នាយករដ្ឋមន្ត្រី​ចិនជួប​ពិភាក្សាការងារ​​ជាមួយ​​នាយករដ្ឋមន្ត្រី​កម្ពុជា​
2016-03-24 15:32:13  cri  Web Editor:Li Qingli

   ល្ងាច​ថ្ងៃទី ២៣ ខែ​មីនា​ នៅក្រុង​ SanYa លោក LiKeqiang នាយករដ្ឋមន្ត្រី​ចិន​បាន​ជួប​ពិភាក្សាការងារ​​ជាមួយ​សម្តេចហ៊ុន សែន​ នាយករដ្ឋមន្ត្រី​កម្ពុជា​ដែល​អញ្ជើញ​ទៅ​ចូលរួម​សន្និសីទ​ថ្នាក់ដឹកនាំ​ស្តីពី​កិច្ចសហប្រតិបត្តិការ​ឡានឆាង-មេគង្គលើកដំបូង​និង​វេទិកា​BoAo សម្រាប់​អាស៊ី​ប្រចាំ​ឆ្នាំ ២០១៦ ។

 លោក LiKeqiang បាន​ថ្លែង​ថា​ ប្រទេស​ចិននិង​កម្ពុជា​ជា​មិត្តភក្តិ​ល្អ​ដែល​អាច​ជឿទុកចិត្ត​គ្នា​បាន​​ ការ​​អភិវឌ្ឍ​នៃទំនាក់ទំនង​រវាងប្រទេស​ទាំងពីរ​មាននិន្នាការ​ដ៏​ល្អប្រសើរ​ ដោយ​ឡែក​ ប្រទេស​ទាំងពីរ​បាន​ផ្តល់ការគាំទ្រដល់​​គ្នា​ទៅវិញទៅមក​លើ​​បញ្ហាសំខាន់ៗ​​ដែលភាគីទាំងពីរ​យកចិត្តទុកដាក់ដូចគ្នា​ ។ លោក​រំពឹងទុកថា​ ប្រទេស​ទាំងពីរ​អាច​បន្ត​រក្សា​ការ​ប្រាស្រ័យ​ទាក់ទង​គ្នា​​រវាង​អ្នកដឹកនាំ​ជាន់ខ្ពស់​ ធ្វើឲ្យមានភាព​ស៊ីជម្រៅនូវ​​កិច្ចសហប្រតិបត្តិការ​ជាក់ស្តែង​លើ​គ្រប់វិស័យ​ ក្នុងន័យ​ជំរុញ​ឲ្យ​កិច្ចសហប្រតិបត្តិការជា​​យុទ្ធសាស្ត្រ​គ្រប់ជ្រុងជ្រោយ​រវាង​ចិននិង​កម្ពុជា​ទទួលបាន​សមិទ្ធផល​កាន់តែ​ច្រើន​ថែមទៀត​ ។​ លោក​បាន​បញ្ជាក់ទៀត​ផង​ថា​ ប្រទេស​ចិននិងកម្ពុជា​ត្រូវ​ពន្លឿន​​ការតភ្ជាប់​គ្នាជា​​យុទ្ធសាស្ត្រ​​ ជំរុញ​កិច្ចសហប្រតិបត្តិការ​ផ្នែកសមត្ថភាព​​ផលិតកម្ម​និង​ការវិនិយោគ​ ព្រម​និង​បង្កើន​កិច្ចសហប្រតិបត្តិការ​ផ្នែក​សេដ្ឋកិច្ច​និង​​ពាណិជ្ជកម្ម​ ដើម្បី​ធ្វើឲ្យ​ប្រជាជននៃ​​ប្រទេស​ទាំងពីរ​អាច​ទទួលបាន​ផលប្រយោជន៍​កាន់តែ​ច្រើន​ពី​កិច្ចសហប្រតិបត្តិការ​រវាង​ចិននិង​កម្ពុជា​ ។​ រដ្ឋាភិបាល​ចិន​នឹង​បន្ត​ផ្តល់ការ​គាំទ្រ​ដល់​ការអភិវឌ្ឍ​សេដ្ឋកិច្ចនិង​​សង្គម​របស់កម្ពុជា​ ហើយ​លើក​ទឹកចិត្តនិង​ជំរុញ​​ឲ្យ​សហគ្រាស​ចិនកាន់តែ​ច្រើន​ទៀត​ទៅធ្វើ​​ការវិនិយោគ​នៅ​​ប្រទេស​កម្ពុជា​ផងដែរ​ ។

ដោយឡែក​ សម្តេច​ហ៊ុន សែន​បាន​សំដែង​ការអបអរសាទរ​ចំពោះ​សន្និសីទ​ថ្នាក់ដឹកនាំ​ស្តីពី​កិច្ចសហប្រតិបត្តិការ​ឡានឆាង-មេគង្គ​លើកដំបូងដែល​​ទទួលបាន​ជោគជ័យ​​ដ៏​​គាប់ប្រសើរ​ ព្រម​និង​បង្ហាញ​ថា​ ប្រទេសកម្ពុជា​គាំទ្រ​ការកសាង​សហគមន៍​រួម​វាសនា​តែមួយ​​សម្រាប់​ប្រទេស​ឡានឆាង-មេគង្គ។ ប្រទេសកម្ពុជាមាន​ក្តី​សោមនស្ស​រីករាយ​យ៉ាង​ខ្លាំង​ដែល​មើល​ឃើញ​ការអភិវឌ្ឍ​ទំនាក់ទំនង​រវាង​កម្ពុជា​និង​ចិន​​ ព្រម​និង​សូម​​ថ្លែង​អំណរគុណ​ចំពោះ​ប្រទេស​ចិន​ដែល​បាន​ផ្តល់​ការគាំទ្រ​និង​ជំនួយ​ឧបត្ថម​ដល់​ប្រទេស​កម្ពុជា​ ក្រៅពីនេះ​ កម្ពុជា​ក៏​សូម​​ស្វាគមន៍​សហគ្រាស​ចិនបន្ថែម​​​​ការវិនិយោគ​​លើ​ការកសាង​ហេដ្ឋារចនាសម្ព័ន្ធ​ និងវិស័យ​កសិកម្ម​របស់​កម្ពុជា​ផងដែរ ។

 

 

 

ទាក់ទង​ជាមួយ​យើង​ខ្ញុំ