រសៀលថ្ងៃទី២ខែមីនា មហាសន្និបាតលើកទី៥នីតិកាលទី១២នៃសភាប្រឹក្សានយោបាយប្រជាជនទូទាំងប្រទេសចិនបានបើកធ្វើសន្និសីទប្រកាសព័ត៌មាននៅវិមានសភាប្រជាជន លោក Wang Guoqing អ្នកនាំពាក្យព័ត៌មាននៃមហាសន្និបាតបានឆ្លើយសំនួររបស់អ្នកសារព័ត៌មានចិននិងបរទេស ។ លោក Wang Guoqing ប្រកាសថា មហាសន្និបាតលើកទី៥នីតិកាលទី១២នៃសភាប្រឹក្សានយោបាយប្រជាជនទូទាំងប្រទេសចិនកំណត់សម្ពោធបើកនៅវេលាម៉ោង៣រសៀលថ្ងៃទី៣ខែមីនានៅវិមានសភាប្រជាជន ហើយបិទសម័យប្រជុំនៅព្រឹកថ្ងៃទី១៣ខែមីនា ។ បច្ចុប្បន្ន ការងារត្រៀមបម្រុងគ្រប់បែបយ៉ាងបានធ្វើរួចហើយ ។
ពេលនិយាយអំពីបញ្ហាសមុទ្រចិនខាងត្បូង លោក Wang Guoqing បានថ្លែងថា ប្រទេសចិនក្នុងឋានៈជាប្រទេសពាណិជ្ជកម្មដ៏សំខាន់និងជាប្រទេសនៅតាមបណ្តោយសមុទ្រចិនខាងត្បូងធំបំផុតលើពិភពលោក គឺកាន់តែយកចិត្តទុកដាក់នឹងសេរីភាពនិងសន្តិសុខនៃនាវាចរណ៍នៅសមុទ្រចិនខាងត្បូងជាងប្រទេសណាៗទាំងអស់ ។ ប្រទេសចិនគាំពារយ៉ាងម៉ឺងម៉ាត់នូវសេរីភាពនៃនាវាចរណ៍របស់ប្រទេសនានាដែលមាននៅសមុទ្រចិនខាងត្បូងតាមច្បាប់អន្តរជាតិ ហើយបានបង្កើតយន្តការសហប្រតិបត្តិការជាមួយប្រទេសជាច្រើន ដើម្បីធានាសន្តិសុខនាវាចរណ៍នៅផ្លូវទឹកសមុទ្រចិនខាងត្បូង ។
