កាលពីថ្ងៃទី ៥ ខែមីនា កិច្ចប្រជុំលើកទី ៤ នៃសភាតំណាងប្រជាជនទូទាំងប្រទេសចិននីតិកាលទី ១៣ បានបើកធ្វើនៅក្រុងប៉េកាំង ។ ថ្នាក់ដឹកនាំបក្សនិងរដ្ឋចិនដូចជាលោកស៊ី ជីនភីង ជាដើមនិងតំណាងប្រជាជនជិត ៣០០០ រូបបានអញ្ជើញចូលរួមពិធីសម្ពោធបើកកិច្ចប្រជុំ ។
ឆ្នាំ២០២១នេះជាឆ្នាំចាប់ផ្តើមអនុវត្តផែនការ ៥ ឆ្នាំទី ១៤ ។ ប្រទេសចិនដែលជិតនឹងចាប់ដំណើរថ្មីនៃការកសាងប្រទេសសង្គមនិយមទំនើបដោយគ្រប់ជ្រុងជ្រោយនឹងអភិវឌ្ឍយ៉ាងដូចម្តេចត្រូវបានយកចិត្តទុកដាក់យ៉ាងខ្លាំង ។
លោកលី ខឺឈាង នាយករដ្ឋមន្រ្តីចិនបានធ្វើរបាយការណ៍អំពីការងាររដ្ឋាភិបាលក្នុងរយៈពេល ១ ឆ្នាំកន្លងទៅចំពោះអង្គប្រជុំ ដោយបានបូកសរុបផ្លែផ្កានៃការអភិវឌ្ឍសេដ្ឋកិច្ចនិងសង្គមរបស់ប្រទេសចិនក្នុងអំឡុងពេល ៥ ឆ្នាំកន្លងផុតទៅ ព្រមនិងលើកឡើងនូវគោលដៅនិងភារកិច្ចសំខាន់នៃការអភិវឌ្ឍសេដ្ឋកិច្ចនិងសង្គមរបស់ប្រទេសចិនក្នុងរយៈកាលអនុវត្តផែនការ ៥ ឆ្នាំទី ១៤ ដើម្បីជូនអង្គប្រជុំធ្វើការពិនិត្យពិភាក្សា ។
សូមបញ្ជាក់ថា របាយការណ៍ផែនការដែលពាក់ព័ន្ធនឹងជីវភាពរស់នៅរបស់ប្រជាជននិងរដ្ឋនិងរបាយការណ៍ហិរញ្ញវត្ថុក៏ត្រូវប្រគល់ឱ្យពិនិត្យក្នុងពិធីសម្ពោធបើកកិច្ចប្រជុំនេះដែរ ។ លើសពីនេះទៅទៀត កិច្ចប្រជុំនេះនឹងធ្វើការពិនិត្យពិភាក្សាអំពីសេចក្តីព្រាងច្បាប់នៃការធ្វើវិសោធនកម្មលើច្បាប់រៀបចំចាត់ចែងសភាតំណាងប្រជាជនទូទាំងប្រទេសចិន និងសេចក្តីព្រាងច្បាប់នៃការធ្វើវិសោធនកម្មលើលក្ខន្តិកៈពិនិត្យពិភាក្សាការងាររបស់សភាតំណាងប្រជាជនទូទាំងប្រទេសចិនផងដែរ សេចក្តីព្រាងច្បាប់ទាំងពីរនេះនឹងធ្វើឱ្យមានសុក្រឹតភាពថែមទៀតនូវរបបសភាតំណាងប្រជាជនដែលជារបបនយោបាយជាមូលដ្ឋានរបស់ប្រទេសចិន។ កិច្ចប្រជុំនៅនឹងធ្វើការពិនិត្យពិភាក្សាអំពី«សេចគ្តីព្រាងនៃសេចក្តីសម្រេចចិត្តនៃសភាតំណាងប្រជាជនទូទាំងប្រទេសចិនស្តីពីការធ្វើឱ្យមានសុក្រឹតភាពនូវរបបបោះឆ្នោតរបស់តំបន់រដ្ឋបាលពិសេសហុងកុង»ជាដើម៕