យប់ថ្ងៃទី២២ ខែមេសា លោក ស៊ី ជីនភីង ប្រធានរដ្ឋចិនបានចូលរួមកិច្ចប្រជុំកំពូលអាកាសធាតុ ព្រមទាំងថ្លែងសុន្ទរកថាគន្លឹះតាមការអញ្ជើញ ។ បន្ទាប់មក ក្រសួងការបរទេសចិនបានរៀបចំសន្និសីទសារព័ត៌មានអំពីកិច្ចប្រជុំនេះ ។ លោក Ma Zhaoxu អនុរដ្ឋមន្ត្រីការបរទេសចិនបានធ្វើជាអធិបតីក្នុងសន្និសីទ ព្រមទាំងបានធ្វើបទបង្ហាញពីសភាពការណ៍និងលទ្ធផលសំខាន់ៗនៃកិច្ចប្រជុំ ។
លោក Ma Zhaoxu បានថ្លែងថា ទស្សនាទានស្តីពីការកាត់បន្ថយការបញ្ចេញការបូនបន្ទាប់ពីឡើងដល់ចំណុចកំពូលនៅមុនឆ្នាំ២០៣០ និងអព្យាក្រឹតភាពកាបូនដែលប្រទេសចិនបានប្រកាសនោះ ជាសេចកី្តសម្រេចចិត្តយុទ្ធសាស្ត្រសំខាន់របស់ប្រទេសចិន ក្នុងន័យបំពេញតម្រូវការក្នុងស្រុកសម្រាប់ជំរុញការអភិវឌ្ឍន៍ជានិរន្តរភាព និងបានបង្ហាញពីទំនួលខុសត្រូវរបស់ប្រទេសចិនក្នុងការបង្កើតសហគមន៍រួមវាសនាតែមួយរបស់មនុស្សជាតិ ព្រមទាំងបានឆ្លុះបញ្ចាំងពីតម្រូវការខ្ពស់បំផុតនៃ «កិច្ចព្រមព្រៀងក្រុងប៉ារីស» ដែលបង្ហាញឱ្យឃើញនូវការប្តេជ្ញាចិត្តខ្លាំងបំផុតរបស់ប្រទេសចិនក្នុងការទប់ទល់នឹងបម្រែបម្រួលអាកាសធាតុ ។ ប្រទេសចិននឹងប្រើពេល៣០ឆ្នាំប៉ុណ្ណោះ ដើម្បីសម្រេចរឿងទាំងពីរនេះ ប្រការនេះមានន័យថា ប្រទេសចិននឹងសម្រេចបាននូវការកាត់បន្ថយខ្លាំងបំផុតនៅលើពិភពលោកលើវិស័យបញ្ចេញកាបូន ហើយនឹងប្រើពេលខ្លីបំផុតក្នុងប្រវតិ្តសាស្ត្រនៃសកល ដើម្បីសម្រេចបាននូវការកាត់បន្ថយការបញ្ចេញការបូនបន្ទាប់ពីឡើងដល់ចំណុចកំពូលនិងអព្យាក្រឹតភាពកាបូន ដើម្បីសម្រេចបាននូវគោលដៅនេះត្រូវធ្វើនវានុវត្តន៍ក្នុងប្រព័ន្ធសេដ្ឋកិច្ចសង្គមប្រកបដោយភាពទូលំទូលាយនិងស៊ីជម្រៅ ៕
