រសៀលថ្ងៃទី៣ខែសីហា លោកវ៉ាងអ៊ីសមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីការបរទេសចិនបានអញ្ជើញចូលរួមកិច្ចប្រជុំរវាងរដ្ឋមន្រ្តីការបរទេសអាស៊ាននិងចិន ជប៉ុន កូរ៉េខាងត្បូង(១០បូក៣)តាមប្រព័ន្ធវីដេអូ។
ថ្លែងក្នុងកិច្ចប្រជុំ លោកវ៉ាងអ៊ីបានលើកឡើងថា បច្ចុប្បន្ននេះ ការរីករាលដាលនៃជំងឺឆ្លងនៅទូទាំងពិភពលោកមានភាពកាន់តែតានតឹង ការងើបឡើងវិញនៃសេដ្ឋកិច្ចនៃប្រទេសនានាមានភាពខុសគ្នាយ៉ាងខ្លាំង ហើយការប្រឈមថ្មីបានកើតមានជាបន្តបន្ទាប់។ពួកយើងគួរតែសាមគ្គីគ្នាជាធ្លុងមួយ ដើម្បីខំប្រឹងធ្វើកិច្ចសហប្រតិបត្តិការជាក់ស្តែង ជំរុញឱ្យសេដ្ឋកិច្ចងើបឡើងវិញទាំងស្រុង ក៏ដូចជាលើកកម្ពស់ជាបន្តបន្ទាប់នូវសមត្ថភាពទប់ទល់នឹងវិបត្តិរបស់បណ្តាប្រទេសអាស៊ីបូព៌ាផងដែរ។ ក្នុងពេលជាមួយគ្នានេះ គួរតែប្រើចក្ខុវិស័យវែងឆ្ងាយ ធ្វើឱ្យយន្តការបច្ចុប្បន្នមានសុក្រឹតភាព ព្រមទាំងលើកកម្ពស់ភាពធន់និងកម្លាំងរស់រវើកនៃកិច្ចសហប្រតិបត្តិការ១០បូក៣ ក្នុងន័យរួមគ្នាគាំពារសភាពការណ៍ប្រកបដោយស្ថិរភាពនិងវិបុលភាពនៅតំបន់អាស៊ីបូព៌ាដែលដំណើរការអស់រយៈពេលជាច្រើនឆ្នាំនិងបានទទួលបានមកដោយមិនងាយនោះ។
រដ្ឋមន្រ្តីការបរទេសនៃប្រទេសជប៉ុន កូរ៉េខាងត្បូងនិងបណ្តាប្រទេសអាស៊ានបានថ្លែងថា ប្រឈមនឹងបញ្ហានៃការរីករាលដាលនៃជំងឺឆ្លងនិងការងើបឡើងវិញនៃសេដ្ឋកិច្ច ប្រទេស១០បូក៣កាន់តែត្រូវប្រកាន់ខ្ជាប់កិច្ចសហការនិងសាមគ្គីភាព ការបើកទូលាយនិងភាពបរិយាប័ន្នជាងពេលណាៗទាំងអស់ សំដៅបង្កើនទំនាក់ទនងភាពជាដៃគូរវាងគ្នានិងគ្នា ធ្វើឱ្យការតភ្ជាប់គ្នាមានភាពកាន់តែស៊ីជម្រៅ ធានាយ៉ាងជាក់លាក់ដល់ភាពរលូននៃខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ បង្កើនភាពធន់ក្នុងការទប់ទល់នឹងហានិភ័យនិងការប្រឈមគ្រប់បែបយ៉ាង ក៏ដូចជារួមគ្នាខិតខំប្រឹងប្រែងដើម្បីទទួលបានការអភិវឌ្ឍនិងវិបុលភាពក្នុងតំបន់ផងដែរ ៕
