នៅព្រឹកថ្ងៃទី ២២ ខែវិច្ឆិកា តាមម៉ោងម៉ាឡេស៊ី លោកLi Keqiang នាយករដ្ឋមន្រ្តីចិនបានអញ្ជើញចូលរួមពិធីប្រកាសសេចក្តីថ្លែងការណ៍រួមនៃថ្នាក់ដឹកនាំអំពីកិច្ចព្រមព្រៀងទំនាក់ទំនងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ហៅកាត់ថាRCEPនៅមជ្ឈមណ្ឌលសន្និសីទអន្តរជាតិក្រុងគូឡាលំពួរ ។
សេចក្តីថ្លែងការណ៍បានចង្អុលបង្ហាញថា ថ្នាក់ដឹកនាំនៃបណ្តាប្រទេសRCEP បានអបអរសាទរចំពោះការចរចាបានទទួលការវិវឌ្ឍន៍ដោយមានលក្ខណៈជាក់ស្តែង ។ កិច្ចព្រមព្រៀងRCEP មានសារៈសំខាន់ចំពោះការលើកកម្ពស់កម្រិតជីវភាពរបស់ប្រជាជន និងការជំរុញការអភិវឌ្ឍនៃសេដ្ឋកិច្ចក្នុងតំបន់ ។ ហើយមានអំណោយផលដល់ការជំរុញការអភិវឌ្ឍសេដ្ឋកិច្ចដោយមានយុត្តិធម៌ និងបង្កើនការប្រាស្រ័យទាក់ទងផ្នែកសេដ្ឋកិច្ចរវាងបណ្តាប្រទេស ។ ថ្នាក់ដឹកនាំទាំងអស់បានទាមទារឲ្យក្រុមចរចាពន្លឿនកិច្ចការរបស់ខ្លួន ដើម្បីខិតខំបញ្ចប់ការចរចាក្នុងឆ្នាំ ២០១៦ ៕
