ថ្ងៃទី ១១ ខែមីនា ពេលនិយាយដល់ទស្សនកិច្ចនៅប្រទេសហ្វីលីពីននាប៉ុន្មានថ្ងៃមុន លោក Zhong Shan រដ្ឋមន្ត្រីក្រសួងពាណិជ្ជកម្មនៃប្រទេសចិនបានថ្លែងថា ភាគីទាំងពីរចិននិងហ្វីលីពីនបានកំណត់ថានឹងសហការគ្នាកសាងសួនឧស្សាហកម្មនៅប្រទេសហ្វីលីពីន ។
ក្នុងសនិ្នសីទសារព័ត៌មានរបស់មហាសន្និបាតលើកទី ៥ នៃសភាតំណាងប្រជាជនទូទាំងប្រទេសចិននីតិកាលទី ១២ ដែលបើកធ្វើនៅថ្ងៃទី ១១ ខែមីនា លោក Zhong Shan បានថ្លែងថា ទស្សនកិច្ចនៅប្រទេសហ្វីលីពីននាពេលកន្លងទៅនេះ គឺជាទស្សនកិច្ចលើកដំបូងបន្ទាប់ពីលោកបានឡើងកាន់មុខតំណែងជារដ្ឋមន្ត្រីក្រសួងពាណិជ្ជកម្មចិន ពិតមែនតែទស្សនកិច្ចនេះមានរយៈពេលខ្លីក៏ដោយ ប៉ុន្តែគឺជាទស្សនកិច្ចមួយអនុវត្តជាក់ស្តែងនិងស្មោះត្រង់ ថែមទាំងទទួលបានសមិទ្ធផលជាផ្លែផ្កា ។ ក្នុងរយៈពេលបំពេញទស្សនកិច្ច ប្រទេសចិននិងហ្វីលីពីនបានឈានដល់មតិឯកភាពគ្នាជាច្រើនខាងផ្នែកពាណិជ្ជកម្ម ការបណ្តាក់ទុន កិច្ចកសាងសួនឧស្សាហកម្ម កិច្ចកសាងហេដ្ឋារចនាសម័្ពន្ធធមៗ ព្រមនិងការរៀបចំពាណិជ្ជកម្មពហុភាគីក្នុងតំបន់ជាដើម ។
លោក Zhong Shan បានថ្លែងទៀតថា ជឿជាក់ថាក្រោមការយកចិត្តទុកដាក់កម្រិតខ្ពស់ពីប្រមុខរដ្ឋនៃប្រទេសទាំងពីរ ទំនាក់ទំនងរវាងចិននិងហ្វីលីពីនពិតជានឹងទទួលបានការអភិវឌ្ឍកាន់តែល្អនិងកាន់តែលឿន កិច្ចសហប្រតិបតិ្តការលើវិស័យសេដ្ឋកិច្ចនិងពាណិជ្ជកម្មរវាងប្រទេសទាំងពីរក៏នឹងទទួលបានសមិទ្ធផលកាន់តែស្តុកស្តម្ភ ហើយរួមចំណែកកាន់តែច្រើនថែមទៀតដល់ការអភិវឌ្ឍខាងសេដ្ឋកិច្ចនិងសង្គមកិច្ចរបស់ប្រទេសទាំងពីរ ៕
