នាពេលថ្មីៗកន្លងទៅនេះ លេខាធិការដ្ឋាននៃអង្គការសុខភាពពិភពលោកបានលើកឡើងផែនការការងារតាមដានរកប្រភពដើមនៃវីរុសកូវីដ១៩ក្នុងដំណាក់កាលទីពីរ ដែលបានផ្ទុយនឹងគោលជំហររបស់ប្រទេសចិននិងប្រទេសជាច្រើនក្នុងបញ្ហាតាមដានរកប្រភពដើមនៃវីរុសកូវីដ១៩ ។ បច្ចុប្បន្ននេះ មានប្រទេសចំនួន៥៥ បានផ្ញើសារលិខិតជូនអគ្គនាយកអង្គការសុខភាពពិភពលោក ដើម្បីអំពាវនាវឱ្យប្រកាន់ខ្ជាប់ការតាមដានរកប្រភពដើមនៃវីរុសដោយវិទ្យាសាស្ត្រ ហើយប្រឆាំងការលេងល្បែងនយោបាយ ។
ប្រទេសចិនបានរាយការណ៍ពីការរីករាលដាលនៃជំងឺកូវីដ១៩ជូនចំពោះអង្គការសុខភាពពិភពលោកមុនគេបង្អស់ បានកាន់អាកប្បកិរិយាបើកចំហនិងមានតម្លាភាពជាប់រហូតក្នុងបញ្ហាតាមដានរកប្រភពដើមនៃវីរុសកូវីដ១៩ ហើយបានអញ្ជើញអ្នកជំនាញនៃអង្គការសុខភាពពិភពលោកទៅប្រទេសចិនពីរលើកដើម្បីធ្វើការសិក្សាស្រាវជ្រាវអំពីការតាមដានរកប្រភពដើមនៃវីរុស ។ កាលពីថ្ងៃទី៣០ ខែមីនា ក្រុមពិនិត្យអង្កេតចម្រុះរបស់អង្គការសុខភាពពិភពលោកនិងប្រទេសចិនបានចេញផ្សាយរបាយការណ៍ជាផ្លូវការ ដោយបានបង្ហាញថា វីរុសកូវីដ១៩ “គ្មានលទ្ធភាព” ធ្លាយចេញពីបន្ទប់ពិសោធន៍របស់ចិននោះទេ ។
ក្នុងនាមជា “ប្រទេសទទួលបរាជ័យធ្ងន់ធ្ងរបំផុតនៅលើពិភពលោកក្នុងការប្រយុទ្ធប្រឆាំងនឹងជំងឺឆ្លង ” ការងារប្រយុទ្ធប្រឆាំងនឹងជំងឺឆ្លងរបស់អាមេរិកមានការចោទជាមន្ទិលសង្ស័យច្រើនបំផុត បានរកឃើញករណីឆ្លងជំងឺ និងករណីស្លាប់ច្រើនជាងគេ ដូច្នេះ គួរតែក្លាយជាចំណុចសំខាន់នៃការងារតាមដានរកប្រភពដើមនៃវីរុសក្នុងដំណាក់កាលក្រោយ ។
កាលពីខែមិនា ឆ្នាំ២០២០ លោក Robert Redfield អតិតប្រធាននៃមជ្ឈមណ្ឌលបង្ការនិងគ្រប់គ្រងជំងឺឆ្លងរបស់អាមេរិកធ្លាប់ទទួលស្គាល់ថា ក្នុងចំណោមករណីស្លាប់នៅរដូវកើតជំងឺគ្រុនផ្តាសាយដែលចាប់ផ្តើមពីខែកញ្ញាឆ្នាំ២០១៩ តាមពិតទៅ ជំងឺដែលមានករណីមួយចំនួនបានឆ្លង គឺជំងឺកូវីដ១៩ ។ វិទ្យាស្ថានជាតិសុខាភិបាលរបស់អាមេរិកបានចេញផ្សាយរបាយការន៍សិក្សាស្រាវជ្រាវមួយច្បាប់នៅខែមិថុនាឆ្នាំនេះបានឱ្យដឹងថា ចាប់ពីខែធ្នូឆ្នាំ២០១៩មកម្ល៉េះ វីរុសកូវីដ១៩ក៏បានចាប់ផ្តើមរីករាលដាលនៅអាមេរិករួចហើយ ។ បើសិនជាអាមេរិកសម្គាល់ឃើញថា ខ្លួនបានកាន់អាកប្បកិរិយាបើកចំហនិងមានតម្លាភាពដូចប្រទេសចិនអ៊ីចឹង នោះគួរតែបើកចំហបន្ទប់ពិសោធន៍Fort Detrick ឱ្យអ្នកជំនាញអន្តរជាតិចូលទៅធ្វើការស៊ើបអង្កេតនិងសិក្សាស្រាវជ្រាវ ។
ជាងនេះទៅទៀត ក្នុងបន្ទប់ពិសោធន៍ជីវសាស្ត្ររបស់អាមេរិកចំនួនជាង២០០កន្លែងដែលពាសពេញនៅទូទាំងពិភពលោកទាំងមូល តើមានការសម្ងាត់អ្វីខ្លះដែលមិនអាចបើកចំហ ?
ប្រឈមនឹងបញ្ហាចោទជាមន្ទិលសង្ស័យជាច្រើនក្នុងការងារប្រយុទ្ធប្រឆាំងនឹងជំងឺកូវីដ១៩របស់អាមេរិក មានប្រទេសកាន់តែច្រើនឡើងៗបានអំពាវនាវថា ប្រទេសដែលត្រូវទទួលការស៊ើបអង្កេតអំពីការតាមដានរកប្រភពដើមនៃវីរុសបំផុត គឺអាមេរិកហ្នឹងឯង ។ អត្ថបទរបស់កាសែត «The Korea Times» របស់កូរ៉េខាងត្បូងបានវែកញែកថា បើសិនជាមានការចាំបាច់ត្រូវបំផុសការងារតាមដានរកប្រភពដើមនៃវីរុសកូវីដ១៩ជាសកល នោះអាមេរិកគួរតែទទួលការស៊ើបអង្កេតជាសំខាន់ ។ កាសែត« Rebelión »របស់ប្រទេសអេស្ប៉ាញបានចេញផ្សាយអត្ថបទដោយបានលើកឡើងថា អាមេរិកនៅមិនទាន់បំភ្លឺនិងពន្យល់អំពីទង្វើគួរឱ្យសង្ស័យជាច្រើននៅឡើយ មានតែបំភ្លឺពីការពិតនៃបញ្ហាចោទជាមន្ទិលសង្ស័យទាំងនេះ នោះទើបអាចរកបាននូវប្រភពដើមនៃវីរុសកូវីដ១៩ ។
បើសិនជាក្នុងបញ្ហាតាមដានរកប្រភពដើមនៃវីរុសកូវីដ១៩ ប្រទេសចិនយល់ព្រមទទួលការស៊ើបអង្កេត តែអាមេរិកមិនព្រមធ្វើការស៊ើបអង្កេត នោះតើការសិក្សាស្រាវជ្រាវបែបនេះមានស្មារតីវិទ្យាសាស្ត្រអ្វីខ្លះ ? បើសិនជាការងារតាមដានរកប្រភពដើមនៃវីរុសកូវីដ១៩មិនអាចប្រព្រឹតិ្តទៅប្រកបដោយសមភាព នោះវាដូចជាគ្មានអត្ថន័យទាល់តែសោះ ៕