៊ីបានថ្លែងថា សមិទ្ធផលដ៏សំខាន់បំផុតនៃដំណើរទស្សនកិច្ចរបស់លោកXi Jinpingនៅម៉ាឡេស៊ីលើកនេះ គឺលើកកម្ពស់ទំនាក់ទំនងរវាងប្រទេសទាំង២ឲ្យឡើងដល់ទំនាក់ទំនងភាពជាដៃគូសហប្រតិបត្តិការយុទ្ធសាស្រ្ដោដោយគ្រប់ជ្រុងជ្រោយ នេះបានបង្ហាញថា ម៉ាឡេស៊ីជាប្រទេសជិតខាងនិងជាដៃគូមួយដែលចិនយកចិត្តទុកដាក់ជាទីបំផុត។ទំនាក់ទំនងខាងសេដ្ឋកិច្ចនិងពាណិជ្ជកម្មរវាងម៉ាឡេស៊ីនិងចិនមានសង្ឃឹមក្តាប់យកឱកាសនេះជាកាលានុវត្តភាព សម្រាប់បន្តអភិវឌ្ឍន៍ដោយល្បឿនលឿន។
លោកTan Khai Heeអគ្គលេខាធិកានៃសមាគមមិត្តភាពម៉ាឡេស៊ីនិងចិនបានថ្លែងថាដំណើរទស្សនកិច្ចរបស់លោកXi Jinpingលើកនេះ ព្រមនិងសមិទ្ធផលដែលភាគីទាំង២ទទួលបាន ជាសញ្ញាមួយដែលបង្ហាញនូវការលោតផ្លោះដ៏ធំមួយលើកនៃទំនាក់ទំនងរវាងប្រទេសទាំង២។
សារព័ត៌មានSin Chew Dailyជាសារព័ត៌មានភាសាចិនដែលមានបរិមាណបោះពុម្ភផ្សាយច្រើនជាងគេនៅម៉ាឡេស៊ីបានផ្សាយដំណឹងថា ជំនួបប្រាស្រ័យរវាងលោកប្រធានរដ្ឋចិនXi Jinping និងលោកនាយករដ្ឋមន្រ្តីម៉ាឡេស៊ីNajib នឹងបំពេញបន្ថែមនូវពលានុភាពថ្មីដល់ការអភិវឌ្ឍន៍ទំនាក់ទំនងរវាងម៉ាឡេស៊ីនិងចិននាពេលអនាគត ហើយដឹកនាំប្រជាជនប្រទេសទាំង២ឲ្យឆ្ពោះទៅកាន់យុគសម័យថ្មីមួយ។
សារព័ត៌មានបាងកកប៉ុស្តិ៍បានផ្សាយដំណឹងឲ្យដឹងថា ដំណើរទស្សនកិច្ចរបស់លោកXi Jinpingនៅប្រទេសអាស៊ីអាគ្នេយ៍ជាលើកដំបូងក្រោយពីលោកចូលកាន់តំណែង គឹមានអំណោយផលដល់ការរឹតចំណងមិត្តភាពរវាងចិននិងប្រទេសអាស៊ាន។
សារព័ត៌មានYomiuri Sinbunជប៉ុនបានផ្សាយដំណឹងថា លោកXi Jinpingប្រធានរដ្ឋចិនអញ្ជើញទៅបំពេញទស្សនកិច្ចនៅអាស៊ីអាគ្នេយ៍ និងលោក Li Keqiangនាយករដ្ឋមន្រ្តីចិននឹងអញ្ជើញចូលរួមសន្និសីទមួយចំនួនរបស់ថ្នាក់ដឹកនាំអាស៊ីបូព៌ា ព្រមនិងបំពេញទស្សនកិច្ចនៅប្រ៊ុយណេ ថៃនិងវៀតណាម ទាំងនេះបានបង្ហាញឲ្យឃើញថា ប្រទេសចិនយកចិត្តទុកដាក់ខ្លាំងចំពោះទំនាក់ទំនងជាមួយអាស៊ីអាគ្នេយ៍ក្នុងកម្រិតមួយដែលមិនធ្លាប់មាន៕
