របាយការណ៍ការងាររដ្ឋាភិបាល
ថ្លែងក្នុងមហាសន្និបាតលើកទី១នៃសភាតំណាងប្រជាជនទូទាំងប្រទេសចិននីតិកាលទី១៣
នៅថ្ងៃទី៥ខែមីនាឆ្នាំ២០១៨
លោកលីខឺឈាង នាយករដ្ឋមន្ត្រីចិន
តំណាងគ្រប់រូប៖
ឥឡូវនេះ ខ្ញុំសូមតាងនាមឲ្យក្រុមប្រឹក្សាកិច្ចការរដ្ឋចិន ធ្វើរបាយការណ៍អំពីការងាររដ្ឋាភិបាលក្នុងរយៈពេល៥ឆ្នាំកន្លងទៅ ជូនចំពោះអង្គមហាសន្និបាតនិងដាក់ចេញទិសដៅការងារសម្រាប់ឆ្នាំនេះ សូមអង្គមហាសន្និបាតពិនិត្យពិភាក្សាហើយសូមសមាជិកនៃសភាប្រឹក្សានយោបាយប្រជាជនទូទាំងប្រទេសចិនលើកជាមតិយោបល់ផងដែរ។
១ ការរំលឹកឡើងវិញអំពីការងារ៥ឆ្នាំកន្លងទៅ
៥ឆ្នាំកន្លងទៅនេះ កម្លាំងជាក់ស្តែងនៃសេដ្ឋកិច្ចចិនបានឈានដល់កម្រិតថ្មី ។ ផលិតផលក្នុងស្រុកសរុបបានកើនឡើងពី៥៤ទ្រីលានយាន់ប្រាក់ចិនដល់៨២,៧ទ្រីលានយាន់ប្រាក់ចិន ទំហំកើនឡើងស្មើនឹង៧,១ភាគរយ សមាមាត្រក្នុងទំហំសេដ្ឋកិច្ចពិភពលោកបានកើនឡើងពី១១,៤ភាគរយដល់ប្រហែល១៥ភាគរយ អត្រារួមវិភាគទានចំពោះកំណើនសេដ្ឋកិច្ចពិភពលោកលើសពី៣០ភាគរយ ។ ចំណូលហិរញ្ញវត្ថុបានកើនឡើងពី១១,៧ទ្រីលានយាន់ប្រាក់ចិនដល់១៧,៣ទ្រីលានយាន់ប្រាក់ចិន ។ តម្លៃប្រើប្រាស់របស់ប្រជាពលរដ្ឋគិតជាមធ្យមក្នុង១ឆ្នាំៗកើនឡើង១,៩ភាគរយ គឺបានរក្សាក្នុងកម្រិតទាបបង្គួរ ។ ដោយឡែកឱកាសការងារថ្មីនៅតាមទីក្រុងនិងជនបទមានជាង៦៦លាននាក់ ។
