នៅយប់ថ្ងៃទី ១៤ ខែមេសា លោកWangYi រដ្ឋមន្រ្តីក្រសួងការបរទេសចិនបានធ្វើកិច្ចសន្ទនាតាមទូរស័ព្ទជាមួយលោកSergei Lavrov រដ្ឋមន្រ្តីក្រសួងការបរទេសរុស្ស៊ី ។ ភាគីទាំងពីរបានធ្វើការផ្លាស់ប្តូរមតិយោបល់ជាយុទ្ធសាស្រ្តអំពីបញ្ហាអន្តរជាតិនិងក្នុងតំបន់ដែលយកចិត្តទុកដាក់ដូចគ្នា ដូចជាទំនាក់ទំនងទេ្វភាគី បញ្ហាស៊ីរីនិងឧបទ្វីបកូរ៉េជាដើម។
សំដៅចំពោះស្ថានការណ៍ស៊ីរី លោកWangYi បានមានប្រសាសន៍ថា ឯករាជ្យភាពអធិបតេយ្យភាព និងបូរណភាពដែនដីត្រូវទទួលបានការគោរព ។ រឿងជាបន្ទាន់នាពេលបច្ចុប្បន្នគឺធ្វើការពិនិត្យអង្កេតដោយឯករាជ្យ យុត្តិធម៌ និងជំនាញចំពោះរឿងអាវុធគីមីក្នុងប្រទេសស៊ីរី ហើយជឿជាក់ថា ការពិតនឹងត្រូវលាតត្រដាងជាសាធារណៈ ។
ចំណែកឯស្ថានការណ៍ឧបទ្វីបកូរ៉េ លោកWangYi បានថ្លែងទៀតថា ការបង្ការកុំឲ្យឧបទ្វីបកូរ៉េកើតមានសង្រ្គាមនិងភាពច្របូកច្របល់ គឺសមស្របនឹងផលប្រយោជន៍រួមរបស់ប្រទេសចិននិងរុស្ស៊ី ។ ការធ្វើឲ្យបណ្តាភាគីនានាវិលមកកាន់តុចរចា ជាគោលបំណងរួមរបស់ប្រទេសចិននិងរុស្ស៊ី ។
ជាការឆ្លើយតប លោក Lavrov បានថ្លែងថា ការប្រាស្រ័យទាក់ទងជាន់ខ្ពស់រវាងប្រទេសរុស្ស៊ីនិងចិនមានភាពស្អិតល្មួត ការជឿទុកចិត្តលើគ្នាជាយុទ្ធសាស្រ្តមានភាពកាន់តែស៊ីជម្រៅពីមួយថ្ងៃទៅមួយថ្ងៃ ហើយកិច្ចសហប្រតិបត្តិការលើគ្រប់វិស័យទទួលបានសមិទ្ធផលច្រើនផងដែរ ៕