ពេលដែលដើរចូលទៅកាន់ទីក្រុងយីនឈួន ក្រៅពីមានការភ្ញាក់ផ្អើលនឹងការវិវឌ្ឍនៃទីក្រុងនៅភាពពាយព្យប្រទេសចិនមួយនេះ យើងក៏បានឃើញពីភាពស្រស់ស្អាតរបស់ទីក្រុងមួយនេះផងដែរ ។ ជាធម្មតា ភាពស្រស់ស្អាតនៃទីក្រុងមួយ មិនមែនស្ថិតលើតែការគ្រប់គ្រងនិងការលម្អរបស់សាលារដ្ឋបាលនោះទេ ប៉ុន្តែវាក៏មានពាក់ព័ន្ធយ៉ាងជិតស្និទ្ធនឹងការចូលរួមរបស់ប្រជាពលរដ្ឋផងដែរ ។ អាស្រ័យហេតុនេះ ក្រៅអំពីការចាប់អារម្មណ៍នូវកំណែទម្រង់ផ្នែករដ្ឋបាលរបស់ទីក្រុងយីនឈួន ដែលបាននឹងកំពុងអភិវឌ្ឍខ្លួនឆ្ពោះទៅរកទីក្រុងវៃឆ្លាត ជាគំរូសម្រាប់ទីក្រុងនានានៅប្រទេសចិន បញ្ហាចាត់ចែងកាកសំណល់ទីក្រុងក៏ជាប្រធានបទនៃការយកបទសម្ភាសន៍និងទស្សនារបស់ខ្ញុំផងដែរ ។
អ្វីដែលគួរឲ្យកត់សម្គាល់ គឺថានៅតាមស្ថាប័នធំៗនិងវិថីធំៗនានា គេនឹងមានឃើញធុងសំរាមប្រភេទថ្មីដែលមានរូបរាងប្លែកចម្លែកនិងល្អប្រណីតជាងធុងសំរាមទូទៅនៅប្រទេសចិន ។ បន្ទាប់ពីធ្វើការស្វែងយល់ ទើបដឹងថា នោះគឺជាធុងសំរាមស្វ័យប្រវត្តិ ។ ពេលយើងចង់ចោលសំរាម គ្រាន់តែដាក់ដៃទៅក្បែរ គម្របធុងសំរាមនឹងបើកដោយស្វ័យប្រវត្តិ ពិសេសគឺថាមិនដូចជាធុងសំរាមធម្មតានោះទេ ដែលត្រូវមានអ្នកបោសសម្អាតទៅបើកមើលថាសំរាមពេញធុងហើយឬនៅ ពោលគឺថានៅពេលដែលសំរាមពេញ ប្រព័ន្ធវៃឆា្លតដែលបានភ្ជាប់ជាមួយធុងសំរាមនឹងបញ្ជូលទិន្នន័យទៅកាន់ស្ថាប័នពាក់ព័ន្ធ ដែលជាការសំចៃកម្លាំងអ្នកបោសសម្អាតក្នុងការដើរមើលតាមធុងសំរាមរាប់រយរាប់ពាន់ក្នុងទីក្រុង ។ ក្រៅពីនៅតាមវិថីធំៗ ធុងសំរាមក្នុងបុរីអនាគត(បុរីវៃឆ្លាត)មានមុខងារកាន់តែពេញលេញនិងកាន់តែទំនើប ។ ធុងសំរាមប្រភេទនេះក្រៅពីអាចដំណើរការដោយស្វ័យប្រវត្តិ នៅអាចបែងចែកសំរាមតាមប្រព័ន្ធវៃឆា្លតទៀតផង ពោលគឺពេលដែលយើងចង់ចោលសំរាម ត្រូវយកក្រដាសមានលេខកូដស្តីពីប្រភេទសំរាមទៅស្គេន ក្រោយពីសម្គាប់ពីប្រភេទនៃសំរាម គម្រប់ធុងនៃប្រភេទសំរាមនោះនឹងបើកឡើងដោយស្វ័យប្រវត្តិ ។ អ្វីដែលគួរឲ្យកត់សម្គាល់គឺ ប្រសិនជាយើងចោលខុសប្រភេទសំរាម នឹងត្រូវទទួលការពិន័យដោយការកាត់ពិន្ទុ ឧទាហរណ៍ដូចជាយើងស្គីនប្រភេទសំរាមក្រដាស តែបែរជាចោលប្រភេទផ្លាស្ទីកទៅវិញ ប្រព័ន្ធវៃឆ្លាតនឹងធ្វើការវិភាគដឹងភ្លាម ហើយនឹងធ្វើការកាត់ពិន្ទុយើងដោយស្វ័យប្រវតិ្ត នេះជាការដាស់តឿនដោយផ្ទាល់ដល់ប្រជាពលរដ្ឋឲ្យចូលរួមចំណែកក្នុងការបែងចែកប្រភេទសំរាម ដែលជាការចូលរួមចំណែកក្នុងការការពារបរិស្ថានផងដែរ ។ ការលើកទឹកចិត្តនិងការបំផុសនូវមនសិការបរិស្ថានរបស់ប្រជាពលរដ្ឋ នឹងរួមចំណែកច្រើនដល់ការកាត់បន្ថយភាពលំបាកក្នុងការបែងចែកប្រភេទសំរាមនិងការចាត់ចែងកាកសំណល់ទីក្រុង ។
