ការប្រកួតកីឡាអូឡាំពិករដូវក្តៅលើកទី៣២បានបើកធ្វើនៅក្រុងតូក្យូ រដ្ឋធានីជប៉ុនកាលពីថ្ងៃទី២៣ ខែកក្កដា បច្ចុប្បន្ននេះ ការប្រកួតកីឡាដែលមានទ្រង់ទ្រាយធំជាងគេនៅលើពិភពលោក បាននិងកំពុងដំណើរការយ៉ាងក្តៅគគុក ។
បើប្រៀបធៀបនឹងការប្រកួតកីឡាអូឡាំពិកលើកមុនៗ ព្រឹតិ្តការណ៍ធំក្នុងការប្រកួតកីឡាអូឡាំពិកលើកនេះដែលញ៉ាំងឱ្យអ្នកផងចាប់អារម្មណ៍បំផុត គឺលោក Thomas Bach បានលើកសេចក្តីផ្តួចផ្តើមថា ដើម្បីទប់ទល់ឱ្យបានកាន់តែល្អនូវការប្រឈមបន្ទាប់ពីវិបត្តិជំងឺកូវីដ១៩បានបញ្ចប់ ស្នើឱ្យបន្ថែមពាក្យមួយគឺ “កាន់តែសាមគ្គីគ្នា” ក្នុងពាក្យស្លោកអូឡាំពិក “កាន់តែរហ័ស កាន់តែខ្ពស់និងកាន់តែខ្លាំងក្លា ” ។ សេចកី្តផ្តួចផ្តើមនេះទទួលបានការគាំទ្រពីគណៈកម្មាការប្រតិបតិ្តនៃគណៈកម្មាធិការកីឡាអូឡាំពិកអន្តរជាតិ ។ ដូចនេះ ចាប់ពីពេលនេះតទៅ ពាក្យស្លោកអូឡាំពិកបានក្លាយជា “កាន់តែរហ័ស កាន់តែខ្ពស់ កាន់តែខ្លាំងក្លា និងកាន់តែសាមគ្គីគ្នា ”។
តើហេតុអ្វីបានជាពាក្យស្លោកអូឡាំពិកដែលមានប្រវត្តិសាស្ត្រមួយរយឆ្នាំ បានបន្ថែមពាក្យ “កាន់តែសាមគ្គីគ្នា” នៅពេលនេះ ? ក៏ដូចប្រសាសន៍របស់លោក Thomas Bach ដែលបានលើកឡើងថា “សព្វថ្ងៃនេះ ពិភពលោកបានពឹងផ្អែកគ្នាទៅវិញទៅមក អង្គភាពណាមួយមិនអាចដោះស្រាយការប្រឈមដោយឯកឯងនោះឡើយ ” ។ បច្ចុប្បន្ននេះ ជំងឺកូវីដ១៩បាននិងកំពុងរីករាលដាលនៅទូទាំងពិភពលោក សេដ្ឋកិច្ចសកលមានភាពថមថយចុះ និងតែងតែកើតមានអាកាសធាតុអាក្រក់បំផុត នៅលើពិភពលោក គ្មានប្រទេសណាមួយអាចយកសុខតែខ្លួនឯងនោះទេ ហើយក៏គ្មានសមត្ថភាពអាចទប់ទល់ដោយឯកឯងនោះឡើយ បណ្តាប្រទេសនានានៅលើពិភពលោកចាំបាច់ត្រូវរៀនចេះ “រួមរស់នៅជាមួយគ្នា”និង “កាន់តែសាមគ្គីគ្នា” នេះហើយក៏ជាអត្ថន័យស្នូលដែលគណៈកម្មាធិការកីឡាអូឡាំពិកអន្តរជាតិបានបន្ថែមពាក្យ “កាន់តែសាមគ្គីគ្នា” នៅពីក្រោយ “កាន់តែរហ័សកាន់តែខ្ពស់ និងកាន់តែខ្លាំងក្លា” ហ្នឹងឯង ។
