នៅយប់ថ្ងៃទី ១៦ ខែតុលា មជ្ឈមណ្ឌលព័ត៌មាននៃសមាជបក្សកុម្មុយនិស្តចិនលើកទី ១៩ បានរៀបចំពិធីជប់លៀងនៅក្រុងប៉េកាំង និងមានវត្តមានរបស់អ្នកសារព័ត៌មានជាតិនិងអន្តរជាតិជាង ៥០០រូប។
លោកHuang Kunming ប្រធានក្រុមការងារព័ត៌មាននៃសមាជបក្សកុម្មុយនិស្តចិនលើកទី ១៩ បានថ្លែងថា សមាជបក្សកុម្មុយនិស្តចិនលើកទី ១៩ នឹងមានភាពកាន់តែបើកទូលាយសម្រាប់ស្វាគមន៍ប្រព័ន្ធសារព័ត៌មានជាតិនិងអន្តរជាតិក្នុងការយកបទសម្ភាសន៍ ដែលនឹងរៀបចំធ្វើសន្និសីទប្រកាសព័ត៌មាននៃអ្នកនាំពាក្យព័ត៌មាននិងពិធីបដិសណ្ឋារកិច្ចសម្រាប់អ្នកសារព័ត៌មានឲ្យបានច្រើន ក៏ដូចជាបើកច្រកផ្លូវសម្រាប់សម្ភាសន៍តំណាងបក្សដែលអញ្ជើញចូលរួមសមាជ ផ្តល់ភាពងាយស្រួលដល់អ្នកសារព័ត៌មានទាំងក្នុងការបំពេញការងារនិងស្នាក់នៅ ដើម្បីធានាដល់អ្នកសារព័ត៌មានជាតិនិងអន្តរជាតិឲ្យបំពេញភារកិច្ចយកបទសម្ភាសន៍អំពីសមាជបក្សកុម្មុយនិស្តចិនលើកទី ១៩ បានយ៉ាងល្អប្រសើរ៕
