ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានដាក់ចេញជាផ្លូវការនូវ«សៀវភៅសអំពីការអភិវឌ្ឍថាមពលចិនក្នុងយុគសម័យថ្មី» នៅល្ងាចថ្ងៃទី ២១ ខែធ្នូ ឆ្នាំ2020នេះ។
សៀវភៅសបានចែងថា ប្រទេសចិនបានជំរុញបដិវត្តន៍ថាមពលយ៉ាងម៉ឺងម៉ាត់មិនងាករេ ការផលិតនិងវិធីប្រើប្រាស់ថាមពលបានវិវឌ្ឍនិងប្រែប្រួលយ៉ាងខ្លាំង។ រចនាសម្ព័ន្ធនៃការផលិតនិងប្រើប្រាស់ថាមពលប្រកបដោយប្រសិទ្ធភាពកាន់តែខ្ពស់ អត្រាប្រើប្រាស់ថាមពលក៏បានត្រូវលើកកម្ពស់យ៉ាងជាក់ស្តែងផងដែរ។ ប្រទេសចិនបានប្រកាន់ខ្ជាប់នូវទស្សនៈអភិវឌ្ឍន៍ថ្មីអំពី ការច្នៃប្រឌិតថ្មី ការសម្របសម្រួល បៃតង ភាពបើកទូលាយ ភាពចែករំលែក បានបង្កើតជាប្រព័ន្ធផ្គត់ផ្គង់ថាមពលស្អាតពហុទម្រង់ បានបន្តជំរុញយ៉ាងស៊ីជម្រៅនូវការធ្វើកំណែទម្រង់យន្តការថាមពល និងបន្តជំរុញកិច្ចសហប្រតិបត្តិការអន្តរជាតិក្នុងវិស័យថាមពល ពោលគឺថាមពលចិនបានចូលក្នុងដំណាក់កាលថ្មីនៃការអភិវឌ្ឍប្រកបដោយគុណភាពខ្ពស់។
សៀវភៅសបានឱ្យដឹងទៀតថា ពេលប្រឈមមុខនឹងបញ្ហាពិភពលោកដ៏កាន់តែស្មុគស្មាញ ដូចជាការប្រែប្រួលអាកាសធាតុ និងកង្វះខាតថាមពលជាដើម ប្រទេសចិនបានដាក់ចេញទស្សនៈស្តីពី សហគមន៍រួមជោគវាសនានៃមនុស្សជាតិ ព្រមនិងខិតខំជំរុញការអភិវឌ្ឍបែបកាបូនទាប និងថាមពលស្អាតរបស់ខ្លួន ក៏ដូចជាបានជំរុញយ៉ាងសកម្មនូវអភិបាលកិច្ចថាមពលពិភពលោក ដើម្បីចាប់ដៃជាមួយបណ្តាប្រទេសនានា ស្វែងរកមាគ៌ាអភិវឌ្ឍន៍ថ្មីប្រកបដោយចីរភាពលើវិស័យថាមពលពិភពលោក។ ការអភិវឌ្ឍថាមពលនៃសាធារណរដ្ឋប្រជាមានិតចិនក្នុងយុគសម័យថ្មី បានរួមវិភាគទានដ៏សកម្មក្នុងការថែរក្សាសុវត្ថិភាពថាមពលពិភពលោក ការទប់ទល់នឹងបម្រែបម្រួលអាកាសធាតុជាសកល ក៏ដូចជាកំណើនសេដ្ឋកិច្ចពិភពលោកផងដែរ៕
