ថ្ងៃទី៦ ខែមេសា កិច្ចប្រជុំថ្នាក់អនុរដ្ឋមន្រ្តីនៃគណៈកម្មាធិការចម្រុះនៃកិច្ចព្រមព្រៀងគ្រប់ជ្រុងជ្រោយស្តីពីបញ្ហានុយក្លេអ៊ែរអ៊ីរ៉ង់បានបើកធ្វើនៅក្រុងវីយែនប្រទេសអូទ្រីស ដើម្បីពិភាក្សាអំពីបញ្ហាជំរុញឱ្យអាមេរិកនិងអ៊ីរ៉ង់អនុវត្តកិច្ចព្រមព្រៀងឡើងវិញ។
កិច្ចប្រជុំលើកនេះធ្វើឡើងក្រោមអធិបតីភាពរបស់លោកអគ្គលេខាធិការរងនៃសេវាប្រតិបត្តិជាមួយបរទេសនៃសហភាពអឺរ៉ុប និងមានការចូលរួមពីអនុរដ្ឋមន្រ្តីការបរទេសអ៊ីរ៉ង់ និងសមភាគីរុស្ស៊ី អង់គ្លេស បារាំងនិងអាល្លឺម៉ង់ជាដើម។ លោកវ៉ាងឈួន តំណាងចិនប្រចាំជាអចិន្ត្រៃយ៍នៅអង្គការសហប្រជាជាតិក៏មានវត្តមានផងដែរ។
លោកវ៉ាងឈួនបានថ្លែងថា អតីតរដ្ឋាភិបាលអាមេរិកបានដកខ្លួនចេញពីកិច្ចព្រមព្រៀងគ្រប់ជ្រុងជ្រោយស្តីពីបញ្ហានុយក្លេអ៊ែរអ៊ីរ៉ង់ដោយឯកតោភាគី ព្រមនិងដាក់សម្ពាធក្នុងកម្រិតអតិបរមាទៅលើអ៊ីរ៉ង់ វាគឺជាដើមហេតុនៃការកើតមានភាពតានតឹងជាបន្តបន្ទាប់នៃស្ថានការណ៍នុយក្លេអ៊ែរអ៊ីរ៉ង់។ ភាគីចិនសូមគាំទ្រគណៈកម្មាធិការចម្រុះចាប់ដំណើរការរបៀបវារៈពីរ ដើម្បីសម្រេចឱ្យបានឆាប់នូវការជំរុញឱ្យអាមេរិកនិងអ៊ីរ៉ង់អនុវត្តកិច្ចព្រមព្រៀងឡើងវិញ
លោកវ៉ាងឈួនបន្ថែមទៀតថា ភាគីចិនប្រឆាំងយ៉ាងដាច់ខាតចំពោះវិធានការដាក់ទណ្ឌកម្មដោយឯកតោភាគីដែលមិនស្របច្បាប់ទាំងអស់របស់អាមេរិក ហើយចិននឹងគាំពារសិទ្ធិនិងផលប្រយោជន៍ស្របច្បាប់របស់ខ្លួនយ៉ាងមុតមាំ។ មិនថាការដាក់ទណ្ឌកម្មមិនស្របច្បាប់របស់អាមេរិកទៅលើអ៊ីរ៉ង់ក្តី ឬចំណាត់ការរបស់អាមេរិកដែលសំដៅចំពោះតួអង្គនិងបុគ្គលនៃភាគីទី៣ ក្នុងនោះ បូករួមទាំងប្រទេសចិនផងក្តី គឺសុទ្ធតែត្រូវលុបចោលភ្លាម៕
