ក្នុងខណៈពេលខួបមួយឆ្នាំនៃការដែលក្រុងវូហានប្រទេសចិនដកវិធានការបិទទីក្រុងដើម្បីបង្ការនិងទប់ស្កាត់ជំងឺឆ្លង លោក RenMinghui ជំនួយការអគ្គនាយកអង្គការសុខភាពពិភពលោកទទួលបន្ទុកសេវាសុខភាពទូទៅនិងកិច្ចការជំងឺឆ្លងនិងជំងឺមិនឆ្លងនៃ អង្គការសុខភាពពិភពលោកបានថ្លែងនៅពេលផ្តល់បទសម្ភាសន៍ កាលពីថ្ងៃទី៧ ខែមេសាថា ៖ ការដែលក្រុងវូហានដកវិធានការបិទទីក្រុងជាចំណុចរបត់ដ៏សំខាន់នៃការប្រយុទ្ធនឹងជំងឺកូវីដ19របស់ចិន ក៏ដូចជាបាននាំមក នូវក្តីសង្ឃឹមដល់ពិភពលោកក្នុងការយកឈ្នះការប្រយុទ្ធនឹងជំងឺឆ្លងនៅទីបំផុតផងដែរ។
នាថ្ងៃទី៨ ខែមេសាឆ្នាំ២០២០ ទីក្រុងវូហានខេត្ត ហ៊ូប៉ី ប្រទេសចិនបានដកវិធានការបិទច្រកចេញចូលក្រុងទាំងមូល បន្ទាប់ពីបានឆ្លងកាត់រយៈពេល៧៦ ថ្ងៃដែលប្រយុទ្ធប្រឆាំងនឹងជំងឺឆ្លងយ៉ាងលំបាកលំបិន។
យោងតាមការវិភាគនៃស្ថាប័ន្ធស្រាវជ្រាវមួយចំនួនបានឱ្យដឹងថា វិធានការបិទទីក្រុងដើម្បីបង្ការនិងគ្រប់គ្រងជំងឺឆ្លងរបស់ក្រុងវូហានបានដើរតួនាទីសំខាន់ក្នុងការទប់ស្កាត់ការរីករាលដាលនៃជំងឺឆ្លងទាំងក្នុងប្រទេសចិននិងទូទាំងពិភពលោក។ ពេលជំងឺឆ្លងបានរាតត្បាតជាសកល ប្រទេសជាច្រើនដូចជាប៉ារាំង អ៊ីតាលី អេស្ប៉ាញ ឥណ្ឌាជាដើម ក៏បានចាត់វិធានការបិទទីក្រុងប្រហាក់ប្រហែលគ្នាជាបន្តបន្ទាប់ផងដែរ។
លោក RenMinghui បានបញ្ជាក់ថា វិធានការបិទទីក្រុងរបស់ក្រុងវូហាន មិនគ្រាន់តែរឹតត្បិតការចេញចូលរបស់ពលរដ្ឋប៉ុណ្ណោះទេ ក៏បូករួមទាំង ការកសាងមន្ទីរពេទ្យបណ្តោះអាសន្ន ការបង្កើនការធ្វើតេស្តក្នុងសហគមន៍ ការតាមដានស្វែងរកអ្នកដែលបានប៉ះពាល់ផ្ទាល់នឹងករណីឆ្លង ការធ្វើចត្តាឡីស័កក្នុងផ្ទះ ការរក្សាគម្លាតសុវត្ថិភាព ការពាក់ម៉ាស់ និងការលាងដៃជាដើម គឺជាវិធានការបង្ការជំងឺឆ្លងដ៏មានប្រសិទ្ធភាព។
លោកបានបញ្ជាក់ទៀតថា ការដកវិធានការបិទទីក្រុងវូហានបាននាំមកនូវក្តីសង្ឃឹមជូនពិភពលោកទាំងមូល ហើយក៏បានបង្ហាញថា ប្រឈមនឹងការផ្ទុះរាលដាលយ៉ាងកាចសាហាវនៃជំងឺឆ្លងប្រភេទថ្មីដែលកម្រឃើញក្នុងប្រវត្តិសាស្ត្រមនុស្សជាតិ ការចាត់វិធានការបង្ការនិងគ្រប់គ្រងមួយចំនួនដោយម៉ឺងម៉ាត់ គឺមានប្រសិទ្ធភាពល្អដែលបានត្រូវបញ្ជាក់ដោយប្រទេសនិងតំបន់ផ្សេងៗដែលមានចំណាត់ការប្រហាក់ប្រហែលគ្នា៕