ព្រឹកថ្ងៃទី៧ខែកញ្ញា តាមម៉ោងតំបន់ លោកលីខឺឈាំងនាយករដ្ឋមន្រ្តីចិនបានរួមជាមួយអ្នកដឹកនាំនៃប្រទេសជាសមាជិកអាស៊ានចូលរួមពិធីរំលឹកខួបទី២៥នៃការបង្កើតទំនាក់ទំនងសម្រាប់កិច្ចសន្ទនារវាងចិន–អាស៊ាននៅមជ្ឈមណ្ឌលសន្និសីទជាតិឡាវ។
លោកលីខឺឈាំងបានបង្ហាញថា ប្រទេសចិននិងអាស៊ានបានបង្កើតទំនាក់ទំនងសម្រាប់កិច្ចសន្ទនាកាលពីឆ្នាំ១៩៩១។រយៈពេល២៥ឆ្នាំកន្លងទៅនេះ គឺជារយៈពេល២៥ឆ្នាំដែលការកសាងទំនុកចិត្តខាងនយោបាយរវាងចិននិងអាស៊ានត្រូវបានបង្កើនឥតឈប់ឈរ ហើយក៏ជារយៈពេល២៥ឆ្នាំដែលកិច្ចសហប្រតិបត្តិការជាក់ស្តែងរវាងចិននិងអាស៊ានទទួលបានសមិទ្ធផលជាផ្លែផ្កាយ៉ាងច្រើនផងដែរ។
ភាគីចិនជានិច្ចកាលបានចាត់ទុកអាស៊ានជាកម្លាំងដ៏សំខាន់សម្រាប់គាំពារសុខសន្តិភាពក្នុងតំបន់ ជំរុញការធ្វើសមាហរណកម្មក្នុងតំបន់និងការអភិវឌ្ឍដោយពហុប៉ូលរបស់ពិភពលោក ហើយនឹងបន្តចាត់ទុកអាស៊ានជាទិសដៅអាទិភាពសម្រាប់កិច្ចការទូតជាមួយប្រទេសជុំវិញ ព្រមនិងគាំទ្រឋានៈជាស្នូលរបស់អាស៊ានក្នុងកិច្ចសហប្រតិបត្តិការតំបន់ ក៏ដូចជាគាំទ្រអាស៊ានឲ្យពង្រីកតួនាទីកាន់តែធំក្នុងកិច្ចការអន្តរជាតិនិងតំបន់ផងដែរ។
ថ្នាក់ដឹកនាំរបស់ប្រទេសអាស៊ានដែលចូលរួមកិច្ចប្រជុំបានសកម្មវាយតម្លៃចំពោះសមិទ្ធផលគួរឲ្យកត់សម្គាល់ដែលទទួលបានក្នុងរយៈពេល២៥ឆ្នាំតាំងពីអាស៊ាននិងចិនបង្កើតទំនាក់ទំនងសម្រាប់កិច្ចសន្ទនាមក ព្រមនិងពោរពេញទៅដោយជំនឿចិត្តចំពោះអនាគតនៃទំនាក់ទំនងរវាងភាគីទាំង២៕
