វ៉ាក់សាំងជាអាវុធដ៏សក្តិសិទ្ធិសម្រាប់ប្រយុទ្ធប្រឆាំងនឹងវីរុស ហើយក៏ជាក្តីសង្ឃឹមសម្រាប់ការជួយស្រោចស្រង់អាយុជីវិតផងដែរ។ ប្រទេសចិនបានសន្យាមុនគេថានឹងចាត់ទុកវ៉ាក់សាំងជាផលិតផលសាធារណៈជាសកល ខិតខំលើកកម្ពស់ភាពអាចប្រើប្រាស់បាននិងភាពអាចរ៉ាប់រងបាននៃវ៉ាក់សាំងនៅប្រទេសកំពុងអភិវឌ្ឍន៍។ ជាមួយគ្នានេះដែរ ប្រទេសចិនបានធ្វើកិច្ចសហប្រតិបត្តិការអន្តរជាតិផ្នែកវ៉ាក់សាំងយ៉ាងសកម្ម។ អ្នកជំនាញនៃមុខរបរវ៉ាក់សាំងបានថ្លែងថា វ៉ាក់សាំងបង្ការកូវីដ១៩របស់ប្រទេសចិនបានជួយសហគមន៍អន្តរជាតិក្នុងការប្រយុទ្ធប្រឆាំងនឹងជំងឺឆ្លង ដែលបានចាក់គ្រឹះដ៏រឹងមាំសម្រាប់មុខរបរផលិតវ៉ាក់សាំងរបស់ប្រទេសចិនក្នុងការវិវឌ្ឍរីកច្រើនទៅរកភាពខ្លាំងក្លា ក៏ដូចជាឈានចូលទីផ្សារអន្តរជាតិផងដែរ។
គិតមកទល់ថ្ងៃទី ៣០ខែមីនា ឆ្នាំ២០២១ ប្រទេសចិនបានផ្តល់ជំនួយវ៉ាក់សាំងដល់ប្រទេសចំនួន៨០ និងអង្គការអន្តរជាតិចំនួន ៣ ហើយបាននាំចេញវ៉ាក់សាំងទៅកាន់ប្រទេសជាង៤០ទៀតផង។ លើសពីនេះទៅទៀត ប្រទេសចិនបានចូលរួមកម្មវិធីCOVAXរបស់អង្គការសុខភាពពិភពលោក ព្រមនិងបានសន្យាយ៉ាងច្បាស់លាស់ថានឹងផ្តល់នូវវ៉ាក់សាំងចំនួន ១០ លានដូសដល់ប្រទេសកំពុងអភិវឌ្ឍជាអាទិភាពដើម្បីបំពេញតាមតម្រូវការបន្ទាន់នៃប្រទេសទាំងនេះ។ មួយវិញទៀត ប្រទេសចិនក៏បានប្រកាន់អាកប្បកិរិយាបើកចំហជានិច្ចចំពោះកិច្ចសហប្រតិបត្តិការអន្តរជាតិផ្នែកវ៉ាក់សាំងផងដែរ ដោយគាំទ្រយ៉ាងសកម្មឱ្យសហគ្រាសចិនធ្វើកិច្ចសហប្រតិបត្តិការជាមួយសហគ្រាសអន្តរជាតិលើវិស័យសិក្សាស្រាវជ្រាវ ធ្វើតេស្តលើមនុស្ស និងសហការផលិតជាដើម៕