ថ្ងៃទី១៧ខែមករា លោកប្រធានរដ្ឋចិន Xi Jinping បានអញ្ជើញចូលរួមពិធីសម្ពោធបើកសន្និសីទប្រចាំឆ្នាំ២០១៧នៃវេទិកាសេដ្ឋកិច្ចពិភពលោកនៅមជ្ឈមណ្ឌលសន្និសីទអន្តរជាតិ ព្រមទាំងថ្លែងសុន្ទរកថាដែលមានចំណងជើងថា រួមគ្នាទទួលខុសត្រូវភារកិច្ចនៃយុគសម័យ និងរួមគ្នាជំរុញការអភិវឌ្ឍន៍នៃទូទាំងពិភពលោក ។
លោក Xi Jinping បានគូសបញ្ជាក់ក្នុងសុន្ទរកថាសំខាន់ថា ការអភិវឌ្ឍន៍របស់ប្រទេសចិនជាឱកាសនៃពិភពលោក ប្រទេសចិនជាអ្នកទទួលផលប្រយោជន៍ពីសេដ្ឋកិច្ចសកលភាវូបនីយកម្ម ហើយក៏ជាអ្នករួមវិភាគទានផងដែរ ។ សេដ្ឋកិច្ចប្រទេសចិនកើនឡើងយ៉ាងឆាប់រហ័ស បានផ្តល់កម្លាំងជំរុញយ៉ាងខ្លាំងដល់ស្ថិរភាពនិងកំណើននៃសេដ្ឋកិច្ចទូទាំងពិភពលោក ។
លោក Xi Jinping បានវែកញែកថា លោកបានផ្តើមគំនិតអំពីខ្សែក្រវាត់មួយនិងផ្លូវមួយជាង៣ឆ្នាំមកហើយ ដោយបានទទួលការឆ្លើយតបនិងគាំទ្រយ៉ាងសកម្មពីប្រទេសនិងអង្គការអន្តរជាតិជាង១០០ ហើយមានប្រទេសនិងអង្គការអន្តរជាតិជាង៤០បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការជាមួយប្រទេសចិនផងដែរ ។
