ខណៈពេលសេដ្ឋកិច្ចពិភពលោកទាំងមូលទទួលរងផលប៉ះពាល់យ៉ាងធ្ងន់ធ្ងរ សេដ្ឋកិច្ចចិនបានកើនឡើងដោយផ្ទុយនឹងនិន្នាការដែលញ៉ាំឱ្យពិភពលោកចាប់អារម្មណ៍យ៉ាងខ្លាំង។
ចាប់តាំងពីចូលខែឧសភាមក ល្បឿនកំណើននៃការនាំចេញរបស់ប្រទេសចិនបានបំបែកកំណត់ត្រាថ្មីបំផុតក្នុងឆ្នាំ២០២០ជាបន្តបន្ទាប់។ ការនាំចេញរបស់ប្រទេសចិននៅខែសីហាបានកើនឡើង១១,៦%បើធៀបនឹងរយៈពេលដូចគ្នានៃឆ្នាំមុនដែលបានទាក់ទាញក្រសែចក្ខុរបស់ប្រព័ន្ធសារព័ត៌មានបរទេសម្តងទៀត។ ក្នុងពេលជាមួយគ្នានេះ ការកើនឡើងនៃផលិតផលក្នុងស្រុកសរុបនិងការចុះហត្ថលេខាលើកិច្ចព្រមព្រៀងរវាងចិននិងសហភាពអឺរ៉ុបដែលបានដំណើរការអស់រយៈពេល៨ឆ្នាំក៏បានធ្វើឱ្យមជ្ឈដ្ឋានខាងក្រៅមើលឃើញភាពធន់របស់សេដ្ឋកិច្ចចិនផងដែរ។
យោងទៅតាមទិន្នន័យដែលចេញផ្សាយដោយរដ្ឋបាលជាតិស្ថិតិចិនបានឱ្យដឹងថា ការវិនិយោគ ការប្រើប្រាស់និងការនាំចេញរបស់ប្រទេសចិននៅខែសីហាបានសម្រេចកំណើនវិជ្ជមានទាំងស្រុង!ក្នុងនោះ ការវិនិយោគនៅខែសីហាបានកើនឡើង៤,១៨%បើធៀបនឹងខែកក្កដា ទំហំសរុបនៃការនាំចេញនាំចូលបានកើនឡើង៦% បើធៀបនឹងរយៈពេលដូចគ្នានៃឆ្នាំមុន ទំហំសរុបនៃប្រដាប់ប្រើប្រាស់ក្នុងសង្គមបានកើនឡើង០,៥% បើធៀបនឹងរយៈពេលដូចគ្នានៃឆ្នាំមុនដែលបានប្រែពីកំណើនអវិជ្ជមានទៅជាកំណើនវិជ្ជមានជាលើកដំបូងក្នុងឆ្នាំនេះ។
យោងទៅតាមទិន្នន័យខាងវិស័យការវិនិយោគ ការប្រើប្រាស់និងការនាំចេញឱ្យដឹងថា នៅខែសីហាឆ្នាំនេះ ការនាំចេញច្រើនជាងការនាំចូលចំនួន៤សែន២ម៉ឺនលានយាន់ប្រាក់ចិន ត្រឹមតែតួលេខមួយនេះប៉ុណ្ណោះ ក៏អាចជំរុញឱ្យផលិតផលក្នុងស្រុកសរុបកើនឡើងលើសពី៥% បើធៀបនឹងរយៈពេលដូចគ្នានាឆ្នាំមុន និងការវិនិយោគកើនឡើង៤,១៨%ដែលអាចជំរុញឱ្យផលិតផលក្នុងស្រុកសរុបកើនឡើងលើសពី១%។
តារាងពន្ទុលើសពីការរំពឹងទុករបស់ប្រទេសចិនបាននាំមកនូវផលវិជ្ជមានចំពោះស្ថានការណ៍ទាំងជាតិនិងអន្តរជាតិ។ ពេលថ្មីៗកន្លងទៅនេះ ប្រការដែលគួរឱ្យមានក្តីរំភើបគឺចិននិងសហភាពអឺរ៉ុបបានចុះហត្ថលេខាជាផ្លូវការលើ«កិច្ចព្រមព្រៀងសញ្ញាភូមិសាស្រ្តទំនិញរវាងចិននិងសហភពអឺរ៉ុប»កាលពីថ្ងៃទី១៤ខែកញ្ញាដែលនឹងមានអំណោយផលដល់ផលិតផលនិងសហគ្រាសរាប់ពាន់រាប់ម៉ឺនឱ្យចូលក្នុងទីផ្សាររបស់គូភាគី។សហភាពអឺរ៉ុបនឹងពង្រីកថែមមួយកម្រិតទៀតនូវចំណែកពាណិជ្ជកម្មរបស់គ្រឿងបរិភោគនិងកសិផលដែលមានបច្ចេកវិទ្យាខ្ពស់នៅទីផ្សារចិន នេះម្យ៉ាង ម្យ៉ាងវិញទៀត ប្រការនេះក៏មានអំណោយផលដល់កសិផលមានលក្ខណៈពិសេសរបស់ប្រទេសចិនពង្រីកចំណែកនៅទីផ្សារសហភាពអឺរ៉ុបផងដែរ។
និយាយជាទូទៅ និន្នាការនៅពេលអនាគតនៃសេដ្ឋកិច្ចចិនគឺមានកម្លាំងជាក់ស្តែង មានជំនឿចិត្តនិងមានបញ្ហាប្រឈម។បើមើលពីទិន្ន័យសេដ្ឋកិច្ចនៅខែសីហា ល្បឿនងើបឡើងវិញនៃសេដ្ឋកិច្ចចិនបានលើសពីការរំពឹងទុក។ការងើបឡើងវិញយ៉ាងឆាប់រហ័សនៃសេដ្ឋកិច្ច ការអភិវឌ្ឍដ៏ល្អប្រសើរនៃរចនាសម្ព័ន្ធសេដ្ឋកិច្ច ភាពធន់និងកម្លាំងចលករយ៉ាងខ្លាំងក្លារបស់សេដ្ឋកិច្ចចិនមិនត្រឹមតែធ្វើឱ្យពួកយើងពោរពេញទៅដោយជំនឿចិត្តចំពោះអនាគតនៃសេដ្ឋកិច្ចចិនប៉ុណ្ណោះ ថែមទាំងក៏កាន់តែមានទីបង្អែកក្នុងការប្រឈមនឹងហានិភ័យនិងការសាកល្បងទៀតផង៕
