សំដៅចំពោះប្រទេសលោកខាងលិច ដូចជាសហរដ្ឋអាមេរិកជាដើមដែលធ្វើឱ្យបញ្ហាតាមដានរកប្រភពដើមនៃវីរុសកូវីដ ១៩ ទៅជាបញ្ហានយោបាយ លោក Wahid Majroh រដ្ឋមន្រ្តីស្តីទីនៃក្រសួងសុខាភិបាលអាហ្វហ្កានីស្ថានបានថែ្លងក្នុងពេលផ្តល់បទសម្ភាសន៍ជាមួយប្រព័ន្ធសារព័ត៌មាននាពេលថ្មីៗកន្លងទៅនេះថា ការតាមដានរកប្រភពដើមនៃវីរុសកូវីដ ១៩ មិនត្រឹមតែមានផ្តល់ភស្តុតាងផែ្នកវិទ្យាសាស្ត្រដ៏រឹងមាំប៉ុណ្ណោះទេ ថែមទាំងក៏ត្រូវធ្វើការតាមដានរកប្រភពដើមក្នុងតំបន់កាន់តែច្រើនផងដែរ ។ ប្រសិនបើការតាមដានរកប្រភពដើមក្នុងតំបន់តែមួយ នោះក៏មិនអាចទទួលបានសេចក្តីសន្និដ្ឋានដោយគ្រប់ជ្រុងជ្រោយនោះទេ ។
លោក Wahid Majroh បានបន្តថែ្លងថា យើងគួរតែជឿជាក់លើរបាយការណ៍សិក្សាស្រាវជ្រាវចម្រុះរវាងចិននិងអង្គការសុខភាពពិភពលោកដែលចេញផ្សាយដោយអង្គការសុខភាពពិភពលោកនៅចុងខែមីនា ឆ្នាំនេះ ហើយប្រព័ន្ធសុខាភិបាលនិងអ្នកវិទ្យាសាស្ត្រទាំងឡាយគួរតែធ្វើការវិនិច្ឆ័យលើការតាមដានរកប្រភពដើមនៃវីរុសកូវីដ ១៩ ដោយពឹងផ្អែកលើរបាយការណ៍នេះ ។
លោក Wahid Majroh បានលើកឡើងថា ប្រទេសចិនបានប្រកាន់ខ្ជាប់នូវអាកប្បកិរិយាបើកចំហនិងមានតម្លាភាពលើបញ្ហាអំពីការតាមដានរកប្រភពដើមនៃវីរុសកូវីដ ១៩ ព្រមទាំងចូលរួមយ៉ាងសកម្មក្នុងកិច្ចសហប្រតិបត្តិការតាមដានរកប្រភពដើមនៃវីរុសនៅទូទាំងពិភពលោក ។ លោកសម្គាល់ឃើញថា គំនិតបើកចំហនិងមានតម្លាភាព គឺជាគោលការណ៍សំខាន់សម្រាប់បណ្តាប្រទេសនានាធ្វើកិច្ចសហការគ្នាប្រកបដោយប្រសិទ្ធភាព ក្នុងន័យ តាមដានរកប្រភពដើមនៃវីរុស ៕