អាចនិយាយបានថា ទីលានប្រកួតកីឡាអូឡាំពិក ក៏ជាគំរូនៃការប្រកួតប្រជែងនិងការអភិវឌ្ឍរបស់សង្គមមនុស្សជាតិផងដែរ ។ ក្នុងបរិបទបម្រែបម្រួលដ៏ខ្លាំងក្លាដែលមិនធ្លាប់មានក្នុងរយៈពេល១រយឆ្នាំ មនុស្សជាតិកាន់តែត្រូវផ្តួចផ្តើមនូវស្មារតីអូឡាំពិក ពោលគឺ ឆ្នើម មិត្តភាព ការគោរពគ្នានិងសាមគ្គីគ្នាជាងពេលណាៗទាំងអស់ ហើយត្រូវបំបាត់ចោលឧបសគ្គនិងការប៉ះទង្គិចគ្រប់បែបយ៉ាងតាមរយៈសកម្មភាពកីឡា ក៏ដូចជាលើកទឹកចិត្តឱ្យប្រជាជននៅលើពិភពលោកកាន់តែសាមគ្គីគ្នាផងដែរ ។
ក្នុងការប្រកួតកីឡាដែលមានទ្រង់ទ្រាយធំជាងគេនៅលើពិភពលោកលើកនេះ អត្តពលិកចិនបានខិតខំប្រឹងប្រែងយ៉ាងស្វិតស្វាញ ដើម្បីដណ្តើមបានមេដាយ ដែលបានបង្ហាញឱ្យឃើញនូវស្មារតីមានជំនឿចិត្តលើខ្លួនឯង ខិតខំប្រឹងប្រែងនិងមិនចេះចុះចាញ់ ហើយក៏បានបង្ហាញពីឆន្ទៈយ៉ាងមុតមាំរបស់អត្តពលិកចិនស្តីពីការប្រកាន់ខ្ជាប់សុបិនរបស់ខ្លួន រួមសុខរួមទុក្ខ និងសាមគ្គីគ្នាជាធ្លុងមួយតាមរយៈការអនុវត្តជាក់ស្តែង ។ នេះហើយក៏ជាកម្លាំងខាងស្មារតីរបស់ប្រជាជនចិន ដែលស្វែងរកឱកាសថ្មីក្នុងវិបតិ្ត និងត្រួសត្រាយសភាពការណ៍ថ្មីក្នុងភាពបម្រែបម្រួលផងដែរ ។ ក្នុងការប្រយុទ្ធស្លាប់រស់ជាមួយជំងឺកូវីដ១៩ ប្រជាជនចិនចំនួន១ពាន់៤រយលាននាក់បានរួមសុខរួមទុក្ខនិងសាមគ្គីគ្នាជាធ្លុងមួយ ដែលបានបង្កើតជាខ្សែការពារដ៏រឹងមាំក្នុងការបង្ការនិងគ្រប់គ្រងជំងឺឆ្លង ។ បន្ទាប់ពីការរីករាលដាលនៃជំងឺឆ្លងត្រូវបានគ្រប់គ្រង សេដ្ឋកិច្ចចិនទទួលបានការវិវឌ្ឍរីកចម្រើនដោយនឹងនរ ផលិតកម្មនិងជីវភាពរស់នៅមានភាពប្រក្រតីឡើងវិញជាសន្សឹមៗ ។ ព្រមពេលជាមួយគ្នានេះ ប្រទេសចិនបានរួមសហការជាមួយបណ្តាប្រទេសនានាលើពិភពលោក ហើយបានរួមចំណែកជាពុទ្ធិចិននិងកម្លាំងចិនក្នុងការប្រយុទ្ធប្រឆាំងនឹងជំងឺកូវីដ១៩ជាសកល ។ ប្រទេសចិនទទួលបានសមិទ្ធផលដ៏ធំសម្បើមក្នុងការប្រយុទ្ធប្រឆាំងនឹងជំងឺកូវីដ១៩ បានបំបែកកំណត់ត្រាថ្មីក្នុងប្រវត្តិសាស្ត្រប្រយុទ្ធប្រឆាំងនឹងជំងឺរបស់មនុស្សជាតិ ។
និយាយចំពោះគណៈប្រតិភូកីឡាចិននិងប្រទេសចិនទាំងមូល ការប្រកួតកីឡាអូឡាំពិកក្រុងតូក្យូលើកនេះមិនត្រឹមតែជាទីលានប្រកួតកីឡាប៉ុណ្ណោះទេ ថែមទាំងក៏ជាទីតាំងសម្រាប់ធ្វើបទបង្ហាញផងដែរ ។ ដោយសារបន្ទាប់ពីបញ្ចប់ការប្រកួតកីឡាអូឡាំពិកក្រុងតូក្យូមិនដល់កន្លះឆ្នាំ ប្រទេសចិននឹងរៀបចំធ្វើការប្រកួតកីឡាំអូឡាំពិករដូវរងារនៅក្រុងប៉េកាំង ។ ដូច្នេះ អត្តពលិកចិនបានចាត់ទុកការប្រកួតកីឡាអូឡាំពិកក្រុងតូក្យូជាឱកាស ក្នុងន័យបញ្ចេញសម្លេងរបស់រដ្ឋាភិបាលចិនទៅកាន់ពិភពលោក ពោលគឺប្រទេសចិនមានជំនឿចិត្ត និងមានសមត្ថភាពក្នុងការរៀបចំឱ្យបានល្អនូវការប្រកួតកីឡាអូឡាំពិករដូវរងាក្រុងប៉េកាំងដែលប្រកបដោយភាពបៃតង សុវត្ថិភាពនិងភាពអស្ចារ្យ ។
ពីការប្រកួតកីឡាអូឡាំពិកក្រុងប៉េកាំងកាលពីឆ្នាំ២០០៨ ដល់ការប្រកួតកីឡាអូឡាំពិករដូវរងាក្រុងប៉េកាំងឆ្នាំ២០២២ ក្នុងរយៈពេលជាង១០ឆ្នាំកន្លងមក កម្លាំងជាតិចម្រុះនិងឥទ្ធពលលើផ្ទៃអន្តរជាតិរបស់ប្រទេសចិនត្រូវបានលើកកម្ពស់យ៉ាងខ្លាំង ។ ទស្សនៈរបស់ប្រទេសចិនក្នុងការរៀបចំធ្វើការប្រកួតកីឡាអូឡាំពិករដូវរងា ជាការបន្តនិងផ្សព្វផ្សាយឱ្យបានទូលំទូលាយនៃគំនិតផ្តួចផ្តើមស្តីពីការរួមគ្នាកសាង “ខ្សែក្រវាត់និងផ្លូវ”ដែលលើកឡើងដោយប្រទេសចិននិងទស្សនៈស្តីពីការជំរុញការអភិវឌ្ឍបៃតងនិងជានិរន្តរភាព ។ ក្នុងនាមជាម្ចាស់ផ្ទះ ប្រទេសចិនស្វាគមន៍អត្តពលិកនៃពិភពលោកទាំងមូលទៅកាន់ប្រទេសចិន ដើម្បីបង្ហាញពីភាពអស្ចារ្យរបស់ខ្លួននិងសម្រេចសុបិនរបស់ខ្លួនលើឆាកនៃការប្រកួតកីឡាអូឡាំពិករដូវរងា ក៏ដូចជាដកបទពិសោធន៍ពីការប្រកួតកីឡាអូឡាំពិករដូវរងាដែលមិនអាចបំភ្លេចបានផងដែរ ។ បច្ចុប្បន្ននេះ ពិភពលោកកាន់តែត្រូវការស្មារតីកីឡា និងស្មារតីអូឡាំពិក ដើម្បីលើកទឹកចិត្តឱ្យប្រជាជនសាមគ្គីគ្នា ទប់ទល់នឹងការប្រឈមដោយសកម្ម និងរួមគ្នាត្រួសត្រាយអនាគតកាន់តែល្អបវរ ដូច្នេះ ការប្រកួតកីឡាអូឡាំពិករដូវរងាក្រុងប៉េកាំង នឹងមានអត្ថន័យកាន់តែពិសេសទៀងផង ។
ស្មារតីអូឡាំពិកថ្មីដែល “កាន់តែសាមគ្គីគ្នា” នឹងក្លាយជាចង្កៀងបង្ហាញផ្លូវមួយ សម្រាប់ណែនាំប្រជាជនទូទាំងពិភពលោកឱ្យប្រមូលផ្តុំជាមួយគ្នា ដើម្បីរួមគ្នាទប់ទល់នឹងការលំបាកនិងការប្រឈម និងទទួលស្វាគមន៍អនាគតកាន់តែភ្លឺស្វាង ។ដូចនេះ ពាក្យ“កាន់តែសាមគ្គីគ្នា” កាន់តែមានតម្លៃក្នុងខណៈពេលនេះ ៕