ប្រទេសចិនមានផែនការបង្កើតគណៈកម្មាធិការត្រួតពិនិត្យនិងគ្រប់គ្រងធនាគារនិងការធានារ៉ាប់រងប្រទេសចិន ដើម្បីបង្កើនការបង្ការនិងគ្រប់គ្រងហានិភ័យហិរញ្ញវត្ថុ

យោងតាមគម្រោងស្តីពីកំណែទម្រង់ស្ថាប័នក្រុមប្រឹក្សាកិច្ចការរដ្ឋចិនដែលត្រូវដាក់ជូនមហាសន្និបាតលើកទីមួយនៃសភាតំណាងប្រជាជនទូទាំងប្រទេសចិននីតិកាលទី១៣ពិនិត្យនិងពិភាក្សាបានឲ្យដឹងថា ក្រុមប្រឹក្សាកិច្ចការរដ្ឋចិនមានផែនការបង្កើតគណៈកម្មាធិការត្រួតពិនិត្យនិងគ្រប់គ្រងធនាគារនិងការធានារ៉ាប់រងប្រទេសចិន ដើម្បីបង្ការនិងដោះស្រាយហានិភ័យហិរញ្ញវត្ថុ ការពារសិទ្ធិនិងផលប្រយោជន៍ស្របច្បាប់របស់អ្នកប្រើប្រាស់ផ្នែកហិរញ្ញវត្ថុ និងគាំពារស្ថិរភាពហិរញ្ញវត្ថុ ។

គម្រោងលើកឡើងថា នឹងរួមបញ្ចូលគ្នានូវតួនាទីនៃគណៈកម្មាធិការត្រួតពិនិត្យនិងគ្រប់គ្រងធនាគារប្រទេសចិននិងគណៈកម្មាធិការត្រួតពិនិត្យនិងគ្រប់គ្រងការធានារ៉ាប់រងប្រទេសចិន បង្កើតគណៈកម្មាធិការត្រួតពិនិត្យនិងគ្រប់គ្រងធនាគារនិងការធានារ៉ាប់រងប្រទេសចិនក្នុងឋានៈជាស្ថាប័នក្រោមឱវាទរបស់ក្រុមប្រឹក្សាកិច្ចការរដ្ឋចិន ។