នាពេលថ្មីៗកន្លងទៅនេះ លោក Keith Krach អនុរដ្ឋមន្ត្រីការបរទេសអាមេរិកបានទៅ “បំពេញទស្សនកិច្ច”នៅតំបន់ចិនតៃវ៉ាន់ ។ នេះជាលើកទីពីរហើយដែលអាមេរិកចាត់បញ្ជូនមន្ត្រីជាន់ខ្ពស់ទៅកាន់តំបន់ចិនតៃវ៉ាន់ ។ ទង្វើបែបនេះបានបំពានយ៉ាងធ្ងន់ធ្ងរនូវគោលការណ៍ចិនតែមួយនិងការកំណត់នៃសេចកី្តប្រកាសរួម៣ច្បាប់រវាងចិននិងអាមេរិក បានបំភ្លិចបំផ្លាញយ៉ាងធ្ងន់ធ្ងរដល់ទំនាក់ទំនងរវាងចិននិងអាមេរិក ក៏ដូចជាសន្តិភាពនិងស្ថិរភាពនៃច្រកសមុទ្រតៃវ៉ាន់ផងដែរ ដូចនេះ ប្រទេសចិននឹងចាត់វិធានការតបតវិញដ៏ត្រឹមត្រូវជាដាច់ខាត ដើម្បីគាំពារអធិបតេយ្យភាពនិងបូរណភាពទឹកដីរបស់ប្រទេសជាតិ ។
អ្នកផងទាំងពួងបានជ្រាបស្រាប់ហើយថា គោលការណ៍ចិនតែមួយ ជាមូលដ្ឋាននយោបាយនៃទំនាក់ទំនងរវាងចិននិងអាមេរិក ។ សេចក្តីប្រកាសរួម៣រវាងចិននិងអាមេរិកបានកំណត់យ៉ាងច្បាស់ថា អាមេរិកទទួលស្គាល់រដ្ឋាភិបាលសាធារណរដ្ឋប្រជាមានិតចិនជារដ្ឋាភិបាលស្របច្បាប់តែមួយគត់របស់ប្រទេសចិន ក្នុងក្របខ័ណ្ឌនេះ ប្រជាជនអាមេរិកគ្រាន់តែរក្សាទំនាក់ទំនងក្រៅផ្លូវការខាងវប្បធម៌ ពាណិជ្ជកម្មនិងវិស័យផ្សេងទៀតជាមួយប្រជាជនតៃវ៉ាន់ ។ ជានិច្ចកាល ប្រទេសចិនប្រឆាំងយ៉ាងដាច់ខាតនូវការប្រាស្រ័យទាក់ទងផ្លូវការរវាងអាមេរិកនិងតៃវ៉ាន់ទោះតាមទម្រង់ណាក៏ដោយ ។
ប៉ុន្តែចាប់ពីចូលឆ្នាំនេះមក អ្នកនយោបាយអាមេរិកមួយចំនួនបានបង្ករឿងជារឿយៗក្នុងបញ្ហាតៃវ៉ាន់ ។ ចាប់ពីការលក់អាវុធឱ្យតៃវ៉ាន់ ការបង្ហាញថានឹងពង្រីកកិច្ចសហប្រតិបតិ្តការខាងសេដ្ឋកិច្ច ដល់ការចាត់បញ្ជូនមន្ត្រីជាន់ខ្ពស់ទៅកាន់តៃវ៉ាន់ជាបន្តបន្ទាប់ រហូតដល់ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិជួបសន្ទនាជាមួយតំណាងតៃវ៉ាន់ “ប្រចាំនៅក្រុងញូវយ៉ក” អាមេរិកបានបញ្ចេញសញ្ញាខុសឆ្គងជាបន្តបន្ទាប់ទៅកាន់កម្លាំងអបគមន៍នៅកោះតៃវ៉ាន់ មូលហេតុសំខាន់គឺប៉ុនប៉ងបង្ករឿងនៅច្រកសមុទ្រតៃវ៉ាន់ដើម្បីទទួលបានផលប្រយោជន៍ផ្ទាល់ខ្លួន ។
ទន្ទឹមនឹងការបោះឆ្នោតសកលអាមេរិកកាន់តែខិតជិត អ្នកនយោបាយអាមេរិកមួយចំនួនរំពឹងថា អាចឆក់យកផលប្រយោជន៍ខាងសេដ្ឋកិច្ចនិងនយោបាយពីបញ្ហាតៃវ៉ាន់ ក្នុងន័យបង្វែរការមិនញេញចិត្តក្នុងស្រុកចំពោះអសម្ថតភាពរបស់រដ្ឋាភិបាល ក៏ដូចជាជួយស្រោចស្រង់ភាពអន់ថយក្នុងការឃោសនាការបោះឆ្នោតសកល ។
មូលហេតុកាន់តែស៊ីជម្រៅ គឺអ្នកនយោបាយអាមេរិកមួយចំនួននៅតែទទូចប្រកាន់ខ្ជាប់ឯកតោភាគីនិយមនិងអនុត្តរភាពនិយមដដែល ហើយចង់ទប់ស្កាត់និងដាក់សម្ពាធទៅលើការអភិវឌ្ឍរបស់ប្រទេសចិនតាមរយៈកលល្បិចគ្រប់បែបយ៉ាង ។
បញ្ហាកោះតៃវ៉ាន់ពាក់ព័ន្ធដល់ផលប្រយោជន៍និងការយកចិត្តទុកដាក់ជាស្នូលរបស់ប្រទេសចិន ជាបញ្ហាសំខាន់ជាងគេនិងរសើបជាងគេក្នុងទំនាក់ទំនងរវាងចិននិងអាមេរិក ។ ទង្វើណាទាំងអស់ដែលបំផ្លាញដល់ផលប្រយោជន៍ជាស្នូលរបស់ប្រទេសចិននិងជ្រៀតជ្រែកកិច្ចការផ្ទៃក្នុងរបស់ប្រទេសចិន ពិតជានឹងទទួលរងការតបតវិញយ៉ាងខ្លាំងក្លាពីប្រទេសចិនជាមិនខាន ៕