បុណ្យឆេងម៉េងជាថ្ងៃបុណ្យប្រពៃណីរបស់ប្រទេសចិន ដែលតាមទម្លាប់នឹងសែនកុងម៉ាដើម្បីរំលឹកបុព្វការីជន។ខាងក្រោមនេះ សូមពន្យល់ពីឃ្លាកំណាព្យចិនបុរាណដ៏ល្បីមួយ ស្តីពីការធ្វើគារវកិច្ចចំពោះវីរជន ៖
tiān dì yīng xióng qì ，qiān qiū shàng lǐn rán
天地英雄气，千秋尚凛然
ដកស្រង់ពីកំណាព្យ «蜀先主庙» (នឹករំលឹកលីវប៊ី /At the Temple of Liu Bei ) និពន្ធដោយលោក លីវ យូស៊ី (Liu Yuxi) នៃរជ្ជកាលថាំង (Tang Dynasty)។
មានន័យថា ៖ ស្មារតីវីរជននៅពាសពេញមេឃនិងដី ទោះបានកន្លងផុតទៅរាប់រយឆ្នាំហើយក្តី ក៏ត្រូវគេគោរពសរសើរជាប់រហូត។
កំណាពនេះត្រូវបានចេញផ្សាយនៅប្រហែលគ.ស.ឆ្នាំ ៨២១ ។ វីរជនដែលកំណាព្យបានលើកឡើងគឺសំដៅលើ លីវប៉ី ក្នុងសម័យសាមកុក។ លីវប៉ី កើតក្នុងគ្រួសារក្រីក្រ ឋានៈទាប តែនៅទីបំផុតបានចែកទឹកដីចិនបុរាណជាមួយ ឆាវឆាវ និង សូនឈួន ឆាកជីវិតរបស់គាត់បានបង្ហាញពីគុណតម្លៃនៃឆន្ទៈរបស់វីរជន។ ឃ្លាមួយនេះបង្ហាញពីការកោតសរសើរខ្លាំងចំពោះស្មារតីវីរជន។
ស្មារតីវីរជននៅពាសពេញមេឃនិងដី ទោះបានកន្លងផុតទៅរាប់រយឆ្នាំហើយក្តី ក៏ត្រូវគេគោរពសរសើរជាប់រហូត។ ប្រជាជាតិដ៏មានក្តីសង្ឃឹម មិនត្រូវបំភ្លេចវីរជនរបស់ខ្លួនទេ ប្រទេសជាតិដ៏មានអនាគតមិនត្រូវគ្មានអ្នកឈានមុខនោះឡើយ។
លោក ស៊ី ជីនភីង ប្រធានរដ្ឋចិនគោរពនិងមានគារវកិច្ចខ្លាំងចំពោះវីរជន។ ជាច្រើនឆ្នាំកន្លងទៅនេះ ក្នុងឱកាសបុណ្យឆេងម៉េង លោកតែងតែទៅសំដែងសេចក្តីគោរពចំពោះវីរជនដែលបានពលីជីវិត ក្នុងសកម្មភាពខុសៗគ្នា លោកក៏តែងតែសង្កត់ធ្ងន់ថា ៖ យើងត្រូវគោរពវីរជន គាំពារវីរជន រៀនសូត្រតាមវីរជន ស្រឡាញ់វីរជន។
តើនរណាជាវីរជនក្នុងដួងចិត្តរបស់លោកស៊ីជីនភីង?
ពោលគឺ៖ អ្នកទាំងឡាយណាដែលបានពលីជីវិតដើម្បីដណ្តើមឯករាជ្យជាតិនិងរំដោះប្រជាជាតិ អ្នកទាំងឡាយណាដែលបានតស៊ូយ៉ាងអង់អាចក្លាហានដើម្បីឱ្យប្រជាជាតិអាចចេញផុតពីការគ្រប់គ្រងរបស់ពួកអាណានិគមនិងការឈ្លានពានពីកម្លាំងខាងក្រៅ អ្នកទាំងឡាយណាដែលបានជួយត្រួសត្រាយមាគ៌ាអភិវឌ្ឍន៍ថ្មីសម្រាប់ប្រទេសជាតិ។
តាមពិត វីរជនគឺនៅក្បែរយើង កាលណាប្រទេសជាតិត្រូវការ អ្នកដែលបានខិតខំបំពេញការងារជាប្រចាំនៅកន្លែង បានចេញមុខនៅគ្រាលំបាក ក៏ដូចមនុស្សទាំងឡាយ ដែលបានចូលរួមគាំទ្រការប្រយុទ្ធប្រឆាំងនឹងជំងឺឆ្លងនាពេលបច្ចុប្បន្ននេះ សុទ្ធតែជាវីរជន។
វីរជនជាឆ្អឹងខ្នងនៃប្រជាជាតិ ។ ហើយស្មារតីរបស់វីរជននឹងលើកទឹកចិត្តយ៉ាងខ្លាំងឱ្យយើងបន្តឈានទៅមុខ៕
