ថ្ងៃទី១៧កញ្ញា ក្រោមការផ្តួចផ្តើមនិងរៀបចំរបស់វេបសាយCRIonline នៃវិទ្យុអន្តរជាតិចិន សកម្មភាព "ដំណើរទស្សនកិច្ចនៅប្រទេសចិនរបស់អ្នកប្រើវេបសាយCRIonlineជាជនបរទេសនៃប្រទេសតាមខ្សែក្រវាត់និងផ្លូវបានចាប់ផ្ដើមជាផ្លូវការ។គោលដៅទស្សនកិច្ចទីមួយគឺនៅសាខារោងចក្រផលិតទឹកដោះគោMENGNIUនៅខណ្ឌថុងចូវក្រុងប៉េកាំង។ក្រុមហ៊ុនMENGNIUគ្រុបបានបង្កើតឡើងនៅឆ្នាំ១៩៩៩ រយៈពេលតែ១៨ឆ្នាំ ក្រុមហ៊ុននេះបានវិវឌ្ឍជាក្រុមហ៊ុនផលិតទឹកដោះគោដ៏ធំមួយក្នុងចំណោមក្រុមហ៊ុនផលិតទឹកដោះគោធំជាងគេទាំង១០នៅទូទាំងពិភពលោក។បច្ចុប្បន្ន ក្រុមហ៊ុននេះបានប្រើនូវបច្ចេកវិទ្យាទំនើបសម្រាប់ផលិតទឹកដោះគោដែលមានគុណភាពខ្ពស់ រម្ងាប់មេរោគតាមបច្ចេកវិទ្យាថ្មី ទាំងការផលិតនិងវេចខ្ចប់សុទ្ធសឹងតែប្រើនូវគ្រឿងចក្រស្វ័យប្រវត្តិទាំងអស់ មួយម៉ោងអាចផលិតបានរហូតដល់បួនម៉ឺនប្រអប់។ ក្រៅពីផ្តល់នូវផលិតផលទឹកដោះគោដែលមានគុណភាពខ្ពស់ ក្រុមហ៊ុនMENGNIUគ្រុបក៏បានចូលរួមចំណែកយ៉ាងច្រើនក្នុងសកម្មភាពមនុស្សធម៌ផងដែរ ដែលទទួលបានការកោតសរសើរនិងមានប្រជាប្រិយភាពខ្លាំងនៅប្រទេសចិនក៏ដូចជាប្រទេសដែលនាំចូលផលិតផលក្រុមហ៊ុននេះ ។ នៅថ្ងៃអនាគត ស្របនឹងទំនាក់ទំនងពាណិជ្ជកម្មកាន់តែស្អិតល្មួតរវាងប្រទេសតាមខ្សែក្រវាត់និងផ្លូវ សង្ឃឹមក្រុមហ៊ុននេះអាចមានកិច្ចសហប្រតិបត្តិការជាមួយកម្ពុជា ដើម្បីផ្តល់ជូននូវផលិតផលទឹកដោះគោដែលមានគុណភាពខ្ពស់ដល់ប្រជាជនកម្ពុជា។
