នាយប់ថ្ងៃទី ២២ ខែកុម្ភៈ លោកស៊ីជីនភីងប្រធានរដ្ឋចិនបានជួបពិភាក្សាតាមទូរស័ព្ទជាមួយលោក Abdel Fattah al Sisiប្រធានាធិបតីអេហ្ស៊ីប។
ថ្លែងក្នុងកិច្ចជំនួប លោកស៊ីជីនភីងបានសង្កត់ធ្ងន់ថា អេហ្ស៊ីបជាប្រទេសអារ៉ាប់និងអាហ្វ្រិកដំបូងបង្អស់ដែលបានបង្កើតទំនាក់ទំនងផ្លូវទូតជាមួយប្រទេសចិនថ្មី ទំនាក់ទំនងរវាងចិននិងអេហ្ស៊ីបជាគំរូនៃការរួមសាមគ្គីនិងធ្វើកិច្ចសហប្រតិបត្តិការជាមួយគ្នា ផ្តល់ផលប្រយោជន៍ដល់គ្នានិងឈ្នះ-ឈ្នះរវាងចិននិងអាហ្រ្វិក ព្រមទាំងចិននិងអារ៉ាប់។ អេហ្ស៊ីបស្ថិតនៅឋានៈសំខាន់នៃនយោបាយរបស់ចិន ចិនគឺជាមិត្តភ័ក្តិនិងជាដៃគូដែលអេហ្ស៊ីបអាចជឿទុកចិត្តបាន។ ប្រទេសចិនគាំទ្រអេហ្ស៊ីបក្នុងការធ្វើកិច្ចខិតខំប្រឹងប្រែងដើម្បីគាំពារអធិបតេយ្យភាពជាតិ ឯករាជ្យនិងបូរណភាពទឹកដី ព្រមនិងគាំទ្រប្រជាជនអេហ្ស៊ីបក្នុងការដើរតាមមាគ៌ាអភិវឌ្ឍន៍ដែលសមស្របនឹងសភាពការណ៍ជាតិរបស់ខ្លួន។ ចិនរីករាយពង្រឹងការកសាងទំនុកចិត្តិខាងនយោបាយជាមួយអេហ្ស៊ីប គាំទ្រគ្នាយ៉ាងមុតមាំ ក៏ដូចជាបង្កើនការសម្របសម្រួលនិងកិច្ចសហការក្នុងកិច្ចការអន្តរជាតិនិងក្នុងតំបន់ដើម្បីរួមគ្នាគាំពារពហុភាគីនិយមនិងសច្ចយុត្តិធម៌អន្តរជាតិ។
ជាការឆ្លើយតប លោក Sisi បានសម្តែងការអបអរយ៉ាងកក់ក្តៅចំពោះខួបលើកទី ១០០ ឆ្នាំនៃការបង្កើតបក្សកុម្មុយនិស្តចិន។ លោកបានថ្លែងថា ឆ្នាំនេះជាខួបទី ៦៥ឆ្នាំនៃការបង្កើតទំនាក់ទំនងផ្លូវទូតរវាងអេហ្ស៊ីបនិងចិន។ អេហ្ស៊ីបនិងចិនមានចំណងមិត្តភាពយ៉ាងជ្រាលជ្រៅ ទំនាក់ទំនងរវាងប្រទេសទាំងពីរមានមេត្រីភាពយ៉ាងរឹងមាំ។ អេហ្ស៊ីបសូមស្វាគមន៍សហគ្រាសចិនកាន់តែច្រើនទៅវិនិយោគនិងធ្វើកិច្ចសហប្រតិបត្តិការនៅអេហ្ស៊ីប ហើយរីករាយក្នុងការធ្វើខិតខំប្រឹងប្រែងរួមជាមួយភាគីចិន ដើម្បីលើកកម្ពស់ទំនាក់ទំនងភាពជាដៃគូយុទ្ធសាស្ត្រគ្រប់ជ្រុងជ្រោយរវាងអេហ្ស៊ីបនិងចិន៕
