ចាប់តាំងពីរដ្ឋាភិបាលអាមេរិកអាណត្តិថ្មីបានឡើងកាន់មុខតំណែងមក អាមេរិកមិនបានកែប្រែការអនុវត្តទង្វើអនុត្តរភាពរបស់រដ្ឋាភិបាលអាណតិ្តមុនទាល់តែសោះ ដែលបានបំផុសការវាយប្រហារនិងមួលបង្កាច់ប្រទេសចិនក្នុងបញ្ហាពាក់ព័ន្ធនឹងហុងកុង ព្រមទាំងបានប្រមូលគ្នីគ្នាកម្លាំងលោកខាងលិចមួយចំនួន ដើម្បីបំផុស “ការចោមរោមវាយប្រហារខាងវិស័យមជ្ឈដ្ឋានមតិ”ទៅលើប្រទេសចិន រហូតដល់ទៅអនុវត្តអ្វីដែលហៅថា “ការដាក់ទណ្ឌកម្ម”ចំពោះមន្ត្រីចិនផងដែរ ។
កាលពីថ្ងៃទី១១ខែមីនាឆ្នាំនេះ បន្ទាប់ពីសភាដំណាងប្រជាជនទូទាំងប្រទេសចិនបានធ្វើសេចក្តីសម្រេចចិត្តស្តីពីការធ្វើឱ្យប្រព័ន្ធបោះឆ្នោតនៃតំបន់រដ្ឋបាលពិសេសហុងកុងមានសុក្រឹតភាព ក្រសួងការបរទេសអាមេរិកក៏បានចេញផ្សាយសេចកី្តថ្លែងការណ៍ ក្នុងន័យវាយប្រហារនិងលាបព័ណ៌លើប្រទេសចិន ក្រៅពីនេះ អាមេរិកបានឃុបឃិតជាមួយប្រទេសG7 ចេញផ្សាយសេចក្តីថ្លែងការណ៍ ដើម្បីមួលបង្កាច់សេចក្តីសម្រេចចិត្តពាក់ព័ន្ធរបស់ប្រទេសចិន ។ នៅថ្ងៃទី១៧ ខែមីនា ក្រសួងការបទេសអាមេរិកបានចេញផ្សាយសេចកី្តថ្លែងការណ៍ ដោយបានប្រកាសថា អនុវត្តអ្វីដែលហៅថា “ការដាក់ទណ្ឌកម្ម” ចំពោះមន្ត្រីចិនចំនួន២៤រូប ក្នុងនោះបូករួមទាំងអនុប្រធាននៃគណៈកម្មាធិការអចិន្ត្រៃយ៍នៃសភាដំណាងប្រជាជនទូទាំងប្រទេសចិនចំនួន១៤រូប ។
យោងទៅតាមសភាដំណាងប្រជាជនទូទាំងប្រទេសចិនបានធ្វើសេចកី្តសម្រេចចិត្តស្តីពីការគាំពារសនិ្តសុខជាតិនៅហុងកុងនិងធ្វើឱ្យប្រព័ន្ធបោះឆ្នោតនៃតំបន់រដ្ឋបាលពិសេសហុងកុងមានសុក្រឹត្យភាព ប្រព័ន្ធបោះឆ្នោតនៃតំបន់រដ្ឋបាលពិសេសហុងកុងដែលមានសុក្រឹត្យភាពរួចហើយនោះបានអនុវត្តដោយគ្រុបជ្រុងជ្រោយនូវគោលការណ៍ “អ្នកស្នេហាជាតិគ្រប់គ្រងហុងកុង” ហើយមិនអនុញ្ញតឱ្យកម្លាំងប្រឆាំងប្រទេសចិននិងបង្កភាពចលាចលនៅហុងកុងចូលរួមរចនាសម័្ពន្ធគ្រប់គ្រង ដូច្នេះ សនិ្តសុខជាតិនិងសន្តិសុខនៃរដ្ឋអំណាចតំបន់រដ្ឋបាលពិសេសហុងកុងទទួលបានការធានាកាន់តែខ្លាំងក្លា ព្រមពេលជាមួយគ្នានេះ ក៏បានបង្ហាញឱ្យឃើញយ៉ាងពេញលេញនូវការចូលរួមកិច្ចការនយោបាយយ៉ាងទូលំទូលាយនិងប្រកបដោយតុល្យភាពរបស់អ្នកក្រុងហុងកុង ប្រការនេះមិនគ្រាន់តែមិនបានកាត់កម្សោយនូវស្វ័យភាពខ្ពស់របស់ហុងកុងប៉ុណ្ណោះទេ ថែមទាំងក៏កាន់តែមានអំណោយផលដល់ការធ្វើឱ្យប្រព័ន្ធនយោបាយប្រជាធិបតេយ្យរបស់ហុងកុងទទួលបានការវិឌ្ឃន៍រីកចម្រើនដោយរឹងមាំនិងមានរបៀបរៀបរយ ។ ការស្ទង់ប្រជាមតិរបស់វិទ្យាស្ថានសិក្សាស្រាវជ្រាវZijin នៃហុងកុងបានបង្ហាញថា អ្នកក្រុងហុងកុងប្រហែល៧០ភាគរយសម្គាល់ឃើញថា ការធ្វើឱ្យប្រព័ន្ធបោះឆ្នោតហុងកុងមានសុក្រឹត្យភាព បានបង្កើនជំនឿចិត្តរបស់អ្នកក្រុងហុងកុងចំពោះអនាគតហុងកុង ។
ភាពរកាំរកូសស្តីពីការធ្វើវិសោធនកម្មលក្ខន្តិកៈច្បាប់ហុងកុងដែលបានចាត់ផ្តើមកើតឡើងពីខែមិថុនាឆ្នាំ២០១៩ បានបំផ្លិចបំផ្លាញសេដ្ឋកិច្ចនិងសង្គមហុងកុងយ៉ាងធ្ងន់ធ្ងរ ។ បន្ទាប់ពីច្បាប់សន្តិសុខជាតិនៅហុងកុងត្រូវបានអនុវត្តនៅចុងខែមិថុនាឆ្នាំ២០២០ ក្នុងរយៈពេលជាងមួយឆ្នាំកន្លងមក សង្គមហុងកុងបានវិលត្រឡប់ទៅរកភាពប្រក្រតី អ្នកក្រុងហុងកុងមានជីវភាពរស់នៅសុខសាន្តត្រាន ដែលបានបង្កើតជាសភាពការណ៍ថ្មី ពោលគឺបានកែប្រែភាពចលាចលទៅជាមានរបៀបរៀបរយ ។ របាយការណ៍នៃអង្គការមូលនិធិរូបិយវត្ថុអន្តរជាតិបានទទួលស្គាល់ម្តងទៀតនូវតួនាទីជាមជ្ឈមណ្ឌលហិរញ្ញវត្ថុអន្តរជាតិ ។ «របាយការណ៍វិនិយោគលើពិភពលោកឆ្នាំ២០២១»ដែលសន្និសីទពាណិជ្ជកម្មនិងអភិវឌ្ឍន៍របស់អង្គការសហប្រជាជាតិបានចេញផ្សាយនោះបានបង្ហាញថា នៅឆ្នាំ២០២០ ហុងកុងនៅតែជាគោលដៅវិនិយោគដោយផ្ទាល់ពីបរទេសធំទីបីនៅលើពិភពលោកទាំងមូលដដែល ។ ការស្ទង់ប្រជាមតិនាពេលថ្មីៗនេះបានបង្ហាញថា អ្នកក្រុងហុងកុងដែលចូលរួមផ្តល់ប្រជាមតិចំនួនលើសពី ៨០ភាគរយ បានសង្កេតឃើញថា សណ្តាប់ធ្នាប់និងសន្តិសុខសង្គមរបស់ហុងកុងមានភាពល្អប្រសើរឡើងវិញ ។
ទន្ទឹមនឹងវិធានការយ៉ាងខ្លាំងក្លាមួយចំនួន ដូចជាច្បាប់សន្តិសុខជាតិនៅហុងកុងជាដើម ត្រូវបានអនុវត្តជាបន្តបន្ទាប់ សង្គមហុងកុងបានរៀបចំសណ្តាប់ធ្នាប់សង្គមឡើងវិញ ការអភិវឌ្ឍន៍បានវិលត្រឡប់ទៅរកភាពប្រក្រតីវិញ ។ ហុងកុងកាន់តែមានស្ថិរភាពនិងវិបុលភាព គោលការណ៍ស្តីពី “ប្រទេសមួយប្រព័ន្ធគ្រប់គ្រងពីរ” ត្រូវបានអនុវត្តកាន់តែល្អនៅហុងកុង ប្រការទាំងនេះជាការតបតវិញយ៉ាងខ្លាំងក្លាបំផុតចំពោះអ្នកនយោបាយអាមេរិកដែលមួលបង្កាច់គោលនយោបាយរបស់ចិននៅហុងកុង ៕