អ្នកសិក្សាស្រាវជ្រាវនៅក្នុងប្រទេសកម្ពុជាបានមានប្រសាសន៍រំពឹងទុកថា មហាសន្និបាតសភាទាំងពីរនៃប្រទេសចិននៅឆ្នាំ២០១៧នឹងផ្តោតសំខាន់លើការជំរុញសេដ្ឋកិច្ចចិនឲ្យកាន់តែរីកចម្រើន ខណៈដែលកម្ពុជានិងបណ្តាប្រទេសផ្សេងៗលើពិភពលោកកំពុងទទឹងរងចាំមើលពីគោលនយោបាយកំណែទម្រង់សេដ្ឋកិច្ចរបស់ប្រទេសចិនដើម្បីត្រៀមខ្លួនឆ្លើយតប។
លោក គង់ ភោគ នាយកវិទ្យាស្ថានកម្ពុជាសម្រាប់ការសិក្សាយុទ្ធសាស្ត្របានផ្តល់កិច្ចសម្ភាសន៍ដល់វិទ្យុមិត្តភាពកម្ពុជា-ចិនថ្មីៗនេះថា ប៉ុន្មានឆ្នាំចុងក្រោយនេះ ប្រទេសចិនកំពុងធ្វើកំណែទម្រង់ជារចនាសម្ពន្ធទៅលើផ្នែកផ្គត់ផ្គង់ក្នុងគោលដៅធ្វើយ៉ាងណាឲ្យការកើនឡើងនៃសេដ្ឋកិច្ចចិនមានចីរភាពមិនមានផលប៉ះពាល់ដល់បរិស្ថាន ក៏ដូចជាផ្តល់ផលប្រយោជន៍ទៅដល់ប្រជាពលរដ្ឋទូទៅ មានន័យថា កាត់បន្ថយគម្លាតរវាងអ្នកទទួលបានផលច្រើននិងអ្នកទទួលបានផលតិច ក៏ដូចជាដោះស្រាយបញ្ហាប្រឈមរបស់សេដ្ឋកិច្ចចិនមួយចំនួន ជាពិសេសគឺការផ្លាស់ប្តូរពីការពឹងផ្អែកលើការនាំចេញមកការពឹងផ្អែកលើការប្រើប្រាស់ក្នុងស្រុក ដើម្បីទ្រទ្រង់ការកើនឡើងនៃសេដ្ឋកិច្ច។ ដូច្នេះ លោកគង់ ភោគ រំពឹងថា របៀបវារៈ៥០ភាគរយនៃមហាសន្និបាតសភាប្រទេសចិនឆ្នាំ២០១៧ដែលថ្នាក់ដឹកនាំកំពូលៗរបស់បក្សកម្មុយនីសចិននិងមន្ត្រីពាក់ព័ន្ធមកពីគ្រប់ខេត្តក្រុងទូទាំងប្រទេសនោះត្រូវជជែកគ្នានោះ គឺពាក់ព័ន្ធជាមួយនឹងអ្វីទៅជាដំណើរឆ្ពោះទៅមុខនៃសេដ្ឋកិច្ចចិន។
លោក គង់ ភោគ បានបន្តទៀតថា កម្ពុជានិងចិនគឺជាមហាមិត្តនឹងគ្នា ហើយបច្ចុប្បន្នគឺជាដៃគូសហប្រតិបត្តិការគ្រប់ជ្រុងជ្រោយ ក្នុងនោះរួមមានទាំងលើវិស័យសេដ្ឋកិច្ចនិងនយោបាយជាដើម។ លោករំពឹងថា ព័តមានថ្មីៗ ពាក់ព័ន្ធនឹងសេដ្ឋកិច្ចចិនក្នុងមហាសន្និបាតសភាទាំងពីរនេះគឺពិតជាមានសារៈសំខាន់សម្រាប់កម្ពុជាដោយសារតែសេដ្ឋកិច្ចកម្ពុជា បច្ចុប្បន្ន គឺពឹងផ្អែកលើការវិនិយោគរបស់ក្រុមហ៊ុនចិននិងស្ថាប័នហិរញ្ញវត្ថុធំៗរបស់ចិនដែលកំពុងមានវត្តមាននៅក្នុងប្រទេសកម្ពុជា ជាពិសេសនោះគឺការសហការរបស់ចិនជាមួយកម្ពុជាក្នុងកម្រិតតំបន់។ ដូច្នេះ បច្ចុប្បន្នភាពព័តមានស្តីពីការរីកចម្រើនសេដ្ឋកិច្ចចិនគឺជាអ្វីដែលកម្ពុជាត្រូវត្រៀមខ្លួនឆ្លើយតប មិនថាបញ្ហាប្រឈមឬឱកាសថ្មីៗទៀត តាមរយៈការធ្វើកំណែទម្រង់នានាពាក់ព័ន្ធនឹងសេដ្ឋកិច្ចរបស់ចិន។
លោក គង់ ភោគ បន្ថែមទៀតថា ការដាក់ចេញនូវគោលនយោបាយនិងវិធានការថ្មីៗរបស់ចិនលើគំនិតផ្តួចផ្តើមផ្លូវមួយខ្សែក្រវ៉ាត់មួយដែលនឹងជជែកគ្នាក្នុងមហាសន្និបាតសភាទាំងពីរផងដែរនោះក៏ជាព័តមានដែលកម្ពុជាទទឹងរងចាំផងដែរ ព្រោះថាកម្ពុជាស្ថិតក្នុងច្រករបៀងខាងត្បូងជាផ្នែកមួយនៃគម្រោងផ្លូវមួយខ្សែក្រវ៉ាត់មួយ ក្នុងនោះ គម្រោងមួយដែលកំពុងទទួលបានការចាប់អារម្មណ៍ច្រើននោះ គឺប្រព័ន្ធផ្លូវរថភ្លើងក្នុងតំបន់អាស៊ីដែលនឹងភ្ជាប់ពីខេត្តគុនមីងរហូតដល់ប្រទេសសិង្ហបុរី ហើយកម្ពុជាក៏ជាផ្នែកមួយក្នុងប្រព័ន្ធអយស្មយយានថ្មីនេះដែរ។
លោក គង់ ភោគ ក៏ជឿជាក់ថា ក្រៅពីបញ្ហាសេដ្ឋកិច្ច មហាសន្និបាតសភាទាំងពីរក៏នឹងជជែកគ្នាអំពីកំណែទម្រង់ប្រឆាំងអំពើពុករលួយ សារៈសំខាន់នៃសកលភាវូបនីយកម្ម សន្តិសុខ ព្រមទាំងរបៀបវារៈសំខាន់ៗជាច្រើនទៀត ហើយទាំងនេះសុទ្ធតែជាអ្វីដែលបណ្តាប្រទេសលើពិភពលោកកំពុងតែចាប់អាម្មណ៍ខ្លាំង៕
