ក្នុងខណៈពេលបើកធ្វើសមាជបក្សកុម្មុយនិស្តចិនលើកទី ១៩ លោក Xiong Bo ឯកអគ្គរដ្ឋទូតចិនប្រចាំនៅប្រទេសកម្ពុជាបានផ្តល់បទសម្ភាសន៍ជាមួយវិទ្យុមិត្តភាពកម្ពុជា-ចិននិងទីភ្នាក់ងារសារព័ត៌មានXinhuaនៅក្រុងភ្នំពេញ លោកថ្លែងថា ប្រទេសចិននិងកម្ពុជានឹងសម្រេចបាននូវការតភ្ជាប់គ្នាផ្នែកយុទ្ធសាស្ត្រអភិវឌ្ឍន៍និងទស្សនៈអភិវឌ្ឍន៍ ក៏ដូចជា រូបមន្តអភិវឌ្ឍន៍និងកត្តាអភិវឌ្ឍន៍ ពោលគឺទំនាក់ទំនងទ្វេភាគីនឹងឈានទៅកាន់ទិសដៅក្នុងភាពជាដៃគូសហប្រតិបត្តិការជាយុទ្ធសាស្ត្របែបថ្មីគ្រប់ជ្រុងជ្រោយបន្ទាប់ពីសមាជបក្សកុម្មុយនិស្តចិនលើកទី ១៩ ។
លោកXiongBo បានបញ្ជាក់ថា សម្តេចហ៊ុនសែន ប្រធានគណបក្សប្រជាជនកម្ពុជាដែលជាបក្សកាន់អំណាចនៃប្រទេសកម្ពុជា និងជានាយករដ្ឋមន្រ្តីកម្ពុជាបានផ្ញើសារជូនគណបក្សកុម្មុយនិស្តចិនដើម្បីជូនពរការបើកធ្វើប្រកបដោយជោគជ័យនូវសមាជបក្សកុម្មុយនិស្តចិនលើកទី ១៩ ហើយជឿជាក់ថា ប្រទេសចិនប្រាកដជាអាចសម្រេចគោលដៅតស៊ូស្តីពី"សតវត្សរ៍ចំនួនពីរ"ជាមិនខាន ។ រីឯសម្តេចសាយ ឈុំ អនុប្រធាននៃគណបក្សប្រជាជនកម្ពុជានិងជាប្រធានព្រឹទ្ធសភាកម្ពុជាក៏មានការរំពឹងទុកដែរថា ប្រទេសចិនអាចចាត់បញ្ជូនគណៈប្រតិភូទៅកាន់ប្រទេសកម្ពុជាបន្ទាប់ពីសមាជបក្សកុម្មុយនិស្តចិនលើកទី ១៩ ដើម្បីផ្សព្វផ្សាយពីស្មារតីនៃសមាជលើកនេះ។ ក្រៅពីនេះ ឥស្សរជនជាច្រើនរូបក្នុងមជ្ឈដ្ឋានគណបក្ស នយោបាយ និងយោធានៃប្រទេសកម្ពុជាក៏បានថ្លែងពីក្តីសង្ឃឹមក្នុងការរៀនសូត្រពីបទពិសោធន៍អភិវឌ្ឍន៍ប្រទេសជាតិរបស់ចិន ដើម្បីសកម្មជំរុញនិងធ្វើឲ្យមានភាពកាន់តែស៊ីជម្រៅនូវកិច្ចផ្លាស់ប្តូរបទពិសោធន៍ផ្នែកអភិបាលកិច្ចរវាងប្រទេសទាំងពីរ ។
